"عرس خالد اخو ريان اتحدد"
ريان : الف مبروك ي اخوي.. خالد : الله يبارك فيك.. حنان : صدقني بعد تعرس حتبوس راسي كل يوم على اختياري.. خالد : أنا لسسة ما قادر استوعب اني حأعرس وحدة ما حصل شفتها غير في الصور.. ريان : والصور عجبتك ولا ما عجبتك 😉.. خالد وهو مبتسم : عجبتني ااي بس برضو.. حنان : لا برضو لا غيرو ان شاء الله بعد تعقد وتعرس حتعرفو بعض وحتحبو بعض كمان.. خالد : نفسي افهم ليه وااثقة كدا 😂.. ريان : أنا زاتي لاحظت 😂..حنان : انتو بس استنو وشوفو
" جا وقت العرس وكان احلى يوم في حياة حنان بعد ما اخيرا شافت ولدها الكبير عريس.. ومرت الأيام و خالد وسلمى رجعو من شهر العسل وسكنو مع امو حنان"
ريان : نورتي بيتك يا سلمى.. سلمى : بنورك ونور خالتي والله.. حنان : تسلمي ي بتي.. اها ان شاء الله خالد ما مقصر معاك في شي.. سلمى : حاشا والله ما مقصر.. خالد : يلا سلام ي جماعة انا ماشي اشوف اصحابي طولت منهم.." حنان جرت خالد بعيد وقالت ليهو " : أصحاب شنو الماشي ليهم وخالي مرتك؟.. خالد : حيحصل ليها شنو ي أمي اصلا انا ماشي ساعات بس وراجع.. حنان : اوعك لمن ترجع القاك شارب العفن بتاعك داك.. خالد : لالا ي أمي ما تخافي..
" بعد خالد طلع وماشي في الشارع سمع بنات بتكلمو وفي وحدة قالت للتانية انو عرس منى بعد يومين.. خالد ما قدر يستوعب مع انو من زمان قرر ينساها خلاص وزعل شديد وبعد جا راجع البيت بقى بدق الباب شديد لحدي ما حنان فتحت ليهو..خالد بقى بصفق وبكورك وبقول" : يلا يلا قومو أجهزو عشان ماشين.. حنان : ماشين وين يا خالد؟.. انت سكران ولا شنو؟؟.. خالد : ماشين عرس منى ارح ارح البسو.." حنان أدتو كف وطلعتو من البيت وهو لسسة بدق في الباب وبعيد في كلامو ".. حنان : سلمى بتي معليش وامسحيها لي في وشي.. سلمى : لالا يا خالتي ما تعتزري وانا اصلا بقيت وحدة من البيت خلاص بس ما كنت عارفة انو خالد بشرب.. حنان : كان بشرب وخلاهو وحسي رجع ليهو تاني.. سلمى : من بعد إذنك يا خالتي ممكن افتح ليهو الباب؟.. حنان : بس ي سلمى.. سلمى : عشاني ي خالتي.. حنان : طيب ي بتي " سلمى فتحت ليهو الباب ودخلتو وساقتو الحمام وفتحت الدش فيهو لحدي ما صحصح".. خالد : دا شنو انا وين الحصل شنو.. منى : ما حصل شي بس حسي استحمى وغير هدومك عشان تنوم.. خالد : طيب
"في اليوم التاني"
سلمى : منى دي منو ي خالد؟.. خالد : منى منو؟.. سلمى : أنا البسأل فيك منى دي منو.. خالد : انتي عرفتيها كيف؟.." منى حكت ليهو الحصل امبارح وقالت ليهو" : و الليل كلو بتهلوس بيها وتناديها.. خالد : عشان اكون واضح معاك دي بت جيراننا وكنت بحبها من زمان.. سلمى : كنت ولا لسسة بتحبها؟.. خالد : كنت كنت.. سلمى : طيب وانا بتحبني ولا لا؟.. " خالد سكت وما رد".. سلمى : بقولو السكات علامة الرضا بس سكاتك الحسي ما كدا ووراني الجواب.. خالد : معليش يا سلمى.. سلمى : ما تعتزر يا خالد لأنك ما غلطان وانا ما عندي مشكلة وبستناك.. عايزة منك طلب بس.. خالد : اتفضلي قولي.. سلمى : العارفاهو انو ماف زول بسكر بدون سبب وانا عايزاك كل ما تفكر مجرد تفكير انك تشرب تمنع نفسك وتجي وتحكي لي الفي قلبك كلو وانا بسمعك للنهاية.. خالد : بالجد حتسمعيني؟.. سلمى : وعد مني ليك.. خالد : حتى لو كنت حأحكي عن منى؟.. " سلمى العبرة خنقتها بس شالت نفس وقالت" : ااي حتى لو عن منى.. خالد : طيب بوعدك.. سلمى : احلف طيب.. خالد : لالا ما بحلف.. سلمى : ليه؟.. خالد : لانو بصراحة انا ما قاعد أصلي نهائي وحاسي انو ربنا ما بحبني عشان كدا ما بحب احلف لانو زول زيي إيمانو ضعيف ما مفروض يحلف.. سلمى : انت عارف مشكلتك شنو؟.. خالد : اها.. سلمى : انك عارف نفسك غلطان بس ما بتصلح اغلاطك.. العيب ما انو نغلط يا خالد.. العيب انو نغلط ونستمر في غلطنا بدون ما نسعى عشان نصلحو.. خالد : بس انا خايف ربنا ما يسامحني.. سلمى : ربنا لو ما بحبك ما كان خلاك تحس بالذنب وتانيب الضمير بالعكس كان قلبك بقى قاسي واسود وما شايف اغلاطك البتعملها وعشان ربنا غفور رحيم دايما فاتح باب توبتو لكل الناس قوم حسي صلي الصبح قبل ما الضهر يأذن.. خالد : طيب و ادعي لي ي سلمى ربنا يهديني.. سلمى : حاضر
" جا وقت الفطور وبعد ناس البيت فطرو الضهر أذن وخالد قام اول واحد وشال مصلايتو وصلى.. حنان اول ما شافتو ما قدرت تصدق المنظر وبقت بتعاين ل سلمى وتبتسم وعيونها مدمعة".. يتبع
