جميلتى

الفصل الثالث

فى فيلا السيوفى

كانت تستقبله والدته باشتياق وحب فهو ابنها الغائب منذ عام كامل لم تراه

ألفت: حمدلله على سلامتك ياحبيبى اخيرا رجعتلنا بالسلامه

قبل رأس والدته ويدها وقال
جاسر: الله يسلمك ياحبيبتى وحشتينى جدا والله

حسين: وياترى هى بس اللى وحشتك
أقبل عليه ولده بابتسامه وقال
جاسر: وانا اقدر بردو ياسيادة اللواء حضرتك الخير والبركه كلها واحشنى والله

احتضن ابنه بحنان وقال
حسين: حمدلله على سلامتك ياحضره النقيب
ومبروك الترقيه
جاسر: الله يسلمك يابابا
الله يبارك فيك دى جات بعد عذاب الترقيه دى والله
وانا اهو رجعتلكم تانى

سمع صوت شقيقه يدخل عائدا من جامعته
أدهم: جااااااسر ...حمدلله ع السلامه ياباشا ينفع الغيبه دى كلها

جاسر: اعمل ايه بس الشغل والله
أدهم: المهم انك رجعت بالسلامه نورت البيت والله

جلسوا سويا يتحدثون فيما مضى وماهو قادم

فى السكن الجامعى
جميله: وبعدين ياحنين هنعمل ايه فى البحث ده
حنين: هنعمل ايه يعنى زى ماطلبوا مننا

جميله: انتى عارفه كده مفيش اجازه هنفضل هنا عشان مش كل يوم هنسافر
حنين: عارفه بس هنعمل ايه يعنى وبعدين نحمد ربنا فى غيرنا هيسافر

جميله: خلاص احنا نحاول نبدأ من دلوقتى يعنى نعمل جدول لنفسنا اللى نقدر نخلصه دلوقتى والباقى فى اجازة نص السنه عشان ننجز

حنين: ماشى نحاول مع انى عارفه ان ده مش هيحصل عشان مفيش وقت خلاص الامتحانات قربت

جميله: بلاش احباط بقا هنحاول وخلاص
حنين: حاضر ربنا يقوينا

فى السكن الجامعى الآخر
كانت تجلس أمنيه على سريرها تقوم بمراجعة بعض المحاضرات استعدادا للامتحانات القادمه

سمعت همسا من زميلاتها بالغرفه
يتحدثن عن بعض الشباب تعرفن عليهم

احدى الفتيات: والله يابنات كان بيتحايل عليا عشان نخرج بس انا رفضت
فتاة أخرى: ليه يابنتى طيب ياريت انا يقولى نخرج اهو نغير جو بدل الملل ده

الفتاه الاولى: لا لا لا هو انا هوافق من اول مره كده لازم اتقل عليه
ثم وجهت حديثها لأمنيه قائله
ولا ايه رأيك ياأمنية

نظرت لها بتعجب وقالت
أمنية: رأيى فى إيه

الفتاة: فى اللى بنقوله يعنى انتى لو البوى فريند بتاعك طلب انه يخرج معاكى هتوافقى كده من اول مره

أمنيه: بوى فريند بتاعى ! لا والله معنديش الحمدلله

الفتاه: يابت ياأمنيه هتخبى علينا احنا هنا مع بعض عادى يعنى