"بعد خال علي وولدو فاتو حنان مشت ل ريان واتكلمت معاها"
حنان : ي ريان عايزاك في موضوع.. ريان : اتفضلي قولي ي أمي.. حنان : مهند دا طلب يدك وعايز يعرسك.. ريان : مهند منو؟.. حنان : مهند ود خالك علي ي ريان.. عندنا كم مهند نحن.. ريان : مهند دا جادي في حياتو عليك الله 😂؟.. حنان : الموضوع جادي ي ريان وانا عايزاك تستخيري وتفكري وتوريني رأيك.. ريان : ي أمي بدون ما استخير انا ما عايزة أعرس حسي ولا مفكرة في الموضوع دا نهائي وانا لسسة صغيرة على المسؤولية دي وقدامي مستقبل عايزة اركز فيهو وبعدين ي أمي مهند دا أكبر من اخوي خالد بكتير يعني فرق العمر بيناتنا كتير واكيد انا ما البت المناسبة ليهو وربنا يرزقو بت الحلال.. حنان : ي بتي.. عارفة خالك دا كيف وقف معانا كتير وساعدنا كتير بعد فوتة أبوك الله يرحمو وانا ما بقدر أرفض ليهو طلب والموضوع دا حساس.. ريان : قصدك شنو؟.. حنان : قصدي تفكري في الموضوع دا من كم جانب.. ريان : معليش ي أمي الموضوع دا يتقفل بس لانو بالجد مستحيل أوافق.. حنان : لا حتوافقي ي ريان.. ريان : حتغصبوني اعرسو ي أمي؟؟.. حنان : قلت ليك استخيري وفكري كويس.. ريان : أنا ما حأغير رأيي ابدا لانو دا موضوع كبير علي وانا وراي مستقبل عايزة أعيشو.. حنان : خلاص تمام انا حأديك تلاتة أيام تفكري فيهم كويس ووريني جوابك الأخير.. ريان : يحصل خير.. حنان : ان شاء الله
"اول ما حنان مشت من جمب ريان ريان اتصلت مكالمة جماعية مع أبرار ونجود وحكت ليهم الحصل"
ابرار : ايووووي الف مبروك ي اللخت اخيرا لقيتي الحيفك ليك بورتك دي وتريحينا 💃.. نجود : اها العرس متين عشان نجهز الفساتين 💃.. ريان : ما جادين طبعا.. غلطانة انا البحكي ليكم همومي.. أبرار : روقي روقي.. نجود : معليش بنهظر معاك بس والله.. ريان : الموضوع دا جادي شديد وانا بالجد خايفة نهايتي تكون زيي زي ااي وحدة أهلها غصبوها على العرس وفي النهاية رجعت بيت أهلها ب شافع ولا شافعين ووشها مضروب وحالتها بالبلا.. أبرار : دي شنو السلبية الانتي فيها دي ي بت.. أكيد ما حيحصل كدا.. نجود : ااي ي ريان خليك إيجابية ياخ وخلي الأفكار السلبية دي.. ريان وهي بتبكي : انا بالجد خايفة ي بنات.. أبرار : م تخافي ي بت ما حيحصل الا الخير ان شاء الله.. نجود : نحن معاك م تخافي.. أبرار : وحتى لو حددو يوم العرس عادي يعني بجي بيتكم وبخطفك بس.. ريان : المسلسلات الهندية دي لحست ليك مخك كلو 😂.. أبرار : خليتهم خلاص انا.. الناس دي وهمية شديد ياخ 😂.. نجود : يادوب عرفتي يعني 😂
"في اليوم التاني علي اتصل على حنان"
علي : اها ي حنان بشرينا ريان قالت شنو.. حنان : والله لسسة م ادتني جواب نهائي ي اخوي.. قالت عايزة تستخير.. علي : ورينا آخر كلام ليها بعد توريك رأيها.. حنان : حاضر ي اخوي
"بعد تلاتة ايام.. حنان مشت ل ريان في غرفتها"
حنان : ي ريان اها خلاص فكرتي في موضوع ود خالك؟.. ريان : ااي ي أمي فكرت وقررت.. حنان : اها قولي رأيك ان شاء الله خير.. ريان : رأيي ما اتغير ي أمي.. معليش بس ما حأقدر أقبل طلبو.. حنان : دا شنو الكلام دا ي بت!.. حسي يعني اقول شنو ل خالك ؟!!.. ريان : قولي ليهو بتي رفضت ولدك وخيرها في غيرها بس بكل بساطة.. حنان : انتي ما قادرة تفهمي انو الموضوع دا حساس شديد.. ريان : يعني عايزاني اوافق على زول أكبر مني ب 15 سنة وانا يادوب دخلت الجامعة!!.. حنان : خلاص انا ح أوري خالك رأيك وان شاء الله الموضوع يتقفل على خير.. ريان : إن شاء الله
" في نفس اللحظة دي علي اتصل على حنان"
حنان : يهندا خالك قاعد يتصل.. ريان : ارح ردي ردي وانهوا الموضوع دا.. حنان : الله يستر بس.. "حنان ردت".. حنان : السلام عليكم.. علي : وعليكم السلام كيفكم ان شاء الله بخير.. حنان : كلنا بخير الحمد لله وانتو كيفكم.. علي : كلنا بخير الحمد لله والله.. اها بشرينا ريان قالت شنو.. حنان : والله ي اخوي ب صراحة ريان قالت استخارت وما ارتاحت للموضوع و مهند بستاهل الخير والله وان شاء الله ربنا يرزقو بت الحلال.. علي ان شاء الله "وطق قفل الخط".. ريان : قال شنو في الثانية دي بسم الله.. حنان : قال ان شاء الله وقفل الخط طوالي.. ريان : الحمد لله الموضوع انتهى على خير.. حنان : ما اظن الموضوع دا انتهى كدا خلاص.. ريان : كيف يعني؟..حنان : حتشوفي
"في بيت علي".. شادية (مرة علي) مالو وشك قلب كدا.. الجماعة قالو ليك شنو.. علي : ريان رفضت.. شادية : سجم خشمي.. البخليها ترفض ولدي شنو عليك الله.. ناس ناكرة جميل بالجد.. نسو لمن ابوهم دا هجرهم وانت وقفت جمبهم وشغال تصرف عليهم سااييي كأنو ديل أولادك.. شفت شفت مش قلت ليك خلي الكرم الزايد لانو اختك دي انا بعرفها وعارفة انها ما بتراعي لل عشرة.. بالجد صدق القال الحسنة في المنعول زي الشرا في القندول😒!!.. يتبع
