جميلتى

الفصل السادس

بعد عناء استطاع عمار تهدئه والدته

عمار: الحمد لله هديتى ادينى فرصه اشرحلك ممكن

كانت تنظر لثلاثتهم بشك ولكنها قالت على مضض
زينب: اتفضل فهمنى لما اشوف هتقول ايه

عمار: البنتين دول فى كلية آثار وهنا بيعملوا بحث عشان التخرج

راحوا أجروا شقه وصاحبها نصب عليهم بعد ماخد منهم الفلوس

وجم بلغوا عندنا فى القسم ولما قبضنا عليه انكر انه يعرفهم وانتى عارفه قضايا النصب بتاخد وقت وهم مش حمل بهدله

وانا لما لقيتهم كده صعبوا عليا قولت نأجرلهم الشقه دى بس مجتش فرصه اقولك انا يدوب وصلتهم ونزلت اجيب شوية طلبات رجعت لقيتك هنا

زينب وقد اشفقت على حال الفتاتين

ياحبايبى معلش اعذرونى مكونتش اعرف بس فى داهيه الفلوس المهم انكم بخير

ولا يهمكم اى حاجه وان شاء الله تتوفقوا فى البحث بتاعكم

حنين: شكرا لحضرتك جدا واحنا آسفين على سوء الفهم اللى حصل

كانت زينب تحدث ابنها بهمس
جميله : كل بعقل امه حلاوه بكلمتين الف فيلم فى ثانيه شوفتى ياختى القمر بتاعك

حنين: ده بدل ماتشكريه اومال عاوزاه يقولها ايه واه قمر والله عسسسل

زينب: طيب يابنات انا هسيبكم ترتاحوا بس هنتغدا مع بعض دانا بحمد ربنا انى مش هتغدا لوحدى زى كل يوم

عمار: معلش ياست الكل وياستى خلاص هتغدا معاكى النهارده

زينب بمشاكسه: لا روح شغلك متقلقش البنات هنا معايا يلا روح

عمار : وليه قطع الارزاق ده يازينبو

زينب: بتقول حاجه
عمار: ها لا ولا حاجه انا ماشى لو احتجتوا حاجه كلمونى سلام

غادر عمار وتركهم
زينب: انا همشى يابنات وزى ماقولتلكم هنتغدا سوا

جميله: حاضر مش هننسى وشكرا لحضرتك

غادرت زينب لشقتها
جميله: والله شكلها ست طيبه بس دخلتها علينا كانت زفت والله

لكزتها حنين فى كتفها قائله
زفت ايه حسنى ملافظك شويه بقولك ايه مش عاوزين احراج مع الست كتر خيرهم انهم بيساعدونا خلاص

جميله: خلاص خلاص وبعدين هو انا بعمل حاجه
حنين: لااااا ابدا ظلماكى معلش

فى قسم الشرطه
كان منتظرا وصول صديقه
دخل اليه قائلا
عمار: خلاص وصلتهم وكله بقا تمام ربنا ستر
جاسر: هو حصل حاجه

قص عليه صديقه ماحدث
قهقه عاليا وقال
جاسر: ياخبر ابيض يابنى قولتلك البت دى كل مابتظهر لازم يكون معاها مصيبه عشان تصدقنى