ردة فعل (رواية ليبية)

الحلقة 12

و أخيرا جهزت الحلقة .. بارت طويل كالعادة 

فيه هلبا حاجات صارت .. وبدون حرق نخليكم تقروها .. 

و تعليق وتصويت منكم يفرحني ويشجعني نكملها بسرعة ونزلها 

.. 

استمتعوا .. 

.....................................

الحلقة 12

فلاش باك – Flashback

عبدو البرا و يشوف سيارة الطاهر راجعة وداخلة الفيلا

و يطلع هاتفه بسرعة و يتصل بكريم في المرة الاولى الخط ما يشدش و يشد في التانية

عبدو : رجع راهو .. بسرعة اطلعوا
كريم : بالله عليك .. باهي باهي

ويصكر منه .. يوقف كريم و في ايده علبة الدواء ويحطها في جيبه و يطلع من الدار و ينادي إلياس

يسمعه إلياس و يطلع من الدار اللي هو فيها و أول ما يطلع يسمعوا خطوات في الدرج راكبة للدور اللي هما فيه

كريم يأشر لإلياس ان في حد و يقوله اقعد غادي في مكانك لأن الدار كانت بعيدة وصاعب يوصله

يرجع كل واحد فيهم للدار اللي كان فيها

يتوتر إلياس و ينزل يتخبى تحت السرير اللي كان في الدار

..

وكريم يفتح واحد من الدواليب ويتخبى فيه و شوية يسمع صوت الباب انفتح و خطوات خشت للغرفة .

و يقعد خايف و على أعصابه ..

...

إلياس وهو تحت السرير يلاحظ حاجة زي الكتاب محطوط بين الفراش و السرير

و يمد يده وياخده و يلقاها مذكرة و يقعد شادها في يده وتوصله رسالة من كريم

" كريم : خش عندي الدار .. وأنا لابد .. خليك وين ما انت "
" إلياس : تمام .. نستنى منك في اشارة "

يقعد كريم حابس حتى نفسه في الدولاب ومش عارف شن يدير

لعند ما يسمع الباب انفتح و تصكر ..

يطلع الطاهر من الدار و يدخل الحمام ..

يقعد كريم شوية في مكانه لعند ما حس ان خلاص هدوء .. يطلع من الدولاب و يبعت رسالة لإلياس انه يطلع بالشوية