ဒီအချိန်ဆိုပုံမှန်မြည်နေကြ ဖုန်းသံလေးက တိတ်ဆိတ်နေတာ တစ်ပတ်ကျော်လောက်ရှိပြီဖြစ်သောကြောင့် Jimin စိတ်ထဲထင့်နေမိသည်။
"အရင်ကဆို အမြဲဖုန်းခေါ်နေကြပါ ဒီနေ့မှဘာလို့လဲမသိဘူး "
အလိုမကျခြင်းများစွာဖြင့် တစ်ယောက်ထဲ တိုးတိတ်စွာရေရွတ်ရင်း "သူလဲ သူ့အကြောင်းနဲ့သူရှိလို့နေမှာပေါ့ "ဟုဘဲ ဖြည့်တွေးကာ လက်ထဲက ဆေးစာအုပ်ကို အာရုံ စိုက်ဖတ်နေလိုက်၏။
ငယ်ငယ်ထဲက သူစိမ်းတွေနှင့်ပတ်သတ်ပြီး အရမ်းခင်တွယ်တတ်တဲ့သူမဟုတ်တာကြောင့် သူ့မှာ Tae Hyung ကလွဲပြီး တခြား အပေါင်းအသင်းရယ်လို့မရှိ။
ဒါပေမဲ့ ဒီကောင်လေးကိုတော့သူ့ညီလေးတစ်ယောက်လိုစိတ်ရင်းနဲ့ ခင်မိသည်။လူကောင်ကြီးပေမဲ့ တစ်ချက်တစ်ချက်ကလေးဆန်တတ်သောကောင်လေးက ချစ်စရာတော့ကောင်း၏။ ငယ်ငယ်ရွယ်ရွယ်နှင့် အချိန်ပိုင်းအလုပ်လုပ်ပြီးအဖွားကို ရှာကျွေးနေရသောကြောင့် ဂရုဏာပိုမိခြင်းလဲ ပါသည်။ တကယ်ဆို ဒီအရွယ်လေးတွေက သူငယ်ချင်းအပေါင်းအသင်းတွေနဲ့ ပျော်ပါးနေရမည့်အရွယ်လေးမဟုတ်လား ။
ဒေါက် ဒေါက် ဒေါက်
Jeon အကြောင်းတွေးနေမိတုန်း အခန်းတံခါးခေါက်သံကြောင့် Jimin ထ ဖွင့်ပေးလိုက် တော့ ဝင်လာသည်က မာမီ။
ပုံမှန်ထက် တည်တင်းနေသော မာမီ့မျက်နှာထားကြောင့် Jimin လန့်နေမိတာတော့အမှန်ပင်။
မာမီက သားသမီးတွေနဲ့ပတ်သတ်ပြီး ပုံမှန်ဆို ဆူတတ်ပြောတတ်တဲ့ မိဘမျိုးမဟုတ်ပေမဲ့ မာမီ မကြိုက်တာတစ်ခုခုလုပ်မိလို့ ဆူပြီးဆိုရင်လဲ Hyung ရော Jimin ရော တုန်နေအောင်ကြောက်ရသည်။
" ဒီချိန်ကြီး ဘာဖြစ်လို့လဲမာမီ မအိပ်သေးဘူးလား "
"သားကို မာမီမေးစရာရှိလို့ "
"ဟုတ်"
"သား ဟိုကောင်လေးနဲ့ ပြန်တည့်နေကြတာလား "
Jimin မျက်လုံးကိုတည့်တည့်ကြည့်ပြီး အေးစက်စွာမေးလာသောမာမီ့ပုံစံကြောင့် Jimin ဂျောင်ပိတ်နေမိသည် ။ ငယ်ငယ်ထဲက မလိမ်တတ်သော Jimin အတွက် ဒီမေးခွန်းက အခက်တွေ့စေတာတော့အမှန်။ Tae Hyung ကို လုံးဝသဘောမကျသောမာမီက Jimin
Tae Hyung နဲ့ ပြန်ခေါ်ခြင်းကိုသာသိလျှင် ဘယ်လောက်တောင် ဒေါသထွက်မလဲမသိပါ။ သို့ပေမဲ့လည်း Jimin မလိမ်ချင် ။ ဒီအိမ်ထဲမှာဘဲနှစ်ပါးသွားနေရမဲ့သူတွေဖြစ်တာကြောင့် ဒီကိစ္စ ကို တစ်နေ့မဟုတ်တစ်နေ့တော့မာမီ သိကိုသိမှာဘဲ ဖြစ်တာကြောင့် အမှန်တိုင်းသာ ဝန်ခံလိုက်သည်။
