_يعني معرفتيش هو هيدخل ايه
- لا يا ملك لا
_ مش قولتي صاحبتك هتعرف وتقولك
- ماعرفتش
_ اممم طب هنعرف منين دلوقت ما احنا لازم نعرف
- وهنعرف منين يعني هنروح نخبط علي باب بيتو ونقولو انت دخلت كلية ايه
_ بطلي غلاسه انا اقصد يعني نحاول نعرف بطريقه تانيه
- طريقة ايه دي بقي إن شاء الله ملناش دعوه
_ مش عارفه بس لازم نعرف والمشكله انو قافل كل حاجه اكونت الفيس والانستا وكل حاجه واخر حاجه كان منزلها بقالها فتره كبيره
- ملك احنا ملناش دعوه كل واحد حر ربنا معاه في اي كليه يدخلها وخلاص
_ يعني انتي معندكيش فضول تعرفي
- ع...عادي يعني ك...كنت عاوزه اعرف
_ لا عاوزه تعرفي وزعلانه كمان انو مكتئب وقافل كل الاكونتات بتاعتو
- و...وانا وانا هزعل ليه يعني ما كلنا زعلنا علي مجموعنا واننا جتلنا كليات مش حابينها
_ ايوه كلكو زعلتو ماقولتش حاجه بس هو في اكتئاب من ساعة النتيجه ودي حاجه مزعلاكي
- وهتزعلني ليه انتي عبيطه يا بنتي هو كان من باقية اهلي هو حر الله
_ يعني انتي مش زعلانه ومش مهتمه هو جتلو كلية ايه
- ل...لا وغيري الموضوع بقي
_ يا نور
- بقولك لا
_ طب وشك قلب ليه
- وانا وشي هيقلب ليه عادي مضايقه بسبب الي بيحصل انا اتظلمت وكان حقي ادخل الكليه الي انا بحبها
_ قولي الحمد لله بقي احنا اتفقنا إننا مش هنزعل احنا كتبنا الرغبات قولنا اي كلية هتجيلك هتثبتي نفسك فيها
- الحمد لله
_ يعني لو بقيتو مع بعض في نفس الكليه دي حاجه مش هتفرحك
- لا ماتفرحنيش يا ملك
_ لا هتفرحك
- بقولك لا انا مش عاوزه اكون انا وهو في مكان واحد
_ ليه مش انتي بتقولي مش مهتمه ومش فارق معاكي
- اه بس بردو مش عاوزه اشوفو علطول
_ لا اله الا الله
- محمد رسول واقفلي الموضوع ده بقي
_ اه كل ما تتزنقي قولي اقفلي الموضوع
- نينينينينننيني
_ تيجي ننزل بكره
- ماشي بس هنروح المكان الي انا بحبو
_ ماشي يا ستي
ومشيت ملك وانا فضلت افكر ، انا كنت ثانويه عامه ونتيجة التنسيق طلعت امبارح وجتلي كليه ماكنتش الي انا عاوزاها بس الحمد لله يمكن ربنا كاتبلي الخير في دي ، كنت عاوزه اعرف نتيجتو واعرف دخل كلية ايه ، مالك الي اعرفو من ابتدائي وفضلت اشوفو كل السنين دي صدف في الدروس والمراجعات ، انا ماقولتش اني مش مهتمه اعرف لكن بردو مفيش حاجه من ناحيتي انا عاوزه اعرف عادي اه عادي مش علشان حاجه ، هو كمان اتظلم شبهي وشبه ناس كتير السنه دي وهتجيلو كليه مش حاببها وعندي فضول رهيب اعرف الكليه الي جيت وكنت بدعي من جوايا إن تجيلو كلية فنون جميله لانو فعلا موهوب ورسام شاطر جدا علي الاقل يعمل حاجه بيحبها ، وهو مش منزل حاجه علي الاكونتات بتاعتو ، بقالو كتير مابينزلش لأن واضح انو زعلان من يوم النتيجه ا...انا انا مش مرقباه انا بس ببص عادي ، زعلت علشانو لكن زعل عادي زي ما زعلت علي اي حد اتظلم اه زعل عادي ، غمضت عيني وقولت اني هنام علشان ابطل تفكير لقيت تليفوني بيرن وكانت صاحبتي .
