قدر الفقراء

قدر الفقراء 20

قدر الفقراء

20

رُبَ صُدفةٍ خيرٌ من ألف ميعاد .

#قصص #عراقية #واقعية #للكاتب #قدوري #الدوري

بقت هيفاء تفكر بشاكر وجبار . رادت تنام الظهرية وما جاها نوم . ما عدها شي تلتهي بي وتبعد عن نفسها القلق والأفكار السوده الزرعها بگلبها جبار .

دخلت لغرفة أزهار رادت ترتبها وتحضرها لجيتهم لليوم الثاني . ما كان بيها شي يتربت . ملابس أزهار معلگات بالكنتور ومرتبات . انتبهت لبنطرون محسن وقميصه, كان عايفهن على الچرباية .. فكرت تغسلهن بعد ما شافت بيهن اثار وسخ وتراب . شالتهن وتوجهت للحمام وخلتهن بالطشت وقبل لا تخلي عليهن المي قررت تفتشهن خافت ليكون ناسي بيهن محسن ورقة او حاجة .. مدت ايدها بجيب القميص ورجعته للطشت بعد ما تأكدت من كونه فارغ . گلّبت جيوب الصفحة للبنطرون وتأكدت من خلوهن وغبَّطت بجيوب الورا وعندها حست بوجود شي بالكمر . حاچت نفسها بصوت مسموع :- ياااا .. عزاا .. هذا شمخلي بالكمر .. بس لا مخلي بازبند لو سحر .

شالت البنطرون ورجعت گعدت على القنفه وهي تتعوذ من الشيطان, من خوفها لا يكون محسن مخلي بحزامه بازبند وسحر . اكتشفت مكان الخياط بالكمر .. جابت ابره وگطعت مكان الخياط بالأبره, حتى لا ينشگ البنطرون . عندها ظهرت لها وصله قماش ملفوفة ومشدودة بخيط رفيع . تعوذت من الشيطان أكثر من مرة وهي تفك الخيط .. زالت الوصلة وظهرن فلوس محسن, شهگت من الفرحة وابتسمت :- يا گواد يا محيسن .. لك تريد تضم على خالتك هيفاء .. ههه .

حسبتهن .. سبع ورقات أمهات العشرة وبنصهن خمس دنانير .. خمسه وسبعين دينار بالتمام والكمال .. دينار ينطح دينار .

:- أي عيني بينت البوگه هاي ماخذ من اهله خمسمية دينار وكذّب علينا وانطانا اربع مية .. أي .. أي مبينة وواضحة مثل وضوح الشمس .. البقية صرفهن على روحه .. هاي من الأول بداها بكذبه .. وچماله صدگته .. أي . بسيطة .. اني الك محيسن ..

خلت الفلوس بصدرها وتخلت عن فكرة غسلهن . رجعتهن لمكانهن فوگ الچرباية .

تعمدت تخلي خياط الكمر المفتوگ گدام العين حتى تشوف ردة فعل محسن من يدخل الغرفة ويكتشف ضياع فلوسه .

***

قبل لا ترجع هيفاء من الفندق وعدت أزهار ومحسن تروح لهم الصبح تاخذهم لمصور باك ياخذون صور تذكارية لزواجهم . قبل لا يرجعون للبيت .

من التقت بجبار( وزف لها خبر ) طلعت شاكر من السجن . تخربطت أوضاعها .

فكرت وكانت تحاچي روحها بصوت مسموع :- لچ هاي صدگ خاف ترحين الصبح للفندق ويجي جبار للبيت وما يلگاچ .. الدوره يگلبها عزا عليچ .. أي هو هواي مرات يگول ما اجي أسبوع وراها بيوم يجينا . أي يسويها هذا .. بله هاي شسوي .. چماله وعدت ذولي اروح لهم الصبح .. خطيه أزهار بنفسها تأخذ صور تذكار لزواجها .. يعني من كلشي انحرمت .. الدوره احرمها من الصور ..