رواية مختلفة عن باقي الروايات .. غموض .. إثارة .. تشويق
...
طلاب في إحدى الكليات توصلهم رسايل تهديد من شخض مجهول
تتشابك الأحداث بماضيهم و بحاضرهم
من هذا الشخض و شن يبي منهم ؟
وشن ح تكون ردة فعل الشخصيات ،
تابعوا الرواية
" البداية - The beginning " ...................................................................
في ليلة مطر و صقع في عز الشتي حوالي الساعة 11 كان رواد مروح من مصراته لطرابلس
اوووه! هذه الصورة لا تتبع إرشادات المحتوى الخاصة بنا. لمتابعة النشر، يرجى إزالتها أو تحميل صورة أخرى.
وصل لمنطقة القره بوللي, يوقف على البوابة اللي وقفاته وكانت هادي تقريبا سادس بوابة يوقفلها من طلعته من مصراته فحص روتيني و يتوكل
و بعد حوالي 2 كيلو متر يلقى بوابة تانية و يستغرب منها
رواد : شن البوابة هادي توا ؟
و يشك انها بوابة وهمية كانت سيارة وحدة مدرسة ع اليمين و شخصين واقفين يوقفوا.. يوصل فيهم و من دون السيارات كلهم يدرسوه ع اليمين و يجيه واحد من الروشن و المطر كانت قوية
رواد : ها تفضل في حاجة ؟ الراجل : تفضل انزل معليشي ؟ رواد : وين بننزل تشبح فيها مطر قوية الراجل : عادي انزل شوية فحص روتيني و توكل
ينزل رواد ومش عاجبه .. يبدا الراجل يفتش في السيارة يتلفت رواد ع الراجل التاني يلقاه يفوت في السيارات عادي بدون ما يوقف حد و يزيد شكه فيهم .. يرجع يتلفت للراجل اللي في السيارة و يشوفه يمد يده لتحت الكرسي هنا يجبده رواد من السيارة بقوة و يضربه بقوه على وجهه مرة و اتنين لعند ما يطيح و فجأة يلقى كلاشن على راسه من الراجل التاني يرفع رواد يديه الفوق
رواد : تمام تمام .. انتم شن تبو مني ؟ الراجل : اللي عندك هاته رواد : تمام حاضر
ويتلفتله رواد و بحركه سريعة يمسك الكلاشن وينفض الراجل منه
رواد : خليك بعيد خيرلك
يسحب رواد الكلاشن و يطلق طلقات على عجل سيارتهم باش ما يلحقوشي و يركب سيارته و يطلع بسرعة و يحذف الكلاشن متعهم من الروشن و بعد ما يمشي مسافة بسيطة يمد يده تحت الكرسي و يجبد صندوق صغير يشوفه و يرده في مكانه
رواد : كلاب ولاد الكلاب
بعد حوالي ساعة و نص
يوصل للعمارة اللي فيها شقته .. يدخل سيارته للبركيدجو اللي تحت العمارة ينزل و ينحي الطارقات منها ويحطهم في الكوفيني و يدخل لشقته و الصندوق في يده و كان مبلول من المطر أول شي داره فتح الكاصة متعه و حط الصندوق فيها و صكرها و بعدها دخل الحمام و نظم اموره
