"محمد نزل وسلم على ناس البيت وساق نون ومشى"
محمد : اها اليوم كان كيف.. نون : كلو تمام الحمد لله والحمد لله عرفنا انو نسرين حامل.. محمد : الف مبروك ليها.. نون : الله يبارك فيك.. محمد : البنات اشتاقوا ليك الليلة.. نون : أنا زاتي اشتقت ليهم والله.. محمد : قالو م حينومو لو ما شافوك 😂.. نون عاينت ل ساعتها وقالت : واي الساعة 11 جات اتأخرت عليهم والله.. "ام محمد اتصلت عليهو ونون ردت عشان محمد سايق وكدا".. نون : هلا خالتي.. سعاد : اهلين منو معاي دا مش تلفون محمد.. نون : ااي يا خالتي انا نون محمد سايق عشان كدا رديت انا.. سعاد : خلااص يعني ما حصل رد على تلفونو وهو سايق.. أديهو أديهو التلفون دا.. نون : طيب ي خالتي.. هاك ي محمد خالتي عايزاك.. محمد : ااي ي أمي.. سعاد وهي بتكورك : انتو ناوين تبيتو برا الليلة ولا شنو.. البنات ديل ابو ينومو لحدي حسي وبكرة وراهم مدارس الصباح.. محمد : ااي ي امي يهندا قربنا على البيت.. سعاد : لا يعني الحاصل شنو عشان ما ترجعو البيت الا في انصاص الليالي.. محمد : الساعة 11 يادوب ي امي وين انصاص الليالي في الموضوع.. سعاد : ااي رد علي واتلاءم كويس اصلا بعد عرست مرتك سحرتك وقلبتك على امك.. محمد : معليش حقك علي يهندا نحن وصلنا.. سعاد : يلا
نون : مالك وشك اتغير كدا.. محمد : عارفة كلام أمي الحار دا.. نون : معليش م تزعل هي خايفة عليك بس عشان الوقت اتأخر.. محمد : والله انتي طيبة خلاص.. ارح ارح ننزل..
" اول ما نون دخلت بناتها جو جارين عليها وحضنوها"
رغد : اشتقت ليك ي ماما.. رهف : وانا بردو استقت ليك سديد.. ريم : وانا اكتل منهم الاتنين.. نون : وانا كمان والله ي حلواتي
(رغد عمرها 6 سنين ورهف 5 وريم 3 سنين)
سعاد : ها ما تكذبي لو اشتقتي ل بناتك ما بتكوني برا البيت لحدي الساعة 11.. نون : الظروف بس ي خالتي ومشيت مع نسرين المستشفى وطلعت حامل الحمد لله.. سعاد : ما شاء الله ما شاء الله ان شاء الله تجيب ولد يرفع رأسها وما تتلتهم بنات بس زيك كدا.. محمد : دي المرة الكم تتكلمي في السيرة دي ي امي.. خلاص عليك الله.. نون : ولا يهمك ي محمد اتعودت انا "وساقت بناتها وطلعت ل بيتهم فوق.. وبعد شوية محمد لحقها".. "وبعد ما نومت البنات ومشت غرفتها جا محمد واتكلم معاها".. : ما تزعلي من كلام أمي ي نون اتفقنا؟.. نون : حاضر ان شاء الله وبعدين خليتني اتعلم منك كلمة اتفقنا دي من كترة ما بتقولها 😂.. محمد : وانا علمتني ليها حبيبتي الأولى 😉.. نون : بالله 😂..محمد : بدل تزعلي وبتاع تضحكي يا باردة!.. نون : ااي عشان واثقة انو خلقتك دي ما خلقة زول كان عندو حبيبة أولى.. مجاهد : يا حقارة!!.. نون : روق روق بهظر 😂..
"نمارق كانت في بيت امها لسسة وبعد شوية اتصلت على وائل راجلها وبعد اكتر من ساعة جا ساقها".. وائل : ما لاحظتي اني اتأخرت عليك؟.. "نمارق ما كانت مركزة معاهو وماسكة تلفونها".. وائل : نمارق انا قاعد اتكلم معاك.. نمارق وهي بتعاين ل تلفونها : اها قلت شنو م سمعتك.. وائل : ختي التلفون وعايني لي عشان تفهميني.. نمارق : اها عاينت ليك قول في شنو.. وائل : نفسي يوم واحد بس تحسسيني انك مهتمة ب كلامي.. نمارق : حسي انا عملت شنو عشان تقول كدا.. وائل : ولا شي خلاص انسي.. نمارق : طيب تمام " ورجعت مسكت تلفونها"
.
.
.
نمارق أكبر اخوات نجود.. عمرها 35 سنة اتزوجت عمرها 17 وما تمت قرايتها مع انو راجلها ما كان عندو مشكلة بس هي اتكاسلت.. عندها بت عمرها 17 اسمها شهد وولد عمرو 15 اسمو أحمد.. راجلها طيار وغنيان شديد وحالهم ميسور
نهى الأخت التانية عمرها 30 سنة واتزوجت عمرها 19 وبدت الجامعة بس ما كملتها عشان راجلها طلب منها كدا.. عندها ولدين واحد اسمو عمر و عمرو 9 سنين والتاني اسمو عمرو وعمرو 7 سنين.. راجلها حسام محامي ومرتبو متوسط وعايشين كويس
نون الأخت التالتة عمرها 27 واتزوجت عمرها 20 لكن كملت جامعتها واشتغلت موظفة في البنك.. بناتها زي ما قلت رغد ورهف وريم.. راجلها محمد مهندس مدني
نسرين الأخت الرابعة عمرها 21 سنة وعرست عمرها 18 وما عندها اولاد.. راجلها مجاهد طبيب أسنان
حامد : اخو نجود الصغير عمرو 20 وبقرا هندسة معمار في جامعة السودان
.
.
.
وقفة
ااي بيت وااي باب وراهو قصة.. والمشاكل اساس الحياة لأنها دنيا يعني واطية ودنيئة.. وماف زول عايش حياة مليانة سعادة وراحة.. و لابد من انو نضوق مرارة الحزن عشان نعرف قيمة حلاوة الفرح..
ميوس 💜
