صدفة

#

ازيكم وحشتونى أنا عارفه إنى أتاخرت عليكم أوى المرة دى بس اعذرونى فيه حالة  كسل رهيب وانشغلت شوية أنا أسفة جدا 🥺🥺 وده إسكربت أنا فضلت اكتب فيه على يومين وأخد منى  وقت كبير فى كتابته وترتيبه أتمنى يعجبكم ملحوظة ده ملوش علاقة بالرواية ده إسكربت منفصل تماما بس أتمنى تقولوا رأيكم ويعحبكم ولو طبلوتلى هتدونى طاقة إيجابية وهكمل الرواية بقا 😂😂👀

( تصدق أنا أول مرة إحساسى يخونى كده بجد أنا متأكدة أنك بتحبنى والله متأكدة نظرتك ليا تعاملك معايا غيرتك عليا حتى زعيقك كله بيقول أنك بتحبنى فاكر أول يوم نتكلم فيها مع بعض حسيت  أنى كنت فرحانة اوى وأنت كنت مبسوط منى أو زعلان أنى كلمتك مش قادرة أحدد بس المهم إنى متأكدة أنك بتحبنى ولسه متأكدة من ده مش عارفه إزاى  قلبك طاوعك تسيبنى كده أزاى؟ 
أنت عارف  كل ما أروح المكان اللى كنت بتقعد فيه أدعى إنى أشوفك وبرضوه ما أشوفكش تصدق أنى معدش عندى ثقة فى مشاعر وإحساسى مش هقولك نفسى
أنا كنت البنت اللى الكل متأكد أنها عمرها ما هتحب تتحب بس .. انا عايزاه إجابة وعلى سؤال واحد " هو أنت بجد كنت بتحبنى ولا أنا إحساسى كذبنى بالله عليك رد  بالحقيقة عشان أقرر إذا كنت أمشى ورا  إحساسى مرة تانية  ولا هو غلط ؟"  )
كنت بكتب الإسكربت الجديد بتاعى وخلصته وعملت نشر ودى كانت أخر حتة فيه أنا قررت إنى أسيب النهاية مفتوحة على غير عادتى
" إلحقى إلحقى.. أفتحتى اللينك ده بسرعة كده  "  الرسالة دى جاتلى من نور  صاحبتى الأنتيم فتحت لقيت صفحة شاب أسمه محمد قلبت فى الصفحة لقيته بيكتب إسكربتات  وخواطر  بس أنا لفتت أنتباهى  أنه  أسكربتاته  نصها تقريبا  بتكون نفس فكرة  أسكربتات  أنا بكتبها  بس الفرق أنه بيخلى البطل والبطلة مش يكملوا مع بعض إنما الأسكربتات اللى هو كاتبها بتاعته  بيتجوزا فى الأخر عادى .
الحقيقة أنا أتضايقت جدا  اللى هو حضرتك حرامى وبدل حتى ما تأخد الأسكربت زى ما هو لاء بتغير فى نهايته بس وتحطه عندك إيه القرف ده .
أنا بقيت مش عارفه أتصرف أعمل إيه وكالعادة أى قرار بفكر فيه وقت كبير بأخد القرار الغلط !
لقيتى بكتبله على صراحة " يعنى حرامى وقولنا ماشى إنما كمان غبى ده حتى كتير "  ونمت
تانى يوم لقيت نور بعتلى رسالة " أننى غبية إزاى تعملى كده "
قومت رنيت عليها
_  عملت إيه ى بنتى.
بعصبية _ لاء معملتش حاجة خالص إدخلى صفحته كده وشوفى كاتب إيه
بفتح لقيته منزل الرسالة على الصراحة وكاتب " كلٌ يرى بعينه طبعه " أنت عبيط !!
