اهلا
بارت طويل هلبا .. اقروه على دفعات باش ما تملوش
ما تنسوش تعليقاتكم و تصويتاكم ع البارت
و اعطوني رايكم ..
للاسف التفاعل ضعيف .. لو قعد هكي ح نضطر ننهي الرواية بكري
...................... .. .............
الحلقة 4
" ليلة في المقبرة - A night in the cemetery "
و قبل ما يوصل إلياس لقدام حوشهم يشوف مروان اللي من جماعة الوادي ومعاه نفر تاني .. يدرس إلياس ع اليمين
إلياس : شن يديروا هنا هادوم ؟
......
كريم و قبل ما يخش لحوشهم .. ينزله عدنان اللي من جماعة الوادي ومعاه نفرين
عدنان : كريم !
كريم : شن اديروا هنا ؟
يشده عدنان من رقبته
عدنان (بعصبية) : إلياس وين ؟
كريم : مش عارف .. ما شفتاشي
عدنان : تكلم خير ما نقتلك
كريم : أكيد في حوشهم ما شفتاشي
عدنان : كذاب .. مهناش في حوشهم
كريم : امالا ما ندريش عليه
عدنان : كذاب .. أكثر حد يعرف إلياس أكثر انت و لهذا تكلم خيرلك
كريم : حتى لو عارف وينه مستحيل نقولك
عدنان : يعني تعرف وينه ولاه ؟
كريم : لا .. شن تبو منه إلياس ما دار شي لحسين شوفو من مدايرين معاه مشكلة قتله
عدنان : مدام مش مداير شي علاش هارب و ندوروا فيه ما لقيناشي ؟
كريم : من قال هارب ؟
عدنان : ماشي يا كريم ماشي ..
يقيم عدنان تيشرته شوية يوري لكريم السلاح اللي على خصره
عدنان : تشبح فيه هذا ؟ أول ما نشوف إلياس ح نفرغه في راسه .. وصله الكلام هذا
يسيبوا كريم واقف و يركبوا سيارتهم ويمشوا
يطلع كريم هاتفه و يتصل بإلياس
....................
يعلق إلياس مارشت السيارة بيمشيلهم و يجيه اتصال من كريم و يرد عليه
إلياس : ألو
كريم : اسمع .. جماعة الوادي كانوا هنا يدوروا فيك
إلياس : ايه عارف قدام الحوش هما توا
كريم : كيف ؟ وين انت ؟
إلياس : درست على جنب و توا ماشيلهم
كريم : رد بالك .. بيقتلوك لو شافوك .. اطلع من غادي طول
إلياس : شن تقول انت ؟ ونخليهم هنا ؟ يخشوا لعيالي في الحوش يديرولهم حاجة؟
كريم : كان بيديروا حاجة راهو داروها من قبل .. هما يبوك انت مخصوص .. اسمعني اطلع من غادي بسرعة
إلياس : باهي اني جايك!
كريم : لا وين جايني ! نقولك كانوا هنا و جايني ؟
إلياس : وين تبيني نمشي امالا ؟
كريم : برا لرواد .. ولي اقعد عنده
إلياس : لالا ما تجيش نثقلوا ع الراجل .. تو نمشي لخوالي
كريم : اسمع مني .. رواد ما يعرفوش مكانه و مافيش حد يتوقع انك عنده .. براله انت توا .. تو نجيكم بعدين و بعدين نشوفوا شن يصير !
.....................
.........
رواد منظم أموره و طالع من الشقة و ينزل لقدام العمارة وين ماكانت سيارته مدرسة
أنت تقرأ
ردة فعل (رواية ليبية)
Mystery / Thrillerرواية مختلفة عن باقي الروايات .. غموض .. إثارة .. تشويق ... طلاب في إحدى الكليات توصلهم رسايل تهديد من شخض مجهول تتشابك الأحداث بماضيهم و بحاضرهم من هذا الشخض و شن يبي منهم ؟ وشن ح تكون ردة فعل الشخصيات ، تابعوا الرواية
