// Unicode //
~~~~~~~~~~" ဒါ.. ဒါတွေအကုန်... ကျွန်တော့်ကိုပေးတာလား.. "
အံ့အားသင့်ကာ မယုံနိုင်သလိုမေးတဲ့သူ့မေးခွန်းကို Dylan ဆိုတဲ့လူက ခေါင်းညိတ်ရုံသာတုံ့ပြန်သည်။ သျှန်လင်းထက်မှာ အံ့ဩလွန်းတာကြောင့် စကားလုံးများပင်ပျောက်ရှနေ၏။ Dylan သူ့ကိုပေးသည်က ငွေပမာဏများစွာရှိသည့် ဘဏ်အကောင့်များ၊ အိမ်ခြံမြေပိုင်ဆိုင်မှုစာရွက်စာတမ်းများဖြစ်သည်။
" ခင်ဗျားက.. တရားမဝင်တာတွေလုပ်တာလား "
" စဉ်းတောင်မစဉ်းစားဖူးပါဘူး "
" အခု.. ကျွန်တော့်ကိုဒါတွေပေးပြီး ခင်ဗျားကထွက်ပြေးဖို့လုပ်နေတာလား "
သူ့စကားအဆုံး ခပ်ဩဩရယ်သံကိုကြားရလေသည်။
" ဘာတွေပြောနေတာလဲ၊ ကိုယ်သွားတော့မယ်လို့ မင်းကိုပြောတယ်လေ၊ ဒါတွေကို ပေးစရာလူမရှိဘူး၊ ဒီနေရာမှာ ကိုယ်ယုံတာ မင်းပဲရှိတာ "
ယုံတယ်ဆိုရအောင်လည်း Dylan နှင့် သူ့ရဲ့ဆက်ဆံရေးက ဘာမှန်းတောင်မရေရာ။ မျက်စိရှေ့က ပိုင်ဆိုင်ကြောင်းစာချုပ်စာတန်းတွေက အတုတွေရော မဖြစ်နိုင်ဘူးလား..။
" မင်းယုံလို့ရပါတယ်၊ အတုတွေမဟုတ်ဘူး "
" ဘာပဲဖြစ်ဖြစ်ပါ.. ကျွန်တော်က ဘာကိစ္စယူရမှာလဲ "
" ကိုယ်စောင့်နေတဲ့သူက မင်းလေ.. "
စူးရှသယောင်မျက်ဝန်းတွေဆီက ရှောင်လွှဲမိသူက သျှန်လင်းထက်ပင်။
" မယူဘူး "
" ဘာလို့လဲ..၊ မင်းလုပ်ချင်တာလုပ်လို့ရပါတယ်၊ ကိုယ်လဲပြန်မတောင်းပါဘူး "
" ခင်ဗျားမလိုရင်.. လှူလိုက်တာက ပိုမကောင်းဘူးလား၊ ကျွန်တော်ကတော့ မယူချင်ဘူး "
" လှူရမယ်.. "
သူက တစ်ခုခုကိုစဉ်းစားရင်း ခေါင်းတညိတ်ညိတ်လုပ်နေ၏။
" ကောင်းပြီလေ၊ မင်းပဲလှူပေးပါလား "
သျှန်လင်းထက် စိုက်ကြည့်လိုက်တော့ သူက ပြုံးကာ မေးဆတ်ပြသည်။ ဘယ်လိုလဲဆိုသည့် သဘော။