_ بحبها حب الناس بطلو يصدقوه
= هي مين يا ابن العبيطه
_ حبيبتي يا ماما
= والنبي اتوكس هو انت عندك قلب ده انت عيل جبله
_ انا جبله
= اه جبله مابتحسش البنات قدامك زي القمر وانت بارد زي التلج
_ يا ماما هي مش منهم
= هي مين يا روح امك
_ معرفش هي مين بس هي مش منهم علشان انا متاكد انها لما تظهر هتخطفني اول مره اشوفها هتسحرني اول ما عيني تقع عليها
= الي انت بتقوله ده في الافلام يا اخويا مفيش الكلام ده دلوقت
_ لا في إنما كل الي انا بشوفهم دول عاديين هما اه بنات واه حلوين بس هي مش منهم انا متاكد اني اول مره اشوفها هكون عارف انها هي دي الي هتجوزها وأكمل معاها حياتي
= كده هتفضل قاعد جمبي يا موكوس
_ لا هلاقيها
= في الحلم يا روح امك غور من وشي ياض
_ انا اول مره اكون انا من سنين ، انا عندي ماضي وعندها ومش مكسوفين ، معاكي بنسي انا مين
= غني يا اخويا غني تعالي قبلني ان حد بص في وشك
_ دخلت واحده شكلها غيرهم باين اوي أنها مش منهم اجمل واحده من غير مجهود لابسه عادي وشعرها مربوط
= هتروح الشغل ولا مش رايح يا اخرة صبري
_ بلبس ورايح اهو
= بقي انت مهندس انت المهندسين دول بيبقو محترمين كده وماليين مركزهم وتحس بوقار وهدوء كده في شخصيتهم
_ فرقو ايه دول عني بقي
= انت تافهه مهندس ايه مش لايق عليك خالص
_ انا تافه اخص عليكي يا ست الكل
= بقي بذمتك الي يتعامل معاك يقول عليك مهندس
_ عاوزه الصراحه
= اه
_ لا
= شوفت بقي اضحك اوي يا اخويا
_ ماما الناس العاقله دي ممله اوي
= ممله ؟!
_ اه مملين اوي إنما أنا واد فرفوش وقمر
= انت واد تافه يا قلب امك
_ الف شكر والله يا ست الكل يلا انا نازل سلاموز
= سلام يا مغلبني
نزلت وركبت عربيتي وروحت لمحمود صاحبي ووقفت تحت البيت مستنيه لحد ما نزل .
محمود : اخويا وعم العيال
يوسف : انت يالا مش هتفكك من شغل ثانوي ده انت بقالك تلت ساعه بتقولي بلبس الكوتش ونازل من ساعة ما طلعت من البيت وانا بقولك أنجز وانت بتقولي بلبس الكوتش ونازل
محمود وهو بيركب : خلاص ياعم يوسف ادينا نزلنا
يوسف : ده انت معندكش دم
محمود : هنفطر فين بقي
يوسف : هن ايه يا روح امك
محمود : هنفطر فين بقول
يوسف : شلا تطفحو يا بعيد احنا متأخرين يا حيوان
محمود : فين المشكله ها هنفطر فين انجز
يوسف : هي عربية الفول الي في الشارع الي وراكو
محمود : اه ياض يا يوسف عمك محمود عليه شوية فول طب يلا اطلع
يوسف : يلا علقه تفوت ولا حد يموت
محمود : اصلو كده كده هيزعق فيزعقلنا واحنا فاطرين بقي مش هنبقي مهزقين وجعانين كمان
يوسف : عندك حق والله يالا مابتفهمش اه بس بتقول كلام صح
محمود : انا مابفهمش
يوسف : اتفجأت ولا ايه
محمود بضحك : لا الصراحه
يوسف بضحك وهو بيتحرك بالعربيه : ايوه كده خليك صريح
وطلعت بالعربيه وروحنا فعلا نفطر وكالعاده اتاخرنا وتليفوناتنا مش مبطله رن بس كالعاده بردو احنا معندناش دم .
