قدر الفقراء

قدر الفقراء 19

قدر الفقراء

19

رحلة البحث عن هيفاء

#قصص #عراقية #واقعية #للكاتب #قدوري #الدوري

بعد ما تطمن شاكر على حال أمه . قرر من اليوم الأول يبدا يستقصى اخبار مرته وبنته بعد ما عرف بيهن عايفات المحلة بعد أشهر من سجنه بلا ما يعرف احد عنهن أي أخبار .

داخ بسالفتهن وحار منين يبدي يدور عليهن . يعرف بيهن مثل حاله مقطوعات الجذور مثل ما يگولون .. لا ماما ولا داده ولا عمه ولا خاله ..

قبل لا تغيب الشمس وبعد ما خفت الحرارة قرر يطلع يتمشى بشارع الكفاح, منها يفك على نفسه ويشتم هوى نقي ومنها قبل لا يرجع يشتري له ولامه فواكه ونفر كباب ونفر تكة للعشى, وبطريقه يستقصي اخبار هيفاء وينته. عسى ولعل يلگى لهن اثر او خبر .

ما كان شاكر من رواد المقاهي حتى يروح يگعد بگهوه . ولا كان عنده مكان معين مفكر يروح له .. طلع يمشي على وجهه .

وصل راس الدربونه وقبل لا يخطي خطوة بالشارع العام اشتم ريحة الكعك والصمون من فرن جبار أبو شوارب . عندها اشتهى صمون مگسب بالسمسم . من ثلاث سنين ما ضايگ الصمون الحار المگسب . صمون السجن والخبز دائما يوصلهم بارد ومعجن . وحتى اللي يجيبوه ألزائرين من أهالي المساجين هماتين يوصلهم بارد .

اجتذبته ريحة الصمون .. فكر قبل لا يتمشى بالشارع يوصي عمال الفرن على صمون مگسب ويكثرون له السمسم بين ما يرجع من جولته . وهماتين فكر يسلم على جبار أبو شوارب اذا صادف ولگا بالفرن .

مدر راسه من الشباك المخصص للرجال . كان جبار منطي ظهره وديوجه العمال, فما شافه لشاكر.

ابتسم شاكر قبل لا يلقي على جبار السلام :- هلوو .. لك .. داد أبو ستار .. شلونك .

فز جبار من مكانه . الصوت ما غريب عليه :- لك .لك .. لك هلو .. هلوو هلوو . أبو ازهار .. الحمد لله على السلامه . لك هاي شنووو .. امته اطلعت .

تقرب منه بلا ما يتوقف على رد السلام والاكثار من الترحاب .

بساعتها اللي يدقق بوجه جبار يلاحظ بشكل جلي وواضح تغير الوانه وملامح وجهه ورجفة شواربه .

جاوبه شاكر والابتسامة متفارگ وجهه :- الله يخلي الرأيس أبو هيثم البارحة صدر قرار بمناسبة ثورة تموز, وشملوني بي .. واليوم طلعت .

تربوا شاكر وجبار بنفس المحلة .. وعاشوا سويا . ورغم الفوارق بيناتهم بالسنين وبالاحوال المادية بس ما كانوا لاهمه ولا أي واحد من اهل المحلة يحسون بالفوارق الطبقية . ما كان الفقر عيب . الفقر قدر مكتوب على الناس من رب العالمين .. مثله مثل الغنى . هذا اللي تعلموه من الحياة . الارزاق يوزعها الحنان المنان الرزاق . لافضل لاحد على احد.