_ عاش
_ حبيبي ربنا يخليك ، انت مين
_ ايه
_ بقول انت مين يا شبح
_ معجب
_ نعم يا اخويه
_ ماتفهميش غلط ، اقصد معجب بلعبك يعني
_ ليه هو انا برقص ده كراتيه يا حبيبي ولا انت مابتشوفش
_ كنتي جامده النهارده
_ تسلم ، بردو انت مين
_ البطوله الاسبوع الجاي عاوزك تتمرني كويس مش هتنازل عن المركز الاول
_ اللهم طولك يا روح ياعم انت مين وعرفت منين اصلا ان البطوله الاسبوع الجاي
_ عارف عنك حاجات كتير وعارف كل مواعيدك زي ما عارف ان البطوله الاسبوع الجاي عارف انك بتتمرني ثلاث ايام في الاسبوع يوم السبت ويوم الاتنين ويوم الاربعاء بس انتي مابتجيش يوم الاتنين علشان بتكوني في الكليه وباقي الاسبوع بتكوني في الچيم ماعدا الجمعه بتخرجي فيه مع صحابك طول اليوم واخر النهار بتروحي عند جدك وبتباتي هناك للصبح
_ يخربيتك انت مراقبني ولا ايه ده انت عارف كل تحركاتي
_ اشوفك يوم الاربعاء سلام يا..يا بطلة قلبي
كنت خارجه من تمرين الكراتيه بتاعي زي كل يوم ولقيت الشخص ده جاي يكلمني اول مره اشوفو بس الغريبه انو عارف عني كل حاجه وعارف كل مواعيدي ازاي بيجي كل يوم وانا مابخدش بالي منو ، روحت وانا بالي مشغول بيه كان غريب بس كان وسيم عجبني فيه كل حاجه شكلو لون عينو تسريحه شعرو طريقة كلامو اول مره حد يلفت نظري انا طول عمري حاده جدا في الموضوع ده روحت البيت واخدت شاور ونمت وشيلت الموضوع من دماغي بس كنت مستنيه معاد التمرين علشان اشوفو هيجي ولا لا وجيه يوم التمرين وروحت ولعبت وكنت بلعب بمهاره وبعد ما خلصت كنت واقفه بشرب مايه لقيتو بيقرب مني .
_ المايه بعد المجهود هتتعبك المفروض تهدي شويه الاول وبعدين تشربي
_ انت تاني
_ وثالث ومليون
_ انت مين وماتتهربش
_ عمرو
_ اهلا ، عمرو مين بقي
_ شكلك تعبان ماتروحيش الچيم بكره
_ وانت مالك اروح ولا ماروحش هو انت ولي امري
_ البطوله قربت اجمدي كده واتمرني كويس
_ يابني انت عاوز مني ايه ومهتم اوي كده ليه
_ صابر
_ علي ايه مش فاهمه
_ علي ما تفتحي الباب
_ باب ايه انت مجنون يابني
_ انا عاشق
_ ..............
_ اتمرني كويس وماتتوتريش سلام يا جوجو
مافهمتش معظم كلامو بس كلامو شدني جدا وكان عندي فضول هو ليه مهتم بتفاصيلي كده ، روحت وفضل الموضوع شاغلني طول اليوم وبالليل لقيت رساله علي الانستجرام بتاعي " بتمنالك التوفيق ، هانت يا جوجو فاضل يوم وقلقك هيروح ماتروحيش الچيم بكره علشان يوم البطوله هيبقي طويل وسفر وبهدله بتمنالك النجاح والتوفيق تصبحي علي خير " دخلت علي الاكونت بتاعو وفضلت اقلب في صورو وفيديوهاتو مع صحابو ، وفضولي بيزيد مين ده ومهتم للدرجه دي ليه ، وفعلا تاني يوم ماروحتش الچيم ماكنتش قادره وفضلت اتمرن كويس لان البطوله كانت بكره ، خلصت التمرين وكالعاده لقيتو قاعد بيتفرج عليا .
_ كويس ، بس عاوز اقوي من كده بكره قولتلك مش هتنازل عن المركز الاول
_ ولو وصلت للمركز الاول هتقولي انت مين
_ ما انا قولتلك عمرو
_ ليه مهتم بيا كده يا عمرو ليه مهتم بكل تفاصيلي وبتيجي تتفرج عليا كل تمرين انا مش فاهمه حاجه
_ اني اكون مهتم دي حاجه تضايقك
_ مش حكاية تضايقني بس انا معرفكش ومعرفش انت بتعمل كده ليه
_ هتعرفي بس مش دلوقت
_ ورساله الانستا انت الي بعتها صح
_ حسيت انك روحتي تعبانه قولت اشجعك واديكي طاقه ايجابيه بس اول مره ماتعدنيش وماروحتيش الچيم اصلك عناديه اوي
_ م.. ماروحتش علشان كنت تعبانه مش علشان اسمع كلامك
_ عارف
_ انت غريب علفكره
_ هتوصلو اسكندريه امته بكره
_ الساعه 12 ا..ايه ده هو انا بقولك ليه اصلا
_ اشوفك هناك
