"في بيت نمارق"
شهد : ي ماما.. "نمارق كالعادة ماسكة تلفونها وما مركزة مع شهد".. شهد : ي ماما اسمعيني.. نمارق : في شنو ي بت قولي اها.. شهد : أنا خايفة شديد.. نمارق : من شنو ان شاء الله.. شهد : من امتحانات الشهادة ي ماما.. قربت شديد وانا في حاجات كتيرة ما فاهماها.. نمارق : عايني انتي كل العليك تجيبي درجة النجاح بس وابوك بدخلك احسن جامعة خاصة في السودان بكل بساطة.. شهد : انتي ليه دايما بتقولي لي الكلام دا ي ماما.. انا ما عايزة انجح بس.. نمارق : خلاص رأيك شنو اعرس ليك مررة وحدة.. لا قراية لا زفت اصلا انا عرست في نفس عمرك دا والبت ل بيتها والشهادة للحيطة.. شهد : ماما انتي ما بتفهميني نهائي.. نمارق : خلاص جاية تتكلمي معاي ليه؟.. شهد : بعتزر ما حأجيك تاني.. نمارق : احسن زاتو ما ناقصة وجع راس..
"شهد مشت غرفتها وقعدت تبكي واتصلت على ابوها كم مرة بس ما رد عليها وبعد مسافة رجع ليها وعرف من صوتها انها قاعدة تبكي".. وائل : مالك ي شهودة بتبكي كدا؟.. شهد : امتحانات الشهادة قربت وانا خايفة منها وما فاهمة حاجات كتيرة.. وائل : حسي روقي وما تبكي وجيبي دفتر واكتبي فيهو كل المواد والدروس الما فاهماها وانا بجيب ليك احسن الأساتذة يقروك في البيت.. شهد : بالجد يا بابا؟.. وائل : ااي طبعا يلا يلا قومي غسلي وشك دا و جيبي الدفتر وانا اول ما ارجع البيت بتفاهم معاك كويس؟.. شهد : شكرا ي بابا.. وائل : عندي كم شهودة انا.. يلا سلام اخلص شغل وارجع البيت.. شهد : طيب سلام منتظراك.. وائل : سلام
"وائل رجع البيت بالليل ولقى شهد نايمة وجمبها الدفتر شالو وعرف المواد ودخل الفيس وفتش عن الدروس الخصوصية ولقى أرقام الأساتذة وفي اليوم التاني اتصل عليهم وكلم شهد انو تجهز حاجاتها المغرب لانو في استاذ كيمياء حيجيها.. شهد اتبسطت ب الحصص واخيرا قدرت تتخلص من خوفها.. وفي اليوم التاني في المدرسة "
عزة : مالك الليلة فرحانة كدا ي شهد.. شهد : عشان واخيرا أمور القراية اترتبت.. عزة : حظظظك اكيد ابوك جاب ليك أساتذة من أمريكا عديل.. شهد : لالا كيف يعني 😂.. عزة : انسي انسي.. اها مش مفروض تعزمينا بالمناسبة السعيدة دي.. عهد : ااي اعزمينا يلا.. شهد : طواالي ارح.. "بعد شهد عزمتهم جات بت كدا وقالت ل شهد" وعد : على فكرة ي شهد.. عزة وعهد ديل عاملين فيها صحباتك عشان مصلحة ساي بس.. وانا قبيل سمعتهم بتكلمو فيك وقالو انك بت عويرة ومسكينة وهم ما مصاحبنك الا عشان عندك قروش وبتاع.. "عزة وعهد ما عرفوا يردوا كيف وطوالي مشوا من جمب شهد ".. شهد : ما قادرة أصدق كلامك دا!!.. وعد : خليك مفتحة ي بت وخلي الطيبة الزايدة دي وما ااي زول يضحك معاك ويسلم عليك معناها صحبك وبحبك.. اختاري صح عشان ما تتصدمي بعدين.. شهد : ليه دايما بحصل معاي كدا؟.. وعد : عادي انا زاتي حصلت معاي مواقف كتيرة زي دي واكبر من دي وفي البداية زعلت شديد بس زي ما شايفة حاليا المواقف ديك قوتني واتعلمت منها كيف اختار صح وانو ما مفروض أثق في ااي زول.. شهد : طيب لو فاضية ممكن تحكي لي من المواقف دي؟.. وعد : أنا ما قاعدة احكي ل اي زول.. شهد : طيب تمام ماف مشكلة " شهد مشت قعدت بعيد وفجأة وعد جات وقعدت معاها".. وعد : ما عارفة ليه بس ارتحت ليك سريع.. شهد وهي مبتسمة : نفس الاحساس.. وعد : أنا ما عندي صحبات احكي ليهم بس حأحكي ليك.. شهد : يعني افهم اني بقيت صحبتك 😉.. وعد : شبه كدا 😂.. شهد : اتشرفنا 😂.. وعد : الشرف لي.. يلا اكتر موقف زعلني حصل معاي السنة الفاتت دي.. ودا السبب الخلاني أتحول من مدرستي و أجي المدرسة دي.. شهد : اها حصل شنو؟.. وعد : كان عندي صحبتي من سنة اولى اساس ومشت معاي نفس الثانوية برضو وكنت بحبها شديد وهي زي اختي عديل اسمها سمر.. في بتين صحبات كدا جو جداد في سنة تانية وانا اول ما شفتهم ما ارتحت ليهم نهائي.. حتى اغلب بنات الفصل كانو بتجنبوهم والأساتذة برضو دايما متشاكلين معاهم وطاردنهم من الفصل.. يلا بس انا لاحظت انو سمر بدت تحتك بيهم كتير حتى بقت بتفطر معاهم وكدا.. انا ما بعرف اسكت فاا اتكلمت مع سمر ووريتها انو ديل ما بنات يتصاحبو وانو ما تحتك بيهم بس ما سمعت كلامي وقالت لي البنات ديل ظريفات وما زي ما انتي فاكراهم وكدا.. المهم يوم كدا عملو فيني مقلب ما حنساهو عمري كلو.. شهد : اها عملو شنو؟.. كان في استاذ واحد بس في المكتب وانا عندي كراس مشيت عشان اصححو وماف ااي بت في المكتب غيري يلا فجأة في زول قفل باب المكتب وانا والأستاذ بس الفي المكتب وبعد ما دقينا الباب كم مرة الخالة فتحت لينا الباب ولقيت نص المدرسة واقفة وبتعاين فينا ب نظرات غريبة وفي البضحكو كمان والصدمة اني لقيت سمر تبع البضحكو ديل وجات قالت لي انا القفلت الباب وكنت بهظر معاك.. طوالي اديتها كف وبعد رجعت البيت حكيت الحصل ل ابوي وقلت ليهو يحولني من المدرسة.. شهد : معقولة سمر اتغيرت عليك فجأة كدا؟.. وعد : سمر دي ما عندها شخصية بس وبتتأثر بالمعاها.. عشان كدا عايزة اقول ليك خلي عندك شخصية قوية وادي ااي زول على قدر مكانتو لا ترفعي شديد لا توطي شديد وبس.. شهد : ان شاء الله.. يتبع
