ခေါက်ရိုးကျိုးဆဲ..စာမျက်နှာ( ေခါက္ရိုးက်ိဳးဆဲ..စာမ်က္ႏွာ)[Completed]

စာမျက်နှာ-(၁၉)|Uni+Zaw|

Unicode

၁၉|.ခေါက်ရိုးကျိုးဆဲ..စာမျက်နှာ

ဒီဇင်ဘာ၂၉ရက်၊၁၉၂၉ခုနှစ်။
မြန်မာနှစ်-နတ်တော်လကွယ်(၁၄)ရက်၊၁၂၉၁ခုနှစ်။

ကြောင်ခြစ်ပိန်းရွာသို့ ပြန်လည်ရောက်ရှိကြပြီး
ဖြစ်သည်။

~~~~~~

နုထွေးက ကရင်နှစ်သစ်ကူးမတိုင်မီ သူ(မ)​၏
ရွာသို့အလည်ခဏပြန်သွားခဲ့၍ ဂန္ဓမာမြိုင်ခြံ၌
အချက်အပြုတ်တာဝန်ယူမည့်သူ,မရှိပေ။
ထို့ကြောင့် ဟင်းချက်ကျွမ်းကျင်သော ဖိုးထီက
အချက်အပြုတ်တာဝန်ယူ​၏။ငွေမောင်က ဝိုင်းကူ
ရန် တာဝန်ယူ​၏။

ကြည်သာက ဈေးသို့သွားရန် တာဝန်ယူ​၏။
မြို့အုပ်မင်းမှာကား ​ဈေးခြင်းဆွဲကာ ကြည်သာ့
အနောက်သို့လိုက်ရန် တာဝန်ယူ​၏။

တာဝန်များအား အသီးသီးခွဲယူကြမှုအပြီး၊
ကြောင်ခြစ်ပိန်းရွာ​၏ ခြစ်ပိန်း​ဈေးသို့သာ
စက်ဘီးတစ်စီးဖြင့် ထွက်လာခဲ့တော့သည်။

"ကြည်သာ..ဖြည်းဖြည်းနင်းစမ်းပါဗျာ၊
ကျုပ်မယ် ဘယ်အချိန် စက်ဘီးမှောက်မလဲဆိုပြီး ဘုရားတနေရတယ်"

"ဖြည်းဖြည်းတော့ ကျုပ်မနင်းနိုင်ပေါင်"

"ဟော တွေ့ကလား..ကိုယ့်လင်ရဲ့စကားကို သက်လျာက နားမထောင်ဘူးပဲ"

ကျွီ!ခနဲမြည်အောင် စက်ဘီးကို ဘရိတ်အုပ်ကာ
ကြည်သာက ရပ်မိလိုက်​၏။သည်မြို့အုပ်မင်းက
မထင်ရင်မထင်သလို ဤသို့ထထပြောတတ်သည်
ကို ကြည်သာက ကောင်းစွာသိ​သည်။

ယခု..စက်ဘီးကိုရပ်လိုက်လျှင် မြေပေါ်သို့
ခြေထောက်တစ်ချောင်းကိုထောက်ထားကာ ကြည်သာက သန့်မောင်ကိုပင် လှည့်ကြည့်လာသည်။

အကြည့်များက ကြောင်ခြစ်ပိန်းရွာ​၏နေရောင်
ခြည်ပျပျအောက်၌ ကြည်ရွှန်းကာတောက်နေ​၏။
ညိုဖျော့လှသော မျက်လုံးအရောင်ကလေးမှာ
လဲ့နေ​၏။

"ခင်ဗျားပါးစပ်ကိုပိတ်ထားမလား၊ကျုပ်က
ခင်ဗျားကို စက်ဘီးပေါ်ကနေ တွန်းချပစ်ရမလား
ကိုသန့်မောင်"

သန့်မောင်က လက်ဖဝါးတစ်ချပ်ဖြင့် နှုတ်ခမ်းသို့
ဖိပိတ်လိုက်ကာ ခေါင်းခါပြ​၏။ပြီးကာမှ တဟဲဟဲ
ရယ်လျက် မျက်နှာချိုသွေးလာသည်။