President , Our Egg Is Lost (Myanmar Translation)

Chapter 23(Unicode)

Chapter Twenty Three:လူတွေပြောကြတာတော့ ကြည့်ကောင်းတဲ့အမျိုးသမီးတွေက ဘေးဒုက္ခကပ်ဆိုးရဲ့အရင်းအမြစ်ပဲတဲ့..ဒါပေမယ့် ကျွန်တော်ထင်တာတော့ အဲ့တာက ယောကျာ်းလေးတွေအတွက်လည်း တူတူပဲ..

ဤအကြောင်းတွေးရင်းနှင့် ချန်းယွီထန်တစ်ယောက် ရုတ်တရက်ပင် ဆိုးရွားသည့်အကြံကိုတွေးမိလိုက်သည်။ ကျီရှောင်ယွီက ဒီအကြောင်းပြောနေတာ အရင်နှစ်ခရစ်စမတ်အကြိုညတုန်းကဖြစ်ခဲ့တဲ့ဟာတော့ မဖြစ်နိုင်ပါဘူးနော်ဟုတ်တယ်မလား? တစ်ခဏမျှ သူ၏နှလုံးသားလေးမှာ ကြီးမားလေးလံသည့်ကျောက်တုံးကြီးဖြင့် ခြေမွခံလိုက်ရသလိုခံစားလိုက်ရပြီး ၎င်းမှာ သည်းခံနိုင်ရန်ခက်ခဲလှပေသည်။

သူ့တွင် သိမ်မွေ့သည့်သွင်ပြင်ရှိသော်လည်း သူသည် လူကြီးလူကောင်းတစ်ယောက်မဟုတ်ခဲ့ပါပေ။ သူ၏ ဥစ္စာဓနကြွယ်ဝမှုတွေကိုရဖို့ သူသည်နည်းလမ်းပေါင်းစုံသုံးလိမ့်မည်ဖြစ်သည်။စီးပွားရေးလောကကြီးသည် စစ်မြေပြင်တစ်ခုနှင့်တူပြီး တုံးအ၍ချိုသာသည့်တစ်စုံတစ်ယောက်မှာ ဘယ်သောအခါမှ ထိုလောကထဲတွင်ထိုးဖောက်နိုင်မည်မဟုတ်ပေ။ လွန်ခဲ့သောနှစ်အနည်းငယ်က သူ့အဖေအသည်းအသန်နေမကောင်းဖြစ်သည့်အချိန်တွင် သူသည်ကတိုက်ကရိုက်ပင် ဟုန်ရှန်းကိုဆက်ခံခဲ့ရသည်။

ထိုအချိန်တုန်းက သူသည်နိုင်ငံခြားကပြန်ရောက်ကာစဖြစ်ပြီး အလွန်ငယ်ရွယ်ကာ သင့်လျော်သည့်အရည်အချင်းများမရှိခဲ့ပေ။သူအရှုပ်အထွေးများကိုမနိုင်ခဲ့ပေ။ ထို့ကြောင့်ပင် များစွာသောရည်မှန်းချက်ကြီးမားသည့် ဦးလေးကြီးများကြောင့် သူ့နေရာမှ ကန်ထုတ်ခံရလုနီးပါးပင်ဖြစ်ခဲ့ကာ တစ်ယောက်တည်းသီးသန့်ခွဲထွက်နေခဲ့သည်။အကယ်၍သူသာလုံလောက်အောင် မသန်မာခဲ့ရင် အကယ်၍သူ့ရဲ့လှည့်ကွက်တွေကသာ လုံလောက်အောင်မကောင်းခဲ့ရင် အကယ်၍သူသာရှင်သန်ခဲ့လျှင်တောင်မှ ပင်လယ်ကြီး၏တခြားတစ်ဖက်ရှိ ငှက်တွေတောင်ဥဥရန်မသွားသည့် ကျွန်းတစ်ကျွန်းပေါ်သို့ ပို့ခံလိုက်ရမည်ပင်။

ထိုသို့ဆိုလျှင်တောင်မှ အိပ်ရာထဲတွင်တစ်စုံတစ်ယောက်ကိုဖိအားပေးရလောက်သည်ထိ မလုပ်ဖူးပေ။ ဖြစ်နိုင်သည်ကတော့ ၎င်းမှာသူ၏သဘာဝအတိုင်း အေးစက်သည့်စိတ်နေစိတ်ထားကြောင့်ပင်ဖြစ်မည်။ သို့သော် သူသည် အမြဲပင် သူ၏အလုပ်ဘဝနှင့်အချစ်ရေးဘဝကိုခွဲခြားထားခဲ့ပြီး ထိုသို့သောကိစ္စများကိုလည်း အရမ်းစိတ်မဝင်စားခဲ့ပေ။ တောင့်တမှုတစ်ခုရှိလာလျှင်တောင်မှ သူသည်တစ်စုံတစ်ယောက်နှင့်ချည်နှောင်ခံလိုစိတ်မရှိဟူသည့်စည်းမျဉ်းကိုစောင့်ထိန်းခြင်းကြောင့်သူအမြဲပင် ပြတ်သားစွာဖြတ်ချထားခဲ့ပြီး ဘယ်သောအခါမှပင် ဆက်ဆံရေးတစ်ခုကိုမဖော်ဆောင်ခဲ့ပေ။ သူပြုလုပ်ခဲ့သည့် တစ်ခုတည်းသောချို့ယွင်းချက်၊ သူထိန်းချုပ်နိုင်စွမ်း ကင်းမဲ့ခဲ့ရသည့် တစ်ခုတည်းသောအချိန်ကတော့ အရင်နှစ်တုန်းက ကျီရှောင်ယွီနှင့် ရုတ်တရက်လုံးဝမမျှော်လင့်ပဲ ကြုံတွေ့ခဲ့ရခြင်းပင်ဖြစ်သည်။