نبا: كعدنه الفجر بدلنه وجانت بس بيبتي وخوالي كاعدين سلمنه عليهم وطلعنه صعدنه بالسيارة تذكرت ناسية التلفون والشاحنه بالغرفه نزلت بسرعه اجيبهم صعدت للغرفه فتحت الباب والا اشوف رعد كاعد بالغرفة
_صباح الخير
_ صباح النور
_شعندك كاعد ما تنام
_ ماجايني نوم
_النومة عزيزه نام نام
_ ليش ما تضلون اليوم
_لا شنضل كافي اشتاقيت لبيتنه وللبصرة
_تحبين البصرة
_يووووو كلش كلش
_راح نسير عليكم دائما اذا هيجي ماتحبين تسافرين
_ ايييي تسوي علي فضل ليوم الفضل والله ،يالله اجيت اخذ تلفوني وهسه رايحه
_ ديري بالج على نفسج
_ان شاء الله بيباي
_ بحفظ الله
طلعنه وصلنه للبصرة احس رجعت بيه الحياة ورجعت لحياتي المتعودة عليها تونست عدهم كلش هواي ونسيت حتى علي وكل شي
.
نورس: وصلنا للبصرة ونزلنا بالمطار نكمل الاجراءات احس كلبي هيجي يحوس يمين ويسار ماعرف شنو اريد ومادري شبيه احس نفسي تايهه ومتشتته استقبلنه فهد وعلي وميا وزينب وجانو كلش فرحانين بيه واحس فرحتهم وصلت لاعماق كلبي وصلنه لبيتنه وهمه راحو صعدت لغرفتي ماتذكرها عدل بس جانت حيل حلوه بدلت ونمت مباشرة .
.
.
علاء: عرفت ان اليوم راح يوصلون نورس واهلها بس ماحبيت اروح للمطار اريد اتجاهلها لان احس وضعها مو تمام كلت لعلي ولفهد وللبنات همه يرحون وفعلا راحو ورجعو وجان كلشي ماشي على حسب الاصول باليل امي كالت خل نروح نزورهم ونتحمد الهم بالسلامة انا رفضت وكلت الها عندي شغل كلش مهم خل مهند ياخذج او علي لكن انا ماكدر ماعدها حل الا ان توافق صار المغرب طلعت حتى لا تجلب بيه امي جنت اريد بس ابتعد عن نورس بقدر الامكان على ماترجع ذاكرتها لأن واضحه كلش زين ناسيه علاقتنا شنو هيه بالضبط .
.
شهد: مشت بينه الايام وصارت حنتي كلش تونست وجان كلبي طاير من الفرحه لان راح اخذ الشخص الي أدمنت عليه لبست قفطان مغربي اخضر وذهب وسويت حنتي باحلى قاعة واجه زيوني حناني وبدت الحفلة وجان كلشي على مايرام ماشي وطبعا جمال نبا ما يقل عن جمالي بشي جانت طالعه عروسه اسم الله عليها
.
نبا: كعدت من النوم المغرب وجسمي جان متكسر لكيت مكالمات من بنات خوالي ومسجات صديقاتي ومن شهودة ضليت كلت خل اكوم اصلي واسبح من اخلص اكعد اجاوب عليهم كملت كلشي وكعدت اجاوب شي ورا شي لحد ما شفت من ضمن المسجات بالواتساب رقم كاتبلي وصلتي ؟ ..رديت عليه
_منو ؟
_جاوبي أول
_ما اجاوب على ناس ماعرفها
_ هااا متأكدة ست نبا
_ أي متأكدة استاذ مجهول
_ وليش استاذ مو استاذة
ضجت منه كمت وحضرته وسويت عليه ابلاغ
بعدها بفترة حنة شهوده نزلنه للسوك انا وامي واشتريت فيتان اسود ومن الجوانب بي لمعه ذهبي كلش حلو ويصير لازك كلش حبيته وبيومها تونست كلش وي البنات وكلش فرحانه بشهودة
.
.
