قدر الفقراء

حقيقة الأب 8

قدر الفقراء

8

#قصص #عراقية #واقعية #للكاتب #قدوري #الدوري

بعد ما سد الباب اللي حسبه أبو أزهار, خجل محسن من روحه وابتعد عن بيت أم أزهار وتمشى لراس الشارع .

نوى يبتعد عن البيت وعن المحلة وعن مدينة الثورة, حتى يتخلص من القيود اللي كبلت بيها أزهار گلبه وروحه وسيطرت على كل تفكيره . خاف لا من يبقى, تلح عليه فكرة دگ باب حوشهم, والإعلان عن حبه لأزهار گدام أمها وأبوها .

تمشى لراس الشارع .. كل بين خطوة وخطوة يلتفت ورا ويتمنى تلحگ بي أزهار .

هواي تمنيات راودته بذيچ اللحظات . سرح وي تمنياته ولا عاد يهتم لطريقه . أكثر من مرة زلگ بالطين وتدارك نفسه وتشبث بأقرب حايط بصفه .

فكر يتوجه لباب الشرجي وهناك يدخل لمطعم من المطاعم الزغيرة اللي كانت بذاك الوقت تبيع لفات گص وياها گلاص درافت بيرة بست دراهم, او ربع دينار .

هواي شباب من جيله ومن ولد محلته تعلمو يشربون عرگ وبيرة وكان يسمع منهم عن حالة الانتعاش اللي تصيبهم بعد الشرب واثناءه .

ما فكر يشرب عرگ بيوم من الأيام .

الحداد اللي كان يشتغل يمه بفترة هروبه من العسكرية, كان يشرب عرگ كل يوم . فمن كان يشتم ريحته تلعب نفسه . لهذا ما انجر لشرب العرگ مثل ما انجروا اقرانه .

فكر يشرب بيره حتى ينزاح همه . حسب ما سمع البيرة اخف بتاثيرها و ريحتها .

صعد بالفورتات وما حس بروحه الا هو اباب الشرجي .

تردد اكثر من مرة وهو يحاول يدخل لواحد من تلك المحلات . خاف على روحه لا يرتبك اثناء ما دا يطلب المشروب . ومن ثم خاوف لا يسكر بعد ما يشرب ويتيِّه صول چعابه مثل ما يگولون . لزم المحلات بالسره . بدا من سينما غرناطه الى ان وصل الى سينما ميامي بلا ما يجرء لدخول لاي محل من تلك المحلات الثلاثة الموجودة بالشارع . رد عبر ساحة الأمة وتوجه لشارع السعدون .

أول مرة يمر من گدام مفرزة الانضباطية المنتشرين أفرادها بساحة التحرير بلا ما يشعر بالخوف . نموذج إجازته بجيبه . شحد اللي يندگ بتيله . تعمد واقترب منهم, فارد جناحينه مثل ما يگولون, ودافع الباب بظهره . عندها عرف معنى الحياة بلا خوف من مخالفة القانون .

من صار مقابل سينما السندباد وشاف لوحة إعلانها عن فلم هندي ماضي على عرضه اكثر من ثلاثة اشهر, فكر يدخل يتفرج على الفلم ويندب حظه ويبچي وي اليبچون .

أكثر الافلام الهندية اللي شافها بالتلفزيون عبارة عن مأساة بين حبيبين . فقرر يغور بهاي المأساة .

عُبِرْ الشارع من على خطوط العبور . تحاشى العبور من غير المناطق المخصصة للعبور من خوفه لا يتغرم خمس دنانير وهو ما شايل بجيبه غير دينار واربع دراهم .