صدفة

الجزء الثالث والأربعين

فى بيت عمار
معاذ : أزيك ى عمار وحشانى بالله
عمار : وانت والله جدا ى معاذ عامل أيه صحيح
معاذ : الحمد لله كويس .. بس  عايز أخد رأيك فى حاجة كده
عمار : هههه وأنا قولت كده برضوه أنت مش هتجى لحد البيت إلا لو كان الموضوع شاغل بالك
معاذ : صاحبى اللى فاهمنى
عمار : طبعا مش مع بعض بقالنا أكتر  من عشر سنين.. المهم عايز تأخد رأى فى أيه ؟ 
معاذ : أنا ى سيدى شوفت واحدة وحسيت أنها مناسبة ليا وروحت أتقدمتلها
عمار : تمام جدا مبارك ى حببى
معاذ : عمااار أنت عارف أنى بضايق لما حد يقاطعنى أسمع  لما أخلص كل الكلام اللى عندى وبعدين علق ماشى
عمار : أسف،حاضر
معاذ : المهم فعلا أهلها وافقوا عليا وقعدت معاها يوم الرؤية ولقيتها كويسة وأرتحت ليها جدا  وفرحت أكتر لما لقيتها لبسه الخمار لأنها كانت لابسه طرحة عادى زى معظم البنات دلوقتى ودى كانت أكتر حاجة مضايقانى منها بس قولت مش مشكلة هبقى اتكلم معاها وأخليها تلبس الخمار حتى لو مش فى الخطوبة يبقى بعد الجواز إن شاء الله .. المهم لما روحنا عشان نجيب الشبكة أتفأجات أنه عندها أخت تؤام وهى دى اللى أنا شوفتها وأعجبت بيها وأتقدمتلها   أنا أول لما شوفتها أتصدمت وعرفت بعدين أنه اللى لابسه طرحة دى متجوزة فأنا دلوقتى مش عارف أعمل أيه حاسس أنى روحت لواحدة تانية مع العلم أنه اللى أنا خطيبها دى مناسبة ليا جدا وملتزمة وعارفه دينها حتى أجمل من أختها بس ساعات غصبن عنى بحس أنى مغصوب على الجوازة وساعات بفكر فى أختها أنا بقالى أكتر  من شهرين مش مبطل تفكير بفكر أسيب خطيبتى دى وخلاص عشان مش أفضل أفكر فى أختها وفى نفس الوقت شايف أنه خطيبتى مناسبة ليا أكتر بالرغم أنها عصبية شويتين ومترردة فى القرارات  وزعلها صعب شوية بس بتترضى بسرعة .. أنا عايز أخد رأيك أنت لو مكانى هتعمل ايه ؟
عمار : خلصت ؟
معاذ : أه قول بقا لأنه رأيك هيفرق معايا جدا جدا
عمار : طب بصى أنا عايز اسألك كذا سؤال.
