حسام : اشمعنا حسي رجعتي تقولي كلامك دا.. أكيد عشان نجود نزلت جامعة مش؟.. نهى : ااي ي حسام لكن انا ما غرت من نجود انا بغرت ونفسي ارجع ابني نفسي من أول وجديد.. حسام : عايني اقفلي الموضوع دا خلاص لاني ما حأغير رأيي.. " حسام نزل ولقى نجود تحت وقال ليها" : امشي شوفي اختك دي وخليها تعقل ي نجود.. نجود : نهى؟.. ليه مالها؟؟.. حسام : امشي شوفيها وبتعرفي
"نجود طلعت ولمن دخلت غرفة نهى لقتها بتبكي بس اول ما نهى شافتها مسحت دموعها سريع"
نهى : مالك ي نجود.. عايزة حاجة؟.. نجود : انتي المالك ي نهى ليه قاعدة تبكي.. نهى وهي بتضحك : ابكي؟.. لالا م قاعدة ابكي.. نجود : حسام زعلك ولا في شنو ي نهى اتكلمي.. نهى وهي بتبكي : زهجت من حياتي دي ي نجود.. اليوم كلو يا أطبخ يا انضف يا اغسل يا أكوي..عايزة ارجع واشتغل على نفسي وأكمل قرايتي بس حسام ما عايز يرضى!.. نجود : فهمتك ي نهى بس البكا ما حل وما حيغير حاجة انتي لازم تعملي خطوة جادة.. نهى : أعمل شنو طيب؟.. نجود : صح انو حرام تعصي راجلك بس برضو انتي مرتو وزي ما هو عندو حقوق عليك انتي زاتك عندك حقوق عليهو.. وانا اكيد ما حأقول ليك ما تسمعي كلام راجلك بس انتي حاولي ألقي طريقة تخليك تقدري تقنعيهو ويفهمك.. نهى : كل ما افتح معاهو الموضوع دا بقفلو وبخليني ابكي ويمشي.. نجود : طيب هو مشكلتو شنو بالضبط مع الموضوع دا؟ .. نهى : بقول لي صاحب بالين كضاب وانتي ما حتقدري تخلي بالك على الجامعة والبيت في نفس الوقت وما حتهتمي بي وبأولادك.. نجود : بس كدا تمام.. عشان نقدر نحل المشكلة نحن لازم نفهمها في الأول وكدا نحن فهمنا سبب المشكلة بس خلاص انتي كل العليك انك تقنعيهو انك ما حتقصري في بيتك نهاائي.. نهى : طيب بحاول ان شاء الله.. نجود : ان شاء الله
"نهى حضنت نجود وقالت ليها" : معليش يا نجود انا عارفة اني غلطت في حقك كتير وان شاء الله تسامحيني.. نجود : انتي اختي الكبيرة ي نهى وفوق راسي ولو احتجتيني في ااي وقت حتلقيني جمبك ومهما يحصل بيناتنا نحن أخوات في النهاية و دمنا واحد ومن بطن واحدة.. نهى : تسلمي ي اختي.. نجود : الله يسلمك..
حسام : ي نهى وينو الغدا.. "نهى جابت الغدا وختتو ومشت"
حسام : انتي ما عايزة تاكلي مالك.. نهى : ما جعانة "ومشت وقفلت عليها باب الغرفة".. عمر : ماما ليه زعلانة؟.. حسام : لالا ماف شي بس صحبتها ماتت عشان كدا كانت بتبكي.. عمر : انا ماشي اشوفها.. حسام : اقعد هنا ي ولد وكمل أكلك دا.. عمر : طيب.. حسام : ي عمرو أكل كويس وما تدفق المكرونة دي كدا.. عمرو : انا بعرف آكل المكرونة براي.. ماما البتأكلني.. حسام : لالا اتعلم.. ولد عمرو 7 سنين ويأكلوهو؟.. أكل براحة بس.. عمرو : طيب " بعد الغدا انتهى حسام نادى ل نهى عشان تغسل العدة.. قامت جات وغسلتها سريع ورجعت غرفتها.. لمن حسام دخل لقاها راقدة ومتغطية"
حسام : ما ناوية تبطلي الدراما دي؟.. "نهى ما ردت".. حسام : وين لسانك الطويل الليلة؟.. انا قاعد اتكلم معاك ي نهى.. نهى : ماف شي ي حسام خليني عايزة انوم ممكن؟.. حسام : نومي نومي
" نهى فضلت على الحالة دي اكتر من اسبوع "
حسام : في شنو ي نهى اتكلمي قولي العايزاهو بس ما تسكتي كدا.. نهى : أنا قلت العايزاهو بس ما اشتغلت بي.. حسام : موضوع القراية؟.. "نهى ما ردت".. حسام : أكيد موضوع القراية.. انا وريتك انك ما حتقدري تخلي بالك على القراية والبيت سوا وأظن كلامي واضح ومفهوم.. نهى : انت ليه متأكد كدا؟.. انت ما أديتني فرصة اساسا عشان أحاول ولو على الاولاد اصلا هم اغلب الوقت بكونو تحت مع أمك وامك بتخلي بالها عليهم كويس.. "ونهى بقت بتبكي..حسام بعد مسافة قال" : خلاص ما تبكي ي نهى.. عايني انا حأديك فرصة وبنشوف البحصل.. "نهى ما صدقت وطوالي قامت وقالت" : بالجد؟؟؟؟.. حسام : ااي بالجد وقومي غسلي وشك ما بحب اشوفك كدا.. نهى : شكرا ي حسام.. حسام : العفو.. يلا قومي غسلي وشك.. نهى : طيب
" نهى نزلت الجامعة ولقت صعوبة في ترتيب أمورها في الأول بس مع الزمن قدرت ترتب أمورها"
"وقفة"
الرسول صلى الله عليه وسلم قال : رفقاً بالقوارير.. و المرأة عظيمة لأنها أمك القال عنها صلى الله عليه وسلم : أمك ثم أمك ثم أمك..ولأنها اختك وبتك القال عنهم صلى الله عليه وسلم : مَن كان له ثلاثُ بناتٍ أو ثلاثُ أخَوات، أو ابنتان أو أُختان، فأحسَن صُحبتَهنَّ واتَّقى اللهَ فيهنَّ َفلهُ الجنَّةَ»... ولأنها زوجتك القال عنها صلى الله عليه وسلم : واستوصوا بالنساء خيرا فإنما هن عوان عندكم : وربنا لمن أداك القوة ما اداك ليها عشان تتحكم فيها.. بالعكس هو أداها ليك عشان تقدر تحميها وتكون ليها سند وضهر💜.. يتبع
