قدر الفقراء

قدر الفقراء 21

قدر الفقراء

21

#قصص #عراقية #واقعية #للكاتب #قدوري #الدوري

بعد ما لغت أزهار موضوع اخذ الصور التذكارية لزواجها عند المصور باك . حسب توجيهات أمها . طلبت من محسن يطلعون من الفندق ويرجعون للبيت من الصبح حتى يتلافون حر الظهرية . والَمَه الأمر لمحسن . ما كان على باله أصلا يأخذ صور . بعدين راد يرجع بسرعة حتى يروح لبيت اهله من خوفه لا يكونون متوجلين عليه . بنفس الوقت ما فارگت باله الخمسة وسبعين دينار اللي تركهن بكمر البنطرون .

من وصلوا البيت كانت لسه هيفاء بعدها نايمة .

سبقته أزهار لمحسن بكم خطوة وفتحت الباب بالمفتاح اللي عدها .

من دخلوا تفاجأ بوجود ام أزهار . كل تصوره راحت وي جبار للحلة حسب ما خبِّرتهم .

على گرگعت الباب صحت وطلعت من غرفتها منفوشة شوشتها وتحك بشعر راسها وتتثاوب .

توجه محسن بالجنطة لغرفة النوم . وبطريقة سلم على هيفاء وسألها :- صباح الخير خاله .. چنچ ما رايحه وي جبار للحله .

گال عبارته الأخيرة بحسن نية وبلا ما يكون له بيها أي قصد .

حسبالك سؤاله صحّاها .. بلا ما ترد السلام جاوبته بارتباك قبل لا تعيد ترتيب افكارها :- هاااا .. ايي .. لا .. لا .. شو هذا جبار غير رايه ..

بين ما جاوبته انتبه محسن لباب غرفة النوم .. كان مفتوح .. سبقته عيونه على مكان بنطرونه ..

لمح وضع الكمر .. تقرب من الچرباية حتى يتأكد من اللي شافه .

فك حلگه و بقى جامد بمكانه .. وگعت الجنطة من ايده .

غيرت ام أزهار من نبرات صوتها بعد ما استعادت وعيها وعرفت بمحسن اكتشف فعلتها :- هاي .. شكو .. عليش شمرت الجنطة .

بلا ما يباوع عليها كز على سنونه وحاول يسيطر على اعصابه :- هاي ليش شاگين البنطرون .؟!

ردت عليه بسخرية :- يا بنطرون عيني ..محيسن ..؟!!

رد عليها وگلبه يشتعل نار من الغيظ :- شنو يا بنطرون .. لا تتهمزين خاله .. كافي عاد .؟!!

تخوصرت گباله وهزت خصرها :- شوف محسن لا تحچي وياي بمثل هذا الأسلوب .. بلا شي روحي طالعة واصله لخشمي . هاي فوگ ما تعتذر عن فعلتك الشينه ..

صاحت ازهار بالاثنين :- هاي شكو .. فهموني .. شنو الصار .؟!!

جاوبها محسن :- امچ الافنديه .. باگت ..

صرخت بي هيفاء قبل لا يكمل كلامه :- لك .. محيسن احترم نفسك لا تگول باگت .. هاي بمكان ما تعترف ببوگتك .. كان استحيت من طمعت على حگ مرتك .. هاي بعدنا باولها وبديت بالكذب . بس مثل ما يگلون حبل الكذب گصير وفلوس الحلال ما تروح ..