اسكريبتات بقلم اسراء محمد ❤️

اسكريبت 1

انا بنت اسمي ساره عندي ٢٢ سنه، مخطوبه بقالي شهرين لولد اسمو مصطفي، هو بارد ورخم وساقع بس انا بموت فيه ومقدرش استغني عنو، انا دبش شويه لا قصدي شويتين ثلاثه بس ده طبعي اعمل ايه بقي، عمري ما قلت لخطيبي اني بحبو ولا اي كلمه حلوه من الي بتقولها البنت لخطيبها، مانكرش ان طبعي صعب شويه بس انا علي مبدأي البنت ماينفعش تقول كلمه حلوه لاي ولد غير لما يكون حلالها، عندي مبادئ صعبه مش اي حد يستحملها، بس هو بيحبني ومستحملني وديما بيحسسني انو ابويا،بحس اني مسؤوله منو، بيجبلي الي انا عاوزه، بيحميني من اي حاجه، بس طبعا عمري ما اقوله انا حاسه ايه، دي مبادئي.

فون ساره بيرن

ساره : ايوه يا مصطفي
مصطفي : ايوه يا قلب مصطفي، يا عمر مصطفي
ساره بملل : عاوز ايه
مصطفي: واحد بيرن علي خطيبتو هيكون عاوز ايه
ساره: لو كنت اعرف مكنتش سألتك
مصطفي: نفسي تبطلي الدبش ده، علي العموم بتصل اطمن عليكي
ساره : الحمد لله كويسه، انت عامل اية
مصطفي: طول ما انتي كويسه انا تمام
ساره: طيب
مصطفي : ايه بتعملي اية
ساره: ولا حاجه، وانت؟!
مصطفي: بكلم القمر
ساره: مصطفي بلاش الكلام الممحون ده علشان بيجبلي حموضه
مصطفي: حموضه!!! طيب يا ستي المهم مش عاوزه تقوليلي حاجه
ساره: حاجه ايه
مصطفي: حاجه كده هموت واسمعها بقالي شهرين
ساره: لا مش عاوزه اقول ولا هقول ، واعمل حسابك مش هتسمع مني حاجه غير لما ابقي حلالك
مصطفي: براحتك، طب تيجي نخرج
ساره: اخرج معاك بصفتك مين
مصطفي : بيقولو خطيبك، مش شايفه الدبله في ايدك ولا ايه
ساره: اديك قولتها بلسانك،خطيبي يعني مش جوزي ولا اخويا ولا ابويا
مصطفي: اشمعنا دول يعني الي انا مش منهم
ساره: علشان دول الي محللي اخرج معاهم لما ابقي حلالك نبقي نخرج
مصطفي: ماشي يا ساره، انا رايح الشغل سلام
ساره: سلام، خد بالك من نفسك في رعايه الله
مصطفي: ماشي سلام
ساره: سلام

في بيت ساره بعد ما قفلت مع مصطفي

ام ساره: يابنتي ماقولتلوش يجي يتغدي معانا بكره ليه
ساره: الي عاوزه يجي يكلمه يقولوانا مش هقول حاجه
ام ساره: يا ساتر يارب انا عارفه هو مستحملك علي ايه
ساره : بيحبني بعيد عنك
ام ساره: بيحب فيكي ايه، هبلك ولا لسانك الي بينقط دبش
ساره: الإتنين يا ست الكل

ورنت ماما علي مصطفي علشان يجي يتغدي معانا، بصراحه انا كنت همووت ويجي وفرحت لما ماما قالتلي انو جاي ، بس طبعا عمري ما اقول اني فرحانه او اني عاوزه يجي ، وجيه مصطفي واتغدينا والعيلتين قاعدوا كلهم مع بعض وبعد كده قالوا اننا لازم نقعد مع بعض شويه لوحدنا، مش عارفه انا لزمتها ايه ما خلاص ماهو قعد معانا كلنا مش لازم نقعد لوحدنا، بس ماما حططني قدام الامر الواقع وقالتلنا اطلعو اقعدو في البلكونه ، طبعا اتكسفت اقولها لا لان الكل قاعد انا دبش اه بس بتكسف بردو ، كنت هموت واقول لا بس اتكسفت، مبحبش اطلع البلكونه مع حد وخصوصا مصطفي علشان ماضعفش، انا بحب كل تفاصيلو وخصوصا لما يسرح وهو واقف بيص علي الخضره والزرع ببقي هموت واقولو بحبك بصوت عالي لكن لا طبعا انا ساره وعمري ما اعمل كده، بس غصب عني طلعت معاه البلكونه