ردة فعل (رواية ليبية)

الحلقة 19

حلقة طويلة .. 

ما تنسوش رأيكم يهمني .. 

..............................

الحلقة 19

محاولة - Trying

يمدوا عبدو وشهد إيدهم على الماوس في نفس اللحظة و تجي إيده على يدها

يتلفتوا لبعض بتوتر و تقعد إيدها هي ع الماوس وهو شاد إيدها ..

و بحركة سريعة تسحب شهد يدها و عبدو يحاول يتصرف عادي

تاخد شهد ورقة السؤال و تقعد تقرا فيه

عبدو : شن وضعه ؟
شهد : نعم ؟
عبدو : السؤال .. صاعب ولا ساهل ؟
شهد : مش عارفة خود شوفه انت

ياخد الورقة و يشوفه

......................

..........

رواد : السلام عليكم ..

إيد وسن الفوق في اللحظة هادي و تحس ان الصوت تعرفه .. تتلفت بسرعة و تشوف و تلقاه رواد و تتفاجأ وتنصدم و تسحب إيدها بسرعة ويطيحوا معاها حكاك الحليب ع الأرض و توخر التالي من الخلعة

رواد : يا ستير بالشوية عليك ..

تشوف للدنيا الحايسة و تقيم عيونها على رواد و هي مش مصدقة

تقعد تشوفله و يشوفلها ..

رواد : ما تبيش تردي السلام ؟
وسن : اه ؟ أها .. أهلا ..
رواد : كيفك ؟
وسن : امتى .. امتى روحت ؟

يقعد رواد ساكت و يشوفلها

وسن : خيرك ؟
رواد : انتي خيرك ؟
وسن : ولا حاجة ..

تشوف وسن للأرض و تلقى الدنيا حاست و الحكاك طايحات في كل مكان

تقعد واقفة ومش عارفة شني إدير .. تثني ركابها و تاخد حكتين بإيديها الزوز

و تحطهم ع الرف و رواد يشوفلها

شوية و يدخل زبون ..

ترجع وسن قدام الكاصة و تلهى بالزبون وتشوفه شن يبي و بعد لا تكمل و يطلع الزبون

تتلفت لرواد .. تلقاه قايم الحكاك و حاطهم ع الرف

يقيم رواد اخر حكة و يحطها ع الرف .. تقرب منه وسن و يتلفتلها