رعد: من طلعت نبا مادري ليش ذبيت حسرة على الرغم ما اعرفها عدل وما شفتها الا قليل بس بيها شي يجذب مادري شنو هوه يمكن لان بصراويه وعنيدة وماتشبهنه بشي وكل هذا فارق العمر الي بينا خيالي صار الظهر رحت للبنات لكيتهن ملتهيات بالسوالف ضليت اباوع منو تلفونها مو يمها لكيت وسن مايمها تلفونها ف اكيد بغرفتها لو على الشحن رحت دورت لكيته ضليت ادور رقم نبا حصلته اخذته ورجعته مكانه ورحت للغرفة احس كاني بايكلي بوكه لو مسويلي جريمه ضليت احوس شسوي رحت فتحت واتساب لكيت عدها واتساب شفت الصورة الي على اسمها حاطه صورتها لابسه فستان زيتوني وشامره الشال بس هيجي وشعرها طالع ووراها مراد حاط ايده على جتفها ومبتسمين انا ابتسمت بس ضجت بنفس اللحظه ليش تحط صورتها على اسمها وللكل ف كتبتلها وصلتي ؟ كعدت انتظر ردها طبيت وطلعت وهيه ماكو لحدما ورا المغرب اجاني ردها وفوكه حظر بعد ضليت اضحك ثكيلة وعفيه عليها ماتنطي مجال لاحد اول يوم تونست من ردة فعلها لكن يوم بعد يوم ضليت اضوج وانتظر تشيل الحظر عني لحد ما يأست منها .
.
.
نورس : اجت عمتي وابنها وتحمدولنا بالسلامه جنت على صفحة اجه مهند ابن عمتي كعد يمي وضل يسولف وياي
_ها ننوسه الله يساعدهم
_ ويساعدك
_شنو ضاربتها صفنه الصفنه مو الج عيني
_اكلك انت يمتى كبرت اتذكر عليك جنت صغير
_ اي اكيد اكبر ترديني اضل صغير ومصاصتي بحلكي
_ ههههه لا يابه مو هيجي بس مو لهل درجه
_هسه كومي بالسلامة ورجعي ذاكرتج وراح تعرفين يمتى كبرت وترجعلج ذكرياتنه
_ ليش انا الي ذكريات وياكم غير الي من جنه صغار
_ بس ذكريات !!! بويه شتحجين بينه زاد وملح وكيمر ومربه طبات وكلعات وحتى حلالة مشاكل صرتي
_ هههههه. تحجي صدك انت
_اي والله. خو انت وصاحبي عليوي العقول المدبرة لكل مصيبة
_ علي ؟ لو علاء ؟
_ لا يابه علاء هوه صاحبج ،علي انت وياه توم وجيري وخاصة من فصختي الخطوبه وياه وتزوج زينب كلش صارت علاقتكم رسميه
_ فصخت خطوبه !!!!! شنو جاي تخربط انت ...حجيت بصوت عالي بحيث اهلنا انتبهو انطرو بيت عمتي ينسحبون وانا مصدومه من الحجاه شنو فاصخه خطوبه شنو توم وجيري ،لليل وانا بس افكر اخذ شي اخذ ادويتي ونمت ومن بعدها ما شفت احد من بيت عمتي باستثناء فهد وميا جانو يجون بين يوم ويوم اما علاء ....اوووف يا علاء حتى ما تحمدلي بالسلامة أبدا ولا عبالك رجعت ولا شي سالت عليه كذا مرة ويكلولي عنده شغل بس ما جان الحجي هذا يدخل براسي
مر شهر على كعدتي بالبيت وقررت ارجع للدوام وكبعا اهلي مهدولي شغلة الدوام ورجعت باشرت شغلي والكل جان متعاطف وياي ومسهلين علي شغل ويساعدوني لحد ما ر جعت اكدر اشتغل بحدي طبعا اول فترة جنت اشتغل شوي شوي لكن من اخذت ايدي على الشغل ضليتا اشتغل لفتراة طويله عن الايام الماجنت بيها اداوم لان تراكم علي كلشي بيوم من الايام رجعت طبكت سيارتي كدام الباب لكيت سيارة واكفه هم كدام بيتنه استغربت المن هل سيارة نزلت للبيت طبيت للاستقبال والاكي علاء كاعد هنا حسيت كلبي يدك مادري ليش ماكدرت اسيطر عليه
.
.
