// Unicode //
~~~~~~~~~~
ဈာပနအခမ်းအနားတစ်ခု။ လူများများစားစားတက်ရောက်ခြင်းမရှိတဲ့ထိုနေရာမှာ သျှန်လင်းထက်ကိုလည်း သတိထားမိသူမရှိ။
" နာရေးဖိတ်စာက ဘာလို့ဆွေမျိုးတွေမပါတာလဲ "
ကြားလိုက်ရတဲ့ အူကြောင်ကြောင်စကားကြောင့် လင်းထက် မျက်မှောင်ကြုတ်၏။
" ဆွေမျိုးရေးရအောင် တစ်မျိုးလုံးကြွသွားတာမှမဟုတ်တာ၊ ပြီးတော့ နာရေးက မင်္ဂလာဆောင်မဟုတ်ဘူး "
" ဪ... "
ခေါင်းတညိတ်ညိတ်လုပ်နေသူကို အာရုံထဲထားမနေဘဲ တစ်စုံတစ်ယောက်ကိုသာ သျှန်လင်းထက် ရှာနေသည်။ မစန္ဒာဆိုသူဖြစ်၏။ ထိုဈာပနကို သံသယဝင်နေသည့် မိမိသူငယ်ချင်း ဘုန်းမာန်ပြည့်ကြောင့် သူရောက်နေခြင်းပင်။ ဒါကို ဘယ်ကချောင်းနေမှန်းမသိတဲ့ Dylan ဆိုသူက သူ့အနောက်က ကောက်ကောက်ပါအောင်လိုက်လာလေသည်။
" အဲ့မိန်းမကို ဘာလို့အသည်းအသန်လိုက်နေကြတာလဲ "
Dylan က နားမလည်သလိုပုံနှင့် မေးခြင်း။
" မသိဘူး "
သူနှင့် စကားပြောချင်စိတ်မရှိသေးတာကြောင့် သျှန်လင်းထက် ခပ်ပြတ်ပြတ်သာဖြေလိုက်သည်။ သို့သော် အရိပ်သုံးပါးနားမလည်သူဆီက စကားတချို့ထပ်ကြားရပြန်သည်။
" တကယ်ဆို အဲ့ဒီမိန်းမက ငွေအလွဲသုံးစားလုပ်မှုတွေအများကြီးလုပ်ထားတာ၊ ထောင်ချလိုက်လို့ရပြီလေ မဟုတ်ဘူးလား "
ထိုစကားကြောင့် သျှန်လင်းထက် လှုပ်လှုပ်ရှားရှားဖြစ်သွားသည်။
" သူငွေအလွဲသုံးစားလုပ်တာ ခင်ဗျားကဘယ်လိုသိလဲ၊ သက်သေရောရှိလို့လား "
" ကိုယ်သိတယ်ဆိုတာက သူ့အမျိုးသားက ကိုယ့်မိတ်ဆွေလေ၊ လုပ်ငန်းတွေလဲ စပ်တူလုပ်ထားတာတွေရှိတော့ သိနေတာပါ၊ သက်သေကတော့.. သူ့အမျိုးသားရဲ အတွင်းရေးမှူးဆီမှာပဲ ရှိပါလိမ့်မယ် "
" ခင်ဗျားက ဘာလို့အခုမှပြောနေတာလဲ၊ မာန်တို့ကိုတော့ မပြောဘဲနဲ့ "
" သူတို့က မေးမှမမေးတာ "
လူ့ဂွစာနှင့်ဆက်မပြောချင်တာကြောင့် သူကပဲလက်လျှော့လိုက်ရသည်။ ထိုအချိန် သူတို့အနားမှဖြတ်လျှောက်သွားသည့် အမျိုးသမီးတစ်ယောက်။ သူမက မစန္ဒာ။
