نمارق وهي بتبكي : ولدي أحمد ولدي وين؟! .. وائل : انتي الجابك شنو حسي امشي اطلعي برا.. أحمد : دا صوت ماما؟؟ .. نمارق : ااي انا ماما ي أحمد اطلع عشان اشوفك.. أحمد : جاية تشوفيني عشان تمشي وتخليني تاني مش؟!!.. نمارق : لالا ي ولدي ما بخليك.. ما بخليك والله بس انت اطلع.. "وفجأة أحمد فتح الباب وحضن أمو وهو ببكي" : ما تخليني تاني ي امي.. ما تخليني وتمشي ي أمي.. نمارق : والله ما حأخليك ي ولدي بس انت سامحني.. أحمد : كيف ما أسامحك وانا سامع كلمة ولدي منك لأول مرة..
" دكتورة هدى كانت بتعرف معالج إدمان شاطر وساقت أحمد ليهو واتعالج بعد كم شهر وبقى كويس "
نمارق : أنا ما عارفة أشكرك كيف ي دكتورة هدى.. هدى : العفو ولو دا واجب.. نمارق : وائل معليش ممكن اتكلم معاك دقايق.. وائل : طيب.. نمارق : أنا عارفة نفسي غلطت كتير في حقك وفي حق الاولاد و ما ح أطلب منك فرصة لاني بالجد ما بستحقها بس طالبة منك السماح والعفو.. وائل : العفو لله والرسول وانتي أم أولادي ومكانتك كبيرة وعايز أرجعك تاني.. نمارق : وهدى؟.. موافقة؟.. وائل : هي الأقنعتني أرجعك
وقفة
الأم ما هي البتلد بس.. الأم كلمة شاملة كل أنواع الحب والمحبة والمودة والرحمة.. الأم هي البتربي وتهتم وتخاف.. ولمن أقول تربي ما قصدي تأكل وتشرب وتحمي وتغسل وتكوي.. مفهوم التربية أكبر من أنو يتحصر في الخمسة حاجات دي بس.. التربية بتعني كيف تقدر تخليك تفرق بين الصح والغلط.. كيف تخليك تحس بتأنيب الضمير لمن تغلط وتصلح غلطك طوالي وما تكررو.. كيف تخليك تحترم الأكبر منك وترفق على الأصغر منك.. كيف تخليك تحافظ على صلواتك و تحببك في دينك..و تعلمك كيف تسامح كيف تحافظ على وعودك كيف تكون صادق كيف تعتمد على نفسك كيف تكون كريم.. التربية الصالحة ثمرة لشجرتين وهم الأب والأم ولو صلحت النواة صلحت الثمرة.
"ودي قصة نمارق.. ااي أم زي نمارق ممكن تفقد أولادها في ااي وقت لانو القدر ما معروف وبعد تفقدهم حتعرف نفسها غلطانة بس بعد فوات الأوان!.. وقبل الأوان ما يفوت خلوا بالكم من أولادكم لأنهم نعمة وحافظوا عليهم عشان ما يبقوا نقمة"
"في بيت نهى"
نهى : سامعة اخوك مؤيد قال عايز يعرس.. حسام : مؤيد دا شافع وبتكلم ساي.. نهى : م شافع والله.. يعني ولد وسيم واسمر وملتحي وطويل ومتخرج من الطب وبعمل في الماجستير ااي بت يتقدم ليها اكيد حتقبلو.. حسام : وسيم واسمر وملتحي؟؟؟.. رأيك شنو أطلقك وتعرسيهو مادام عاجبك كدا.. نهى : في شنو ي حسام.. حسام : ما هو يا إما انتي عايزة تعرسيهو يا عندك عروس ليهو.. نهى : ااي عندي عروس ليهو 😌.. حسام : م تكون وحدة من صحباتك الكيف كيف ديل.. نهى : هيي صحباتي مالهم لكن اصلا لالا ما من صحباتي.. حسام : اها منو.. نهى : نجود اختي.. حسام : ياا سلاام.. بت رقيقة ولونها سمح وعيونها سمحة وصوتها سمح اكيد حتعجب اخوي انا عارف زوقو.. نهى : رأيك شنو أعرسها ليك انت؟.. حسام : وحدة بوحدة والبادي أظلم😉.. نهى : كويس كويس.. حسام : بس على ما اعتقد انو اختك ما زولة عرس وعايزة تقرأ وكدا ودخلت طب كمان.. نهى : قراية شنو.. كلنا عرسنا صغار يعني هي لا أحسن مننا لا شي.. حسام : خلاص انا بكلم اخوي واشوف رأيو.. نهى : بااس كدا تمام وخلي الباقي علي 😌
"نهى مشت ل بيت امها وحكت ليها الموضوع"
نجلاء : لالا نجود دي اكتر وحدة شاطرة فيكم وانا عايزاها تبقي دكتورة وترفع راسي.. نهى : م مشكلة حسي زفيها وافرحي بيها وبعدين عادي تكمل قرايتها.. نجلاء : حسي راجلك خلاك تتمي قرايتك؟؟ وديل اخوان من بطن واحدة وفهمهم أكيد واحد.. نهى : ما اكيد.. انتي كدي فكري في الموضوع بس.. نجلاء : عارفاك نقناقة وما حتسكتي خلاص ان شاء الله ي نهى يحصل خير.. نهى : ان شاء الله
"نهى مشت وقفت جمب غرفة نجود وبقت بتسمع في كلامها مع ريان وابرار".. يتبع