علاء : قاطعت نورس لمدة شهر وما حجيت وياها ابدا ولا تحمدت الها بالسلامة وكل ما يرحون اخواني الها ما اروح وياهم واطلع وكلش ضجت من دريت ان شهد انقلت وتزوجت ببغداد هل خبر هزني من داخل بيومها مادري ليش رجلي ودتني لبيت نورس صارت ساعه 3 وربع انا طبكت ببابهم اعرف نورس ترجع ب 4 نزلت سلمت امها ضلت تعاتبني وتحجي وياي وحجتي جانت عندي شغل متراكم ضلينه نسولف لحد ما اجه صوت كعبها وهيه تمشي وانفتح الباب جنت مدنك مادري ليش ماريد اباوع الها ماريدها تشوف نظرة الحزن بعيني وهيه ماتدري شسالفة ماريد انكساري يبين على وجهي ونورس ماراح تحس بيه ولا تفهم شنو بيه. بيونها جنت محتاج نورس القديمه الي من اكون مقهور وبكلبي غصه هيه اطبطب علي وتهون علي حزني بحجيها رفعت راسي لكيتها تباوعلي بنظرات مو نظراتها القديمه نظرات كلها حنيه واشتياق احز زادت هل نظرات همي هم اجاني صوتها الي بي رجفه
نورس: علاء شلونك
علاء: هلا نوروس خيتي الحمدلله وانت
نورس: زينه الحمدلله
علاء: عساج بالخير
ام نورس : يمه اصبلج غده جوعانه تعبانه
نورس: لا ماما حبيبتي شسالفة انا مو صغيرة
ام نورس : شما تكبرين تبقين صغيرة امي انت
نورس : لا اريد هسه اكعد وي علاء ونوب اشوف اذا اكل لو لا ...امي راحت طلعت وعافتنه اجيت كعدت كدامه على الطاوله
علاء: شبيج تباوعيلي هيجي
نورس: وين جنت
علاء بنضرات استفهام : شنو يعني
نورس: آخر مره شفتك واحنه ببغداد وماحاولت تطمن علي ولا تتصل اخوانك يرحون ويجون وانت ما منك خبر شنو السالفة رجعت وكلبت وين علاء الي يجي يوكف على راسي ويمسح علية بايده لو افز على صوت قرايته للقرآن لو الي يبجي ويحجي بصوت مخنوك نورس عفية رجعي
علاء: طبيعي اسوي هيجي جنت خايف عليج وانت عندي حالج حال ميا واعز وجنت مشغول وشغلي ما يتحمل تاجيل و.. قاطعتة نورس
نورس: ما يتحمل تاجيل وما يتحمل ترفع تلفونك وتكتب مسج لو ما يتحمل تتصل ما يتحمل تكول لاي احد من اخوانك شلونها وسلم عليها
علاء : جنت اباوع الها وساكت وهيه تحجي ومعصبه وعيونها حمر مدمعه اكتفيت بالسكوت هزيت راسي ب اي واخذت سترتي وطلعن
.
نورس: ما رد علي واحس روحي احتركت من الاعصابي كد ما انا عصبيه ومقهورة على كد ماهوه بارد وما همه شي ضليت كاعده بمكاني ومن ضوجتي ضليت ابجي اول مرة هيجي يصير وياي ماتذكر قبل مقهورة لحد البجي صعدت فوك لغرفتي بدلت وسبحت ونمت كعدت ساعه 12 باليل مغثوثه كلش كمت فتحت التلفون ضليت اكلب بي بالواتساب محادثات قديمه لكيت بالارشيف محادثة علاء ماجنت منتبهه الها ضليت اقراهن جنت ضايجه شوي شوي بديت ابتسم على سوالفنه وضحكنه ضليت اقرا لحد ما حسيت على ايد ابوي تكعدني
ابو نورس : نوسه كعدي بويه
نورس بصوت ناعس : همممم بابا
الاب: بويه ساعه 10 وانت نايمه تاخرتي على شغلج
نورس بحركه سريعه : يااااا نسيت احط منبه يالله هاي هاي كمت رحت غسلت على السريع بدلت طكطكت وجهي شلون ماجان وطلعت للشغل وصلت باشرت شغلي بس بالحلة طلعت متأخر .
.
.
.
شهد: تم زواجنا على خير وجنت اسعد انسانه بالدنيا حياتي وي زيوني وشهودة زادتني سعادة خياليه وكلشي جان ماشي تمام لحد ما خلص الشهر وكلمن رجع لشغله ودوامه بدأ زيوني شوي شوي يتغير هواي يتغيب عن البيت وكله ضايج من يرجع ومن اتاخر بالكلية كلش يضوج ويشتكي من هل شي ماعرفت شلون احل المووضع وياه أبدا
.
.
