شادية : حسي دي اتصل ل اختك ووريها الله كم.. قايلين نفسهم منو كمان هي وبتها القبيحة دي عشان يرفضوا ولدي.. علي : ماف داعي للمشاكل خلاص الموضوع انتهى.. شادية : لا ما انتهى وحسي دي اتصل عليها.. يلا اتصل وقول ليها تاني انا لا اخوك لا بعرفك وخليهم يلقوا عكاز غيرك يتسندو عليه.. يا خسارة على العشرة يا خسارة!!.. "علي اتصل تاني ل حنان"
حنان : مش قلت ليك الموضوع دا ما انتهى وحتشوفي.. ريان : دا خالي المتصل؟.. حنان : ااي خالك.. الله يستر.. "حنان ردت".. حنان : ااي ي اخوي.. علي : اسمعي هنا.. م تقولي لي اخوي دي تاني لاني لا اخوك لا بعرفك وتاني قروشي ومساعدتي ليكم حتشموهم قدحة ورجلي دي ما حتعتب باب بيتكم دا تاني.. حنان : ليه كدا يا علي.. ليه الكلام القاسي دا كلو!!!.. علي : عشان عاملتك بالمثل.. "وطق قفل الخط تاني في وش حنان".. "حنان وشها حمر وبقت بتبكي.. ريان مشت جابت ليها موية وجات".. ريان : استهدي بالله ي أمي مالك الحاصل شنو.. خالي قال ليك شنو.. "حنان حكت ل ريان كلام علي".. ريان : أنا متأكدة انو دا ما كلامو.. حنان : كيف يعني ما كلامو.. ريان : دا كلام مرتو الحربوية دي.. اكيد هي الملت ليهو راسو وحرضتو علينا.. حنان : كيف لكن.. كيف يهون عليهو الدم والعشرة البيناتنا بالبساطة دي!!
"فجأة خالد جا داخل وزهجان شديد..ومشى قعد جمب رجلين امو وعيونو محمرة ومدمعة".. حنان : في شنو ي ولدي خير ان شاء الله.. انت رجعت تاني تشرب ولا مالها عيونك محمرة كدا؟؟..خالد : ياريت يا أمي.. ياريت لو شارب حاجة عشان ما أوعى بالحاصل دا.. ليه كدا.. ليه الدنيا دي قاسية كدا يا أمي.. حنان : الحاصل شنو ي ولدي اتكلم.. ما تكون عملت حادث بالعربية!!.. خالد : ياتو عربية يا أمي.. العربية راحت خلاص.. حنان : راحت؟؟.. ريان : كيف يعني راحت.. خالد : علي خالي اتصل علي وسمعني كلام مسح كرامتي بالأرض وقال لي أسلمو مفتاح العربية لأنها حقتو وبقروشو وقال لي قول ل أمك رجعي القروش الأداها ليك عشان حاجات خطوبتي.. حنان : لالا مستحيل علي يعمل كدا.. مستحيل يصل للدرجة دي مستحيل.. خالد : الناس بقت قاسية شديد ي امي.. ريان : صدقوني دا كلو من راس شادية دي.. ما عارفة ل متين خالي دا حيسمع كلام مرتو كدا وما عندو ااي كلمة عليها.. حنان : حسبي الله ونعم الوكيل.. حسبي الله ونعم الوكيل.. خالد : حياتي كلها كانت ماشة بالعربية دي.. القى شغل وين تاني ي أمي.. حنان : الله في ي ولدي وبتتحلى بإذن الله.. امشي حسي كلم منى انو الخطوبة حتتأجل شوية مسافة ما تلقى شغل وتجهز حالك.. خالد : طيب تمام ماشي اكلمها.. حنان : قبل دا امشي رجع القروش دي ل خالك.. خالد : ح أرميها ليهو في وشو.. حنان : اوعك ي خالد ثم اوعك.. ما ناقصين مشاكل نحن.. وغير كدا عايز مرة خالك تشمت فيني وتقول لي ما ربيتي صح مش؟.. خالد : لالا خلاص.. "بعد خالد مشى حنان اتصلت على علي".. علي : خير.. حنان : خالد حسي جايب ليك القروش.. كدي تعال هنا.. انت نسيت لمن كنت تايه في الشوارع وبتشرب السم دا ولمن ابو خالد وريان شغلك معاهو ورتب ليك حياتك؟.. حبيت ازكرك بس ومع السلامة ياااا.. يا ولد أمي.. "علي العبرة خنقتو وما عرف يقول شنو.. والمرة دي حنان القفلت الخط في وش علي "
"خالد اتصل على منى وقال ليها يتقابلو عشان دايرها في موضوع مهم.. بعد ما اتقابلو وقعدو شوية كدا خالد بدأ يتكلم وحكى ليها الحصل".. منى : اها وحتعمل شنو في المصيبة دي كمان.. خالد : ب صراحة كدا الخطوبة دي لازم تتأجل لحدي ما أرتب حالي.. منى : ما جادي طبعا ي خالد.. انت ليك خمسة سنين بتأجل في الخطوبة دي.. خمسة سنين ي خالد!!!... اسمع هنا انا ما لعبة في يدك تمام؟.. وخلاص ما حأقدر انتظر اكتر من كدا لانو مصايبك دي كتيرة وكل مرة من بلوة ل بلوة أكبر.. انا رضيت بيك وانت بتسكر.. عايزني أرضى بيك وانت عاطل وما عندك شغل كمان؟!..ملبسني الخاتم التقليد دا وكل مرة بتخليني اتعشم واحلم وتاني تجي تبوظ علي ااي حاجة.. انا خلاص ما حأقدر اكمل معاك تاني ي خالد.. خالد : منى دا شنو الكلام البتقولي فيهو دا.. انا ذنبي شنو لو الظروف صعبة والدنيا قاسية معاي وكل الأبواب مقفولة في وشي.. منى : وانا ذنبي شنو عشان انتظر وانتظر وانتظر احلام ما حتتحقق اصلا بالطريقة دي.. "منى قامت وقلعت الخاتم وختتو قصاد خالد ومشت"
"خالد رجع البيت سكران وأول ما دخل لقى امو منتظراهو".. حنان : تاني يا خالد؟.. تاني تخلف ب وعدك لي وترجع تشرب!!.. خالد وهو بغني وبضحك وبدور : منى خلتني.. منى خلتني.. "حنان أدتو كف وجابت جك موية وكبتو فيهو وطردتو من البيت..خالد صحصح وبقى بدق الباب وبنادي ل أمو".. خالد : ي أمي معليش والله.. سامحيني ي أمي.. آخر مرة والله سامحيني. افتحي الباب يا أمي.." حنان من ورا الباب" : الاولاد الزيك مكانهم الشارع بس.. خالد : معليش ي أمي حقك علي.. والله اعمل ليك ااي حاجة عايزاها بس افتحي الباب عليك الله.." حنان فتحت الباب وقالت ليهو" : ااي حاجة؟؟.. خالد : ااي والله ااي حاجة بس سامحيني وما تزعلي مني "حنان دخلت خالد وقفلت الباب وقالت ليهو.. يتبع
