......................................................
ما تنسوش التصويت و تعطوني رأيكم ^_^
......................................................
الحلقة 6
" تلاعب – manipulate "
كريم : نهال ؟
نهال (بخوف) : إلياس يا كريم
رواد : خيره وينه ؟
نهال : خطفوه جماعة الوادي .. شفتهم رفعوه حطوه في الكوفيني و رفعوه
كريم (بصدمة) : شنوو ؟ الكلااب ولاد ال%^*$#
و يحط يديه على راسه ..
رواد : أكيد وصلهم الفيديو .. لكن كيف مش عارف
كريم : شن الحل ؟
رواد : مش عارف مش عارف
تتوتر نهال وتخاف و الدموع في عيونها و تحس بضيقة في صدرها و بدوخة و يغمى عليها و تطيح ع الأرض ..
يقرب منها كريم و يحاول يفيقها .. و رواد يشوفلهم وهو حاير ومش عارف شن يدير !
يجيب رواد مية .. و ياخدها كريم و يصب على وجهها شوية شوية لين تفيق
يساندها من ايدها و يرفعها للكرسي تقعمز
رواد : مش وقتك بكل يا نهال
نهال : ما ادورونيش ما فيا شي يا شباب
كريم : متأكدة ؟
نهال : ايه .. غير طالعة بلا فطور و زدت توترت .. شوفوا إلياس
يشوف كريم لرواد بخوف و كأنه يستنى في رواد يدير راي لأنه هو مش عارف شن يدير
رواد : أول شي هدي روحك .. تمام ؟ استعجال ممكن يكلفنا أكثر من هكي
كريم : كان عليا انا بنمشي نهد عليهم طول
رواد : عارفك أنا .. وهذا الغلط وين
كريم : باهي شني ؟ اللي تقولي بنديره ح نديره
رواد : نكذب عليك كان نقولك نعرف شن بنديروا
كريم : بنقعدوا هكي ؟
رواد : أحمد .. نشوفوا أحمد شن قصته
نهال : بروا انتم خلي نشوف شهد قبل
كريم : باهي تمام ..
و يمشوا
.......................
شهد قاعدة تخبط ع الباب في المعمل
فجأة ينفتح الباب و تلقى قدامها عبدو
شهد : عبدو ؟ شن ادير هنا ؟
عبدو : انتي اللي شن اديري هنا .. شبحتك انتي و سجى جيتو هنا علاش ؟
شهد : الكلبة صكرت عليا الباب ومشت
عبدو : علاش خيرها عليك ..
شهد : تو نوريها انا
عبدو : هدي روحك قبل
شهد : انت اخر واحد تجي توقف عليا و تكلمني ما تعرفش روحك شن مداير ولا نسيت ؟
عبدو : ما نشوفش في روحي غالط
شهد : غير مش وقتك توا
ادور شنطتها اللي حذفتها سجى في الكناسة و تمشي للقسم بعصبية
و يلحقها عبدو
عبدو : وين ماشية ؟
يقربوا من القسم تشوف سجى واقفة ع البنات و تتلفت لعبدو و ترميله شنطتها
شهد : شد
و تمشي لسجى والشرار بيطلع من عيونها
شهد : أنا يا كلبة اديري فيا هكي ؟
أنت تقرأ
ردة فعل (رواية ليبية)
Misterio / Suspensoرواية مختلفة عن باقي الروايات .. غموض .. إثارة .. تشويق ... طلاب في إحدى الكليات توصلهم رسايل تهديد من شخض مجهول تتشابك الأحداث بماضيهم و بحاضرهم من هذا الشخض و شن يبي منهم ؟ وشن ح تكون ردة فعل الشخصيات ، تابعوا الرواية
