ردة فعل (رواية ليبية)

الحلقة 23 ( الأخيرة )

طبعا أول شي السلام عليكم

تاني شي .. على ما قد نعتذر منكم على التأخير عارفه ما يوفيش حق الانتظار ..

لكن والله صارت معاي ظروف .. وطلعت حتى سافرت خارج البلاد ..

المهم نكرر اعتذاري منكم ..

طبعا هادي الحلقة الأخيرة .. وخدت مني وقت طويل باش كملت لأنها طويلة و ترتيب أحداثها خدي وقت ..

فـ يا ريت كل واحد يقراها يعطيني رايه حتى و لو بكلمة .. و شكرا

....

و توا قبل ما ندخلوا في الحلقة .. كتبت ملخص للراوية من بداية الأحداث لعند الحلقة اللي فاتت ..

هو ملخص لأحداث 22 حلقة ... حاولت على قد ما نقدر نتفكر الأحداث الرئيسية اللي صارت .. و انا نفضل انكم تقروه و تقروا الحلقة اللي قبلها .. باش تتذكروا الأحداث

.... الملخص :

تبدا قصتنا برواد اللي كان مروح من مصراتة لطرابلس اللي كان مروح بشي مهم يخص بوه و هلبا ناس تبيه .. بوه اللي على أساس مات منتحر و بعدها رواد عاش بصدمة و سافر لخاله في استراليا و رجع ..

بعدها رواد بدي يداوم في الكلية كمعيد و غادي يتعرف على إلياس و كريم و شهد و نهال..

و يتعرضوا لتهديد من مجهول و كان ماسك عليهم حاجات مدايرنيها في الماضي

المجهول بدي يتلاعب فيهم في الكلية و خارجهم و بدي يطلب منهم يديروله حاجات و لازم انهم ينفذوها

و بكدا مرة طلعوا من الموت بأعجوبة .. و في وسط الاحداث تصير مشاكل بينهم و مشادات

و يتشابك إلياس مع جماعة الوادي كدا مرة و يحملوه موت صاحبهم اللي مات في الحلقة الثانية .. هنا عبدو يطلع و يبين لإلياس ان جماعة الوادي ناس مش ساهلة و انه ح يشوف العجب دامه تورط معاهم

تتعرض شهد من البداية لتهديد غريب .. في شخص يدخل عليها في الليل و يكتبها في مرايتها و يبتز فيها و يأمر فيها انها ادير حاجات .. و يحاول كريم يحمي شهد كدا مرة

و تصير أكثر من حاجة معاهم في سبت تهديد المجهول ليهم ..

و بعد كدا حاجة تكتشف شهد مع كريم ان عبدو هو اللي يدخل عليها حوشها و يكتب

و لكن يعرفوا انه زيه زيهم و انه يتعرض للتهديد من مجهول بسبب انه خش للكلية في الليل و سبب فيها حريق بالغلط

و يكتشف رواد من المجهول ان بوه ما انتحرش و ان في حد خلاه ينتحر بطريقة ما

طبق الطريقة هادي على رواد و كاد انه ينتحر بنفس المكان اللي انتحر فيه بوه لو ما لحقش عليه إلياس و نقذه و معاه عبدو

و تستمر الأحداث معاهم وبدوا يشكوا في كل حد في الكلية .. لعند في يوم داروا خطة و قدروا يشدوا المقنع و اللي على أساس انه المجهول و طلع الأستاذ ابراهيم ..