قصدك إيه إن شاء الله أنه أنا  الحرامية والغبية طيب بقا أنت اللى بدأت ها
دخلته خاص وكتبت " أنت ى أستاذ محمد والله خسارة فيك الاسم ماعلينا حضرتك لما تبقى تسرق خليك ذكى اللى هو غير حتى فى الأحداث مش النهاية وخِلصنا ولما تبقى تسرق ابقى أسرق من واحدة محدش يعرفها ولا يعرف كتابتها مش مع واحدة  هى كان عندها  رواية أكثر  مبيعا السنة اللى فاتت وهى " صدفة "  وعندها ملايين المتابعين للرواية  على مواقع زى واتباد وغيره تبقى تعرف تسرق ازاى وأنا الحمد لله إسكربتاتى  الناس بتستنى يوم الأحد عشان تقرأها  " وعملته بلوك
حسيتنى لسه مش ارتحت ولسه هطق منه برضوه وحسه إنى لسه مش أخدت حقى كامل 
تانى يوم لقيت نور بتكلمى أننا نخرج مع بعض وفعلا خرجنا
_هتطلبى ايه ى أمنية
_ أيه ى بنتى مش بتزهقى من السؤال شاى بقرنفل
_ أنتى مملة ى بنتى قولت هتغيرى
_ سيبتلك أنتى  التغير ى ستى
_ ى بت ى نور لسه حاسه إنى مش أخدت حقى
_ ليه كفاية أوى رسالة الصراحة ، أمنية أوعى تكونى عملتى حاجة غير الرسالة بتاعت الصراحة  قالتها بشك
_ أيه ،نور
كنت لسه هفهميها بس الحمد لله الويتر جه وحط الحاجة أد أيه أنت شخص عظيم وبتجى فى وقتك وفعلا أكلنا وشربنا
وأحنا فى الطرق
_ نور أنا  عايزاه أقولك حاجه ى بنتى بصلى بدل ما أنت مركزة فى التلفون كده
_ أمنية ده أنتى  نهارك أبيض ايه العك اللى أنتى عملتيه ده؟ ايه الرسالة دى ؟
ببص على موبايلها لقيت الاستاذ محمد اخد أسكرين للرسالة وحطها على صفحته وكاتب " واضح أنه الكاتبة اللى كلنا بنحبها وانأ أولكم بحب جدا كتابتها طلعت إنسانة قليلة الذوق ومش كده وبس لاء كمان   بترمى الناس بالتهمم ،اه وأحب أقول للكاتبة المعروفة إذا كان هى كان عندها رواية السنة اللى فاتت أكتر  مبيعا فأنا عندى رواية السنة دى أكثر مبيعا برضوه والناس كذلك بتستنى يوم السبت  عشان أنزل الإسكربت بالمناسبة لو بنتكلم على  السرقة فأنا لما قلبت فى أكونت حضرتك الشخصى لقيت أنك بتنزلى نفس أفكار إسكربتنى بس بتغير للنهاية والدليل أنى بنزل قبلك يعنى بالمنطق كده أنا اللى هنزل قبلك وأنا برضوه اللى سارقك؟  "
ده أنت ابن .... صحيح أيه اللى أنا عاملته ده
_ أمنية ايه إلى عاملتيه ده من أمته وأنتى بتعملى حاجة من غير ما تأخدى رأى فيها
_ ى نور هو ده وقته أما أشوف ايه الكوراث دى .. نهار أبيض عشرة ألاف مشاركة نهار أبيض 
_ إهدى بس وأحنا هنلاقى حل  
_ حل إيه معدتش حلول خالص  .. ورينى  كده صفحته
بدأت ألاحظ أنه فعلا بينزل الاسكربتات قبلى بيوم وكأنه جوه عقلى وعارف أنا هتكلم عن أيه إزاى ده حصل ؟
دلوقتى بقيت أنا الحرامية الوحشة اللى بسرق منه أفكاره لاء وكمان بشتمه وبطعن فيه !!
روحت البيت لقيت كمية شتيمة ليا مش طبيعية ورسائل كلها بتتهمنى بالكذب وتيرند" أمنية حرامية" وكمية ناس بتشتم فيا وفى كتابتى وبيشكوكوا فيا من غير حتى ما يحاولوا يتأكدوا ولو لدقيقة مين الصح ومين الغلط وبعد ما كنت مشهورة بكتابتى  وأسكربتاتى بقيت مشهورة بأنى حرامية ويسرق أفكار الكاتب المسكين محمد !
