ردة فعل (رواية ليبية)

الحلقة 7

ما تنسوش تعطوا رأيكم و تصوتوا للبارت هذا

....................................................

الحلقة 7

" الشك – suspition "
الجزء 1

خيرية : المهم دير في حسابك بعدين تروح بكري نبي مشاوير
إلياس : مشاوير شني ؟
خيرية : تو تعرف بعدين
إلياس : اسمعي ما تكثريش عليا عندي إمتحانات نهائية قريب أيوه
خيرية : خلي تكثر عليك اللي تمشيلها كل يوم
إلياس : و الله يا امي انتي .. توا معش بتطلقيني في حالي

و فجأة يسمعوا صوت ضرب رصاصة جاي من البرا

يوقف بسرعة إلياس و يتمسمر في مكانه و يتفكر سلاح رواد اللي قاعد في سيارته

يطلعوا يجروا و يلقوا فراس شاد السلاح في يده و طلقة طالعة ضاربة الحيط

خيرية (بخوف) : شن في ؟ شن الرصاصة هذا وين لقيت السلاح ؟

يمشيله إلياس يجري و ياخد منه السلاح و يحذفه بعيد و يخبط فراس على راسه بقوة
فراس خايف ومش قادر يتكلم و تجيه خيرية

إلياس (بعصبية) : شن قربك فيه انت ؟ قتلك خود القلم بس ولا
خيرية : شن شن قربه فيه ؟ قصدك كان في سيارتك هو ؟ شن يدير عندك سلاح انت اصلا ؟ قولي هنا .. (و يقعد ساكت) من امتى خاش في المواضيع هادي و الاسلحة و الدنيا اه قولي .. لا لا مش مصدقة أنا

إلياس : مش ليا أصلا .........
خيرية : شن يدير عندك كان مش ليك فهمني .. و انا نقول الايام اللي فاتوا مش على بعضك تبات برا وتروح موخر و اشبح شني ..

ضغطها يهبط وتحس بدوخة .. و يقرب منها إلياس بيشدها

خيرية : زيد عليا غادي ما تقربنيش .. ما تقربنيش .. من امتى انت و السلاح ؟ كان جت في خوك ولا ناشاته شن يصير فينا قولي ترا !
إلياس : ت غير خيرك تكبري في المواضيع اسمعيني ....
خيرية : ما نبيش نسمع شي .. وين ما لقيته برا امشي رجعه ولا امشي لوحه في الكناسة ما يقعدش عندك وكان هذا لا انت ولدي ولا انا نعرفك .. غير يروح بوك تو يعرف كيف يتصرف معاك

و تمشي تخش الحوش وهي في حالة

يتلفت على خوه و يلقاه و يشبحلها و يخاف فراس منه .. و كيف جاي بيهرب يشده من وذنه

إلياس : تعرف مازال نلقاك ماس حاجة ولا مفتشلي حاجة تعرف شن ندير فيك ..
فراس : ما فتشت شي انا ندور في القلم فتحت القجر لقيته قدامي
إلياس : شن مسسك فيه انت اصلا دامك شفته شن قربك فيه .. مرة تانية نقصهملك ايديك نلقاك ماد ايدك على حاجة ما تخصكش .. وتوا اقلب وجهك من قدام وجهي

يمشي فراس يخش الحوش و يرجع إلياس ياخد السلاح من ع الأرض و يركب سيارته و يمشي

...............

..........

...............

يركب رواد لشقته و أول ما يدخل .. يشوف الدنيا حايسة ومقلوبة