فى ألمانيا و تحديدا فى قصر بيوضح الحالة المادية لسكانه ، و من شكل و عدد الحراس باين قد ايه هما ناس واصلين او خلينا نقول خطرين ، فى جناح انثوى فخم و تحديدا على سرير دائرى كبير و واسع ، كانت نايمة شبه الحوريات و شعرها الأسمر نازل على وشها الأبيض ، اتحركت بملل لما سمعت خبط الباب لكنها فضلت نايمة لحد ما الباب اتفتح و دخلت بنت فى العشرينات و قالت بالألمانية و هى واقفة قدام السرير تماماً : آنستى هيا انهضى لقد تأخر الوقت ، هيا آنستى ، انهضى
خرج صوتها الأنثوى النعسان و قالت : اتركينى قليلا بعد
الخادمة : أنستى أخبرنى سيدى أن لديك اجتماع هام اليوم و تبقت ساعة فقط علي الموعد .
لما سمعت سيرة الإجتماع اتفزعت من نومها و قامت بسرعة و على التصوير البطىء رفعت شعرها الأسود الطويل عن وشها لتكون المفاجاة لما ظهر وشها و وضحت شخصيتها و ماكنش الوش غريب ، كانت نفس الملامح البريئة لعليا العامرة.
ابتسمت وبصت للخادمة و قالت : حسناً مايا سأكون جاهزة بعد قليل أخبرى السائق ان ينتظرنى .
بعد حوالى نص ساعة نزلت وهى لابسة دريس أسود طويل و كمه مش طويل ولابسة هيلز أسمر و رافعة شعرها ديل حصان ، خرجت من الباب الداخلى للقصر و أول ما الحرس شافوها منهم اللى جرى يركب عربية الحراسة اللى بتخرج معاها و منهم واحد سبقها عشان يفتحلها باب العربية .
فى مصر و فى مشفى وليد المصرى
كانت ليان قاعدة جنب نازلى اللى نايمة و مش حاسة باللى حواليها ، كانت بتبص لنازلى و بتعيط بهدوء ولسه مخضوضة و قلبها واجعها على اللى حصل ، و بالأخص فكرة إن نازلى كان ممكن يجرالها حاجة ، أما فريد كان قاعد على الكنبة اللى فى الأوضة اللى فيها نازلى و بيتابع ليان و هو ساكت وقلبه واجعه عشانها و مش مستحمل يشوف دموعها ، لكن مفيش فى ايده حاجة بيتمنى لو ليه الحق انه يقوم و يواسيها و يضمها و يطمنها ويقولها انه معاها ، بس حتى لو ليه الحق مشهيقدر يقول الكلام ده لانه هيبقى بيكذب عليها و هو عارف انه مش هيعيش كتير .
فريد اتنهد بحزن و قال : انا هخرج عشان اشوف الدكتور
ليان قامت من جنب نازلى و مسحت دموعها و قربت منه و لكن بحفظ المسافة بينهم وقالت : أنا متشكرة جدا يا مستر فريد ، مش عارفة من غيرك كنا هنعمل ايه
فريد ابتسم بود وقال : مفيش داعى للشكر يا آنسة ليان دا وجبى و طول ما انا عايش هكون دايما موجود لو احتاجتى اى حاجة .
ليان ابتسمت بحزن ابتسامة خفيفة و بصت لنازلى و قالت : انت مش عارفة انت ساعدتنى ازاى انت انقذت أغلى شخص فى حياتى .... لاء انت انقذت حياتى، لو كانت نازلى انهاردة صابها حاجة انا مكنتش هقدر أعيش ، نازلى دى الشخص الوحيد اللى ليا ، هى أختى و صاحبتى وأمى و روحى اللى من غيرها أموت .
أنت تقرأ
الإعصار ( عشق بلا حدود )
Romanceمش بيؤمن بالحب وقافل قلبه تمامًا بسبب تجربته اللى شايف انها فشلت، هى بردو قفلت قلبها بس بتؤمن بالحب بس شايفة ان مش كل الناس هتلاقى الحب هيتقابلوا صدفة هيحاول يستغلها عشان نقطة ضعفه الوحيدة فى حياته بس هتعلمه ازاى يحب لما هى تتعلم الحب على إيده.