قدر الفقراء

قدر الفقراء 22

قدر الفقراء

أكلت الجرذان الآتية من كل مكان خيمتنا فأتلفتها, ولم تعد الخيمة تتسع للجميع .

22

#قصص #عراقية #واقعية #للكاتب #قدوري #الدوري

طلع شاكر من بيت هيفاء بلا ما يتغدا واكتفى بشرب استكان الچاي ووعد بنته ومرته يرجع لهم بالليل . كل ظنه فسح لهن فرصة حتى يروحن للطبيب . وبنفس الوقت حتى يرجع لامه ينطيها خبر .

تنفست هيفاء الصعداء بعد ما سدت الباب, وتمنت لو يكون عندها القدرة وتسبق شاكر وتروح تخبر جبار باللي جرا واللي صار قبل لا يوصله شاكر ويبدي يلعب بعبه الفار .

قبل لا ترجع لمكانها سألتها بنتها :- هاااي عود ليش سويتي هيچ يمَّه .؟!!

:- اوووف .. لچ ماما .. احمدي ربچ .. الله ديستر علينا .. شوف شلون الله سخّرني الصبح وخلاني اتعارك وي محيسن واطرده من البيت, واروح اجيب النجار واقفل الغرفة واسوي كل هذا اللي سويته . تصوري لو كان محسن موجود وجاي شاكر ولاگي بالبيت .. كان شگال شاكر على محسن .؟ وشگال محسن على شاكر .؟. بله ما كان گال محيسن على امچ هاي ام رجّالين .. وام سحورة مثل ما گالت علي امه .. بعدين اكيد ما راح يسكت ولا راح يضم الخبر على جبار .. الحمد لله يا ربي من عدَّت على خير ..

:- أي وبعدين ..؟!!

:- لچ شنو بعدين .. شوفي هاي ..!! لچ شنو من دماغ, دماغچ .. لا تذكّريني .. خل اخذ نفس وبعدين افكر لها .. لساتني مخنوگه .. زين مني وگتله للخلفچ بعدچ ما متزوجه .

:- عود ليش ..؟!

:- شوفي هاي الثولة .. وچماله تسأل ليش .؟!! ما عليچ عتب . ألا .. كل النهار مشغله المسجل وخاله بالچ يم هذا اللي يصيح إني اغرق .. إني لغرق .. من عساك غرگت وما لگوا لك اثر ..

:- لا يمه .. لا خطيه .. لا تدعين على العندليب .. غير اموت ورا .

:- يلـــه لچ .. تموت ورا . على كل حال هسه مو وقتها .. صبي لنا غدا حتى نروح للطبيب ..

:- يا طبيب !! شو كذبتي الكذبه وصدگتبها .؟!!!

:- لچ گومي ثوله خل نتغدا وبعدين افهمچ .

سايرتها ازهار لامها وتغدت وياها وطلعن بعد ما غيرن ملابسهن ..

بالطريق فهمتها من تدخل للطبيب اللي متوجهات له تشرح له حالتها وتدِّعي راسها يوجعها وما تتمكن تنام الليل . وإذا ما تمكنت من الإجابة عن تسؤلات الطبيب تبقى ساكتة وتترك أمر الإجابة لامها .

دخلن لعيادة طبيب بشارع فلسطين .. طبيب باطنية ستوه مفتح جديد . عيادته قريبة من صالون الحلاقة اللي رتبت نفسها بي بيوم زواجها .

تولت الام عن بنتها الإجابات عن أسئلة الطبيب بعد ان شافت بنتها عاجزة عن الرد على أسئلته .. بكل إجابة من اجاباتها كانت تركز على عدم قدرة بنتها على النوم طول الليل . نتيجة معاناتها من الصداع .