_ ما تيجي نبدل الأدوار
_ نعم يا اخويه
_ وأشوف نفسي بعين منك
_ سيف انت اتجننت ايه الي انت بتقوله ده
_ دي أغنيه ليحيي علاء انتي ملكيش في الرومانسيه ولا ايه
_ تعرف عصام صاصا
_ مين ده
_ ده مطرب بردو
_ في مطرب اسمو عصام صاصا وده بيغني ايه انشاء الله
_ مهرجانات يابااا
_ طبعا مهرجانات ، امال صاصا هيغني ايه
_ ده عالمي يا بني اش فهمك انت
_ بقي بقولك رومانسي ويحيي علاء وانتي بتقوليلي عصام صاصا اعمل فيكي ايه
_ ياعم مليش أنا في جو الرومانسيه ده بيزهقني
_ بيزهقك يا بتاعت صاصا
_ 😂😂😂
_ بحبك ، بحبك يا اسيل ، بحبك اوي ، ضحكتك بتنورلي حياتي ، كل أبواب الأمل بتتفتحلي لما بتضحكي
_ يخربيتك ، كلامك بيوترني
_ طب افتح دماغها دي ياربي ولا اعمل ايه ، هو ده رد علي كلمة بحبك
_ ياسطاا ما انت عارف ان انا كمان بتنيل علي عيني
_ تصدقي انا غلطان أن قاعد مع اشكالك ، قاعد مع واحد صاحبي أنا ، خساره فيكي الاكل الي انتي لسه طفحاه من شويه
_ كده يا سيف بقي الاكل خساره فيا
_ لا ماتبصليش وتبتسمي بعنيكي الزرقا دي علشان هضعف
_ طب يلا قوم بقي وديني الملاهي
_ ليه انشاء الله خارج مع بنت اختي ماتعقلي يا بت
_ ولااا أنا اصلا مخطوبالك علشان تحققلي امنياتي
_ امنيات مين يابت يا معفنه انتي ، ده انتي بتسمعي صاصا يا بت
_ ومالو صاصا بقي يا اخويه ، ماهو بص بقي يا ابن الناس ي......
_ بصيت يا ست الناس
_ لا ماتسبليش كده مش هتنازل عن انك توديني الملاهي
_ بشرط
_ أنا محدش يتشرط عليا ياض
_ حبيبك يتشرط هااا اقول ولا اقوم اروحك
_ ا..احم قول
_ تقوليلي بحبك يا سيف بصوت عالي
_ سيف انت اتجننت احنا في مكان عام
_ وانا مالي بقي يا اما تقولي كده يا اما مفيش ملاهي ، واه علفكره مش هوديكي اي ملاهي لا ده احنا هنروح دريم بارك
_ وحيات امك ؟!
_ وحيات امي
_ احم ، طب ما تمشيها المره دي من غير شروط
_ لا سوري بقي يا ماما هي طالبه معايا اتشرط عليكي
_ بحبك يا سيف
_ لا لا لا ايه ده ، قولت بصوت عالي
_ سيف ، الناس
_ مليش دعوه
_ بحبكككككك يا سييييييف
_ احم ، بنحب بعض بقي وكده عقبالكم ، ايوه كده شاطره
_ فرجت علينا الناس منك لله ، الناس تقول عليا ايه دلوقت
_ هو انا شاقطك أنا خطيبك في ايه
_ طب قوم يا عريس الغافله علشان نروح الملاهي بقي
_ قومي يا اختي
_ هنلعب كتير
_ والله انتي حره بقي ، نلعب كتير ونتأخر وابوكي يولع فينا احنا الاتنين
_ ياعم لسه بدري هو قال أخرنا الساعه 8 والساعه لسه 6 ونص هنلحق نتبسط
_ لا شيلي حرف النون ده من الكلمه اسمها هتلحقي تتبسطي
_ لا يا حبيبي ما انت هتلعب معايا
_ ليه صغير أنا
_ ياسطاا فرحتي ماتكلمش غير وانت بتشاركني كل حاجه
_ لا ده احنا نروح الملاهي بقي مدام بتقولي كلام حلو ونتأخر وابوكي يولع فينا عادي واهي علقه تفوت ولا حد يموت
_ انا قولت كده بردو يلا يا سيفي
_ يلا يا روح قلب سيفك
★ احنا كده ديما ، ناقر ونقير علطول ، زي توم وچيري ، بنتخانق مع بعض ، بنعاند بعض ، نعترض علي كلام بعض ، لكن مانقدرش نستغني عن بعض ، عشقي ليها ملوش حد ، هي ضوء أمل في وسط الظلام الي انا عايش فيه ، هي مصدر قوتي في الحياه ، ماينفعش يعدي يوم من غير ما نشوف بعض ونقعد نناقر في بعض ونعمل حاجات مجنونه مع بعض ، بحب عفويتها شقوتها اختلافها عن كل البنات طريقة كلامها الي بتجنني وبتموتني من الضحك ، خفة دمها الي بتخليني عاوز اقعد معاها 24 ساعه لاني بضحك من قلبي ، وهي كمان بتحبني ، بتعتبرني كل حاجه ليها ، بتشتكيلي زي ما بتتكلم مع ابوها ، بتهزر معايا زي هزارها مع اخوها ، تحكيلي اسرارها زي ما بتحكي لأختها ، تعيط قدامي زي ما بتعيط قدام صاحبتها الانتيم ، أنا بالنسبالها كل دول وهي بتقوم معايا بكل الادوار دي ، بلاقي فيها الصاحب الجدع وقت الشده ، اختي الي اضربها وأهزر معاها من غير حدود ، اخويا الي واقف جمبي في ضيقتي ، بلاقي فيها احتواء امي الي بتسمعني لما اكون مخنوق ، بلاقيها فيها كل حاجه وهي بتلاقي فيا كل حاجه ، تعبنا كتير علشان نوصل لبعض ، علشان كده منقدرش نستغني عن بعض مهما حصل ، حبنا لبعض مختلف عن اي حب ، هي عندي في كافه والدنيا كلها في كافه تاني ، هي في حته لوحدها ، وهي كمان ديما تقولي انت في قوم والعالم كله في قوم تاني ، بفرح لما بسمع منها كلمه حلوه بتقولها من قلبها ، وبكون مبسوط لما بتطلب مني اعملها حاجه نفسها فيها وبتبسط اكتر لما احققهلها .