زين : قدمت موعد العرس وواجت شهد ان لازم نكون مع بعض باسرع وقت جان خوفي ان اكسر بيها مررة ثانية وخصوصا من بعد ما نغم رجعت تدخل لحياتي وخلصت عدتها وتعينت بنفس المستشفى الي انا بيها بنفس اختصاصي وجودها سببلي قلق مو شلون ماجان الكل عرف موعد الحنه قرب وراح اسافر للبصرة باركولي الا هيه جانت واكفه على صفحه وتباوعلي وعيونها غركانه تجنبتها كلش وجبت شهد كدام عيني وكله حجيها يتردد ببالي وذكرياتنه وحبها الي ماريد اخسرها مرة ثانية رحت لمكتبي كعدت شوي واندك الباب
زين : تفضل
نغم: اكدر احجي وياك
زين : تفضلي دكتورة اكيد
نغم: مبروك اول شي
زين : الله يبارك بيج تسلمين
نغم : البنيه تعرفها لو غريبة
زين : لا اعرفها مني وبيه واحبها وتحبني
نغم: متأكد
زين : من شنو
نغم: تحبها
زين : ذبيت حسرة احبها كد ما وجعتها وحركت كلبها بيوم خطوبتنه اول مرة احبها كد ما حركتي كلبي ورحتي وخليتيني بحيرتي
نغم: زين لا تستجعل بس اسمعني
زين: شهد احبها ومرتي ومستحيل اعوفها لو اخونها ولو بنظرة
نغم : بتوسل ماجاي اكلك خونها زين الله يخليك بس اسمعني شوي خل افهمك
زين : جاي اسمعج احجي
نغم : والله والله والله وداعت جهالي ماجنت مرتاحه من يوم ما انغلق التلفون وانرسل الك اخر مسج وانا حياتي تحولت جحيم بجحيم ماكدرت اتاقلم كلبي انمله وجع والم وقهر وخوف وحسرة وندم وعذاب ضمير وكلش تتخيلة صار داخلي حاولت كذا مره اطلك وباي طريقه ماكدرت واهلي جانو كلش رافضين الفكره صار عندي ابني حاولت كذا مره اتخلص منه قبل لا يجي للدنيا لكن جان متمسك بالدنيا بكل قوته ماحبيت ابني تخيل ماردته لان مو من الاب الي جنت اتمناة واحلم بي ماجان منك زين افهمني حاولت اتعايش ويوم بعد يوم يزيد البعد بيني وبين زوجي مشت السنين بينه هوه تزوج علي وانا عزلت بحدي الا قبل سنه ونص رجع وهوه متغير 180 درجه تعجبت من تغيره وحاولت انا وابني نتقبلة مرة ثانيه ابني حان رافضه لان كبر وهوه مايعرف ابوه بس بالاسم والصور ماجان يحن عليه ولا يريده وخاصة لان سميته عليك جنت اتجاهل وجوده لحد ما كدر يكلب حياتنه لفعلا اسرة مترابطه وبيها ود وحنان وام واب حقيقين لابني ماجان يبعد عني ثانيه بس بوقت شغله انا ارتاحيت واضطريت استسلم للأمر الواقع ان خلاص زين الي تحبينه وتحلمين بي بعد ماكو ما موجود وماكو امل يرجع كملي حياتج وي رجلج وحاولي تحبي حبيته بس مو مثل حبي الك جان حبي اله حب تعويد لا اكثر ولا اقل مشت ايامنه حلوة لحد ما اجه اليوم الي صار الحادث وهوه راح مرة ثانيه وعافنه .
زين: جنت اسمعها واسمع نبرة صوتها الممليه حزن وكاضتها العبرة وانا داخلي اغلي ميت بقهري احبها وتحبني وانحرمت مني وانحرمت منها وحبته وكلشي وانا شفت حياتي وارتبطت بملاك وتالي الدنيا رجعت جمعتنه كلتلها شبيدي ما تكليلي الي بيني وبينج شي اكبر من سور الي بيني وبينج كلب ومشاعر وخاطر اخاف عليهن اكثر من ما اخاف على كلبي وخاطري ومشاعري الي بيني وبينج وحده حبتني من كلبها وصارت الي ولبنتي ام احتوتها وربتها وكبرتها ودرستها وانا طيبت جروحي وصارت صديقتي واختي وحبيبتي وامي وزوجتي ماكدر نغم اخاف على شهد وكلب شهد اكثر من ما اخاف على نفسي وبنتي انا عندي استعداد اكسر كلبي ومشاعري وادوس عليهن برجلي ثنينهم واشوفج ميته كدامي ولا اجرح شهد بحجايه وحده زين ماراح يكسر كلب شهد مره ثانيه لو على كطع ركبتي يا نغم .
يتبع ....
أنت تقرأ
احدهم لم يكن صدفه
Casuale• "ما كان حُبًا من النظرة الأولى بقدر ما كانت طمأنينة من الدرجة الأولى ، مثل أن ينظر المرء إلى شيء ويستريح بهِ"