معاذ : قول ى سيدى اسأل
عمار : أولا أنت أخترت أختها على أساس أيه قصدى أيه اللى حسيته مختلف فيها عشان تتقدملها يعنى؟
معاذ : عادى يعنى حسيت انها مناسبة وجميلة ويعنى مرتاح ليها يشكل عام ولبسها واسع بالرغم انها لبسه طرحة عادى ولما سألت عليها عرفت أنه أهلها كويسين ومحترمين وأصحاب دين
عمار : وكل ده موجود لسه فى خطيبتك ولا لاء ؟
معاذ : أيوه، امال أنا بقول أيه ى بنى ؟
عمار : طيب أفرض كده مامتك جبتلك عروسة وكانت مناسبة ليك،مش لازم أمك يعنى قصدى أى حد قريب منك جابلك عروسة كنت هتوافق وتتقدم ولا انت رافض المبدأ بشكل عام أنه حد هو اللى يخترلك ؟
معاذ : بصراحة عادى موافق على المبدأ وانا فعلا أتقدمت لكذا واحدة مكنتش عارفها عشان ماما وأختى لقوها مناسبة  ليا بس مكنش بيحصل نصيب مرة أنا مش أرتاح العروسة مش ترتاح شكلها مش أتقبلها كده يعنى
عمار : طب كويس جدا .. آخر حاجة طبعا أنا عارف أنه مفيش شخص كامل إلا الرسول صلى الله عليه وسلم أنت كذلك اكيد انت ناقص
معاذ: بالرغم من أنى حاسس أنها شتيمة أنى ناقص هههه بس تمام أكيد أكيد مفيش حد كامل
عمار : ده اللى كنت عايز أسمعه منك بص بقا أعتبريها أنها واحدة زيها زى أى واحدة وحاول تفصل بينها وبين أختها وحاول تنسى الموضوع ده لو انت حاسس بجد أنه خطيبتك فرصة مناسبة ليك وخصوصا انها زى ما أنت بتقول ذات دين ودى أهم حاجة المفروض تكون بتدور عليها فى شريكة حياتك والحمد لله أنها كذلك بس فيه حاجتين لفتوا أنتباهى فى كلامى
معاذ : خير يارب
عمار : أول حاجة أنك بتقول أنه خطيبتك أجمل من أختها وأكثر إلتزام منها يعنى أنت بتقارن بينهم وده غلط كبير جدا لأن كل واحدة فيهم شخصية وتفكير مختلف مش ينفع أنك تقارن بينهم عشان تشوف مين احسن بالنسبالك؛ أنك لو فضلت تدور على الاحسن عمرك ما هترتاح ولا هترضى باللى هتجوزها مهما كانت كويسة لأنه طبيعى يكون فيها عيوب وأديك قولت أنها عصبية ومترردة وده طبيعى يكون فيها عيوب، وكذلك أختها أكيد فيها عيوب بس أنت ممكن مش تكون واخد بالك منها لأنه مفيش بينك وبينها تعامل عن قريب عشان تاخد بالك
معاذ : مأخدتش بالى خالص أنى بقارن بينهم بس قصدى اقولك أنها أحسن بالنسبالى يعنى.
عمار : انا فاهم والله عشان كده بلفت أنتباهك .. تانى حاجة بقا  ودى الاهم مفيش حاجة أسمها أشوف واحدة بطرحة أروح أتقدملها وأبقى أخليها تلبس الخمار أو حتى النقاب،أنت لو عايز واحدة مختمرة أو منتقبة تتقدم لواحدة كده من الأول مش تاخد واحدة  ممكن توافق وممكن لاء أنها تغير من لبسها عشانك أو أنها حتى حابه تلبس كده ليه تدخل نفسك فى صراعات ومشاكل لحاجة مش مستاهلة وممكن تقولك طيب هلبسه وبعدين مش توافق وأنت ساعتها ممكن تجبرها ووممكن فعلا تلبس زى ما أنت عايز بس وهى كاره الزى الشرعى اللى مفروض أنه فرض عليها أصلا فاهم ؟
معاذ : أنا عمرى ما فكرت كده خالص.
عمار :ساعات كتير لما الواحد يكون برة المشكلة بيفكر أحسن بكتير.
معاذ : معاك حق
عمار : آخر حاجة هقولهلك .. أنت الوحيد اللى تقدر تقرر إذا كنت هتكمل ولا لاء مش هينفع تنفذ رأى وأنت مش مقتنع بيه  لأنه ده قرار مصيرى  لأنه ببساطة ممكن يكون المناسب ليك  مش مناسب ليا والعكس ... فأنت الوحيد اللى تشوف عيوب ومميزات الموضوع ككل ولازم تنسى أختها وتبعد نفسك عن التفكير فيها بأى شكل كان عشان مش تتعب وتتعب خطيبك معاك وربنا يرزقك بالخير ى معاذ أنت طيب وتستاهل كل خير .
معاذ : شكرا ليك ى صاحبى أنت ونعم الصاحب والله (وحضنه )
معاذ : ايوه صحيح أنت هتتجوز أمته وهتكتب كتابك أمته إن شاء الله؟
عمار : لسه والله شوية كده ربنا ييسر