_طلقني
_ ايه ؟!
_ بقولك طلقني
_ ايه الي انتي بتقوليه ده يا نور طلاق ايه
_ طلقني يا كريم
_ ليه انا عملت ايه علشان تقولي كده
_ معملتش حاجه بس انا عاوزه أطلق
_ ازاي يعني كده من الباب للطاق
_ اه طلقني
_ بردو بتقول طلقني يا بنتي ماتقوليش الكلمه دي مابحبهاش
_ طلقني يا كريم
_ ليه بس يا حبيبتي انا عملت حاجه زعلتك
_ لا معملتش حاجه وعارفه انك بتحبني وانا كمان بحبك بس طلقني
_ انتي بتقولي الكلام وعكسو ليه طب لما انتي عارفه اني بحبك وانتي كمان بحبيني عاوزاني اطلقك ليه احنا بقالنا ٣ شهور بس متجوزين ايه الي حصل
_محصلش حاجه طلقني وخلاص من غير كلام في حاجه
_انا مش فاهم في ايه
كنت واقفه بتكلم معاه وتقريبا كده ماقولتش كلمه غير كلمة طلقني الي كريم مابيكرهش حاجه في الدنيا قدها قد الكلمه دي ، احنا متجوزين بقالنا ٣ شهور بس يعني يعتبر عرسان جداد وهو بيحبني جدا وانا كمان بحبو اوي ومتجوزين عن حب وبصراحه طول الثلاث شهور كريم احن واحسن زوج في الدنيا واني اطلب طلب زي ده بعد ٣ شهور بس ف ده يعتبر جنان بس مش مهم جنان جنان انا مش هعيش في الذل ده كتير ، الموضوع مش هو ، هو مامعملش حاجه ولا بيرضي يزعلني ومابيرفضليش طلب الموضوع مامته ، مامته الي بتعمل فيا كده من اول سنه امال قدام هيحصل ايه ، انا لسه في الاول أتوجع شويه من فراقو احسن ما افضل في تعاسه طول عمري ، فضل واقف قدامي يحاول يفهم حاجه وانا علي موقفي بردو عاوزه أطلق .
_ يا نور انا مش فاهم حاجه طب اقعدي طيب يا حبيبتي نتكلم براحه
_ لا هقعد ولا هتكلم الشغاله بتلم هدومي وهتنزلي الشنط علشان همشي طلقني لو سمحت
_ طب عرفيني السبب انا مش فاهم حاجه انا عملت حاجه زعلتك طيب
_ لا الموضوع مش انت ، انت عمرك ما زعلتني وعارفه انك بتحبني بس انا مش عاوزه اعيش معاك
_ طب ليه اكيد في سبب محدش بيطلب الطلاق كده من غير سبب
_ كريم من غير دخول في تفاصيل انا طلبت طلب وياريت تنفذهولي
_ انا بحبك يا نور عاوزه تسبيني ليه
_ ابقي اسأل والدتك
_ ماما ؟! هو حصل حاجه بينك وبينها
_ ابقي اسألها انا مش عاوزه اتكلم في حاجه
_ طب استهدي بالله بس يا حبيبتي واهدي وتعالي نطلع أوضتنا ونتكلم براحه
_ لا يا كريم ولا هنتكلم ولا هدخل البيت ده تاني قولتلك ط.....
_ وحياتي عندك ماتنطقيها تاني
_ ...........
_ انا كريم يا نور حبيبك ايه مابقتيش تحبيني
_ لا بحبك يا كريم وبحبك اوي كمان
_ امال عاوزه تسبيني ليه
كان صعبان عليا كنت بموت من جوايا وانا شايفه نظرة الحزن في عينو وهو ملهوش ذنب في حاجه .
_ ها يا حبيبتي في ايه بقي عاوزه تسبيني ليه لو عملت حاجه زعلتك قوليلي يمكن انا مخدتش بالي
_ لا يا كريم معملتش حاجه انت احسن راجل في الدنيا وانا الي هتعذب لو بعدت عنك بس انا مش هقدر أكمل
_ ليه يا حبيبتي فهميني طيب وكمل وهو بيبص للشغاله الي نازله بالشنط علي السلم : ايه ده ايه الشنط دي
_ شنطتي ، حطيهم هنا يا نعمه شكرا
_ انا هتجنن هو في ايه ايه الي حصل لكل ده
_ قولتلك اسأل والدتك يمكن تفهم منها
_ اسألها ع......
_ ايه ده ايه ده ايه ده في ايه وايه الشنط دي
_ تعالي شوفي يا ماما نور عاوزه تسيب البيت
_ بسم الله مشاء الله عاوزه تسيب البيت بعد ٣ شهور الناس تقول علينا ايه معذبينك
_ ......
_ هو في ايه يا ماما بتقولي اسال مامتك هو حصل حاجه بينكو
_ هيحصل ايه بينا يا اخويا انا لا بعملها حاجه ولا بكلمها
_ امال في ايه بقي يا نور
_ صح حضرتك عندك حق يا طنط انا الي غلطانه ، قولتلك طلقني خليني امشي
_ ي...ايه يطلقك طب والله حاجه حلوه اوي لمه شنطك وواقفه قدامنا وبتقوليلو طلقني من غير ما حاجه تحصل انتي بتتلككي ولا ايه ولا هي بالمزاج ولا مزاجك تجوزي يبقي تجوزي مزاجك تطلقي يبقي تطلقي ما تشوف مراتك يا كريم بيه
_ انا واحده ظالمه وبتلكك ممكن بقي تطلقني علشان امشي
_ يا نور اهدي طيب ظالمه ايه وتلكيك ايه هو في ايه يا نور في ايه يا ماما
_ خلاص هي حره انت هتتحايل عليها سيبها تمشي
_ بالظبط اسمع كلام مامتك وسبني امشي وكلامك مع بابا مش معايا مدام مش راضي تخلصها بهدوء
_ استني بس يا نور ، اسيبها ايه بس يا ماما ايه الي انتي بتقوليه ده
_ خلاص يا روح ماما اقف اتحايل عليها زي العيال
_ اتحايل زي العيال ايه الكلام ده بس ، نور يا نور استني بس