اد إيه الناس ممكن بعد ما يخلوك فى سابع سما يخلوك فى سابع أرض حتى حبهم مش مضمون محدش كلف نفسه أنه يسألنى إيه إلى حصل كله صدق وخلاص
فضلت أكتر من شهر فى بيتى مش بخرج ولا بقابل حد غير نور إلى بتجيلى كل يوم تقعد معايا وتحاول تخلنى أفك وأنا ولا أنا هنا
ولا بقيت بفتح فيس عشان ماأسمعش ولا أشوف كلام يسم البدن
_ بت أنا لقيتك حل هيحل كل سوء الفهم ده
_ أنا مش عايزاه حلول أنا عايزاكى تسيبنى لوحدى وتبطلى تجى هنا بعد كده
_ ولا كأنى سمعت حاجة المهم فيه مذيع كلمنى دلوقتى قالى أنه عايزاك تطلعى معاه عشان تبينى إيه اللى حصل بالضبط
_ ههه وهى الناس هتصدق برضوه .. ده بعد ما كنت بالنسبالهم قدوة وبيتعلموا منى ومن كتابتى بقيت شيطانية لاء وكمان  حرامية
_ بطلى بقا التفكير ده لازم تبينى إيه الصح ومش لازم الناس تصدق المهم أنك تقولى إلى حصل وترتاحى
_ تعرفى ى نور أنت اللى فارق معايا أنه ازاى كان بينزل الإسكربتات قبلى بيوم وهو نفس الفكرة ده كأنه قاعد فى دماغى عارف أنا هكتب أيه
_ أيه .. مش مهم دلوقتى
المهم أكلم المذيع أقوله أنك موافقة ؟
_ كلميه وربنا ييسر بقا لأنى حاسه إنى  هيجرالى حاجة لو مش أتكلمت
وفعلا نور حددت معاد مع المذيع ورحت يومها البرنامج وقولت كل اللى حصل بالتفاصيل واعترفت إنى غلطت لما بعتله الرسالة دى
_ أنا حقيقى فخور بيكى ى أنسة أمنية أنك عندك الشجاعة تعترفى بغلطتك وتتأسفى عليها قدام الجميع
_ طبعا طالما غلطت لازم أعتذر ومحدش فينا مش بيغلط
_ طب أزاى كان كده أسمحلى  أستقبل فى الاستديو الكاتب الشاب محمد إمام
وفجأة طلع قدامى زى العفريت أنا أتوترت جدا وأتضايقت إنى أشوفه بعد ما كان سبب فى خراب كبير حصل فى حياتى فى الفترة الأخيرة
_ أهلا بيك ى استاذ محمد
_ أهلا بيك وأهلا بالأنسة أمنية
ابتسمت بسماجة _ أهلا
_ أنا مبسوط جدا  إنى أكون قاعد قدام الكاتبة اللى انا شخصيا بحب كتابتها جدا
_ وانا كذلك والله ى استاذ محمد  كلنا بنتعلم من الانسة أمنية
_ انا بس عايز أوضح حاجه أنه عادى يحصل سوء تفاهم بينا وأدينى فهمت وجهه نظر الانسة وخلاص كده الموضوع اتقفل
هو بمزاجك تقفله وتفتحه أما أنك حرامى لاء ومش بس كده وبجح كمان
رديت _  أنا أتمنى أنه يكون أتقفل بجد ى استاذ محمد

أول ما المذيع خلص الحلقة  أنا  هربت كالعادة  وروحت على البحر وحطيت  الهند فرى بسمع سورة مريم بصوت حسن صالح
بعد شوية لقيت نور جت قعدت جمبى
_ أزيك
_ مش كويسة أبدا ..حاسه أنى زى موظف تعب أوى فى الشغل وفى الاخر الشغل اتنسب للمدير ولا كأنه عمل حاجة 
_ معلش ربنا يعوضك والله لأنه ده تعبك وكتابتك
