اسكريبتات بقلم اسراء محمد ❤️

اسكربت 22

انا سلمي عندي 20 سنه مخطوبه وبحب خطيبي جدا وبموت فيه كمان ، هو بالسنبالي حياتي كلها لأني وحيده مليش غير اخت واحده ولا ليا اصحاب مقربين ، هو ظروفو الماديه مش كويسه ، فضلنا سنين بنحب بعض وظروفو الماديه كانت هي الي منعاه يتقدملي فضل يشتغل شغلانه واتنين وثلاثه لحد ما جيه واتقدملي اهلي كانو رافضين في الاول لكن انا كنت صريحه جدا معاهم وقولتلهم اني بحبه وعاوزاه ومش هكون لغيرو وبعد زن كتير جدا مني ومنو اهلي وافقو وهو حاليا خطيبي ، بيشتغل كذا شغلانه وبيتعب كتير علشان يجهز الشقه الي هنتجوز فيها رغم شهادتو ومأهلو العالي لكن الحظ مكنش في صفو وماشتغلش بشهادتو لأنها كانت عاوزه واسطه مافرقش معايا وفضلت ماشيه معاه الطريق خطوه بخطوه ووعدتو اني هصبر وهستني لاني بحبه وراضيه بأي وضع معاه حتي لو كان وضع صعب وجودو معايا هو الاهم ، ناس كتير حواليا رافضين الموضوع ومنهم صحابي الي ديما يقولولي خدي الي معاه فلوس والي جاهز والي يخرجك ويجبلك دهب وهدايا لكن عمري ماسمعتلهم ديما سامعه صوت قلبي ، قلبي الي بيعشو ، الي حبو ساكن فيه ، هو الشخص الوحيد الي خلاني افتح قلبي واعرف يعني ايه الحب وحلاوة الحب ، الشخص الوحيد الي مهما عملت فيه مابيسبنيش ولا بيتخلي عني ، انسان بسيط بيحبي بجد وطيب وجدع وشهم وفيه كل الصفات الحلوه ، شخص بيبقي عاوز يجبلي حتي من السما علشان بس اكون مبسوطه ويشوف ضحكه مني ، شخص بشوف في عينو حبه ليا ، ازاي بعد كل ده اتخلي عنو علشان الفلوس هو عندي بكنوز الدنيا كلها ، رغم كتر كلام الي حواليا الا اني عمري ما بصيت لحد احسن مني عمري ما قولتلو هاتلي ده وهاتلي ده عمري ما حملتو فوق طاقتو او طلبت منو حاجه مش في مقدرتو رغم اعتراضو الشديد اني مابطلبش منو حاجه بس انا بجد مش عاوزه حاجه دي الضحكه منو كفيله تنور دنيتي ، النظره في عينو هي الي مصبراني علي كل حاجه .

كنت قاعده في البيت بملل زي كل يوم ولقيت أميرة صحبتي بتكلمني وبتقولي انها خارجه مع خطيبها وعرضت عليا اخرج انا وحسن معاها ، قفلت معاها وكلمتو ووافق وقومت البس بفرحه شديده اني هشوفو ، القاعده معاه بتنسيني الدنيا بهمومها .

حبيبه بسخريه : مش عارفه ايه الفرحه الي انتي فيها دي كأنك خارجه مع ابو هشيمه
سلمي : هو احسن مليون مره من ابو هشيمه بتاعك ده
حبيبه بسخريه : علي ايه يا اختي من كتر فلوسو بلا نيله
سلمي بصوت عالي : يا ماماااااا تعالي سكتي بنتك بدل ما اموتهالك
حبيبه : خليكي في الي انتي فيه ياختي حطي ميكاب كمان حطي وكملت بسخريه : اصل الأمير مستنيكي تحت بحصانو الابيض مش هتركبو تاكسي ب 20 جنيه ولا حاجه

طنشت كلامها وكملت لبست وحطيت ميكاب خفيف لأني بحب احط ميكاب وانا راحه اي مكان ده مش علشان وحشه لكن انا بحب الميكاب ، خلصت وفضلت قاعده مستنياه لحد مالقيتو بيرن .

سلمي بابتسامه : ايه يا حبيبي ، اه خلصت ، انت تحت ، طيب انا نزلالك حالا اهو ، سلام

قفلت معاه وخرجت بلهفه واشتياق علشان اشوفو ، بيوحشني لأني مابشوفوش كتير ، نزلت ولقيتو مستنيني قدام باب العماره اول ما شافني ابتسم وانا كمان ابتسمت بشده وقربت منو .