ابتسمت بزعل _ وانتى متأكدة أوى ليه كده ما يمكن أنا فعلا سرقت أفكاره ونسبتها لنفسى
بتسرع _ مستحيل ..قصدى يعنى أنا واثقة فيكى
_ مش مهم، سيبنى بقا أستمتع بالجو القمر ده
_ بس أنا عايزة أقولك حاجة
دى الجملة اللى أنا مستنايها من أول ما قعدت أنا عارفه أنه فيه حاجة نور مخبايها عليا انا حفظها أكتر  من نفسها
_ خير ؟
_ أنا اللى كنت ببعت الأسكربتات لمحمد هو والله قال أنه أتقدملك كتير جدا وأنتى بترفضى حتى من غير ما تقعدى معاه فهو اقترح عليا أنه يعمل كده عشان تعرفيه وتوافق حتى تشوفيه 
محستش بنفسى غير وأنا بقوم لدرجة أنى  نسيت أخد الشنطة بتاعتى وما أهتمتش بصوتها وهى بتنادى عليا ولا بعياطها
الهروب أغبى قرار ممكن تأخده بدل ما تواجهه الحياة والناس  بتهرب
فضلت أكتر من أسبوع فى البيت البيت وبس أو بالأصح السرير مش بقوم من عليه غير للصلاة وبس وبقية اليوم نايمة أنا كده لما بفرح أو بزعل أوى بنام
أنا حسيت أنى كنت غبية أوى وأنى عطيت ثقتى كلها لحد وهو مش يستاهلها تقريبا عمرى ما هثق فى أى صاحبه  تانية  أبدا بقية حياتى
عرفت بالصدفة أنه نور فى المستشفى محستش بنفسى غير وأنا بروح ليها هناك
_ حمد الله على السلامة
_ وحشتنى
اتكلمت وكأنى  مش سامعه _ أجر وعافية إن شاء الله ،عن أذنك 
_ عشان خاطرى سامحنى أنا أسفة أنا غبية وأتصرفت غلط بس بالله عليكى اوعى تروحى بيتك تقعدى على السرير
ضحكت _ ليه ما أنا المفروض أروح بيتى !!
_ أنتى فاهمة قصدى ى أمنية متستعبطيش
بزعل_ أنا ماشية
بعدها بأسبوع لقيت ماما بتقولى أنه الشخص اللى أتقدملى قبل كده يجى خمس مرات أتقدم تانى وأنا رفضته تانى
تانى يوم
كنت بصلى العشاء ولقيت ماما بتنادى عليا خرجت من الأوضة  عشان أروح ليها لقيته فى وشى أيوه هو محمد بساعته اللى علطول لابسها بضحكته اللى بتخطف قلبى
_ الرحمة بقا الرحمة أنا عمرى ما تعبت أد ما تعبت معاكى
_ انت أيه اللى جابك هنا أصلا أخرج بره
_ أمنية عيب كده محمد ضيف عندنا وهو طلب يقعد معاكى وأنا وافقت
أيوه ى جماعة متستغربوش أمى أيوه   مش لقينى على بيت جامع ولا حاجة
_ ماما لو سمحتى ده مستقبلى وأنا حرة أعمل  فيه اللى انا عايزاه
_ مهونتش عليكى كده وأنا طالع عينى فى اللف عليكى كل أما أعملك متابعة تعملى بلوك ى شيخة ده أنا عامل يجى خمس أكونتات لحد دلوقتى 
ضحكت فهو كمل_ طب أقولك حاجة أمى بتقولك  يارب تدخلى الجنة لو اتجوزتنى
مقدرتش ى جماعة أقاوم  أكتر  من كده أه أنا بحبه بس كنت مستنايه أنه يثبت الحب ده كنت فرحانة لأنه بيحاول عشانى
رأيكم بيفرق جدا 
بحبكم ♥️
"حلو الحلو بكل خصاله"
# أمنية الطحان