البارحة كضيت الظهرية وثلث ارباع الليل بس اقرا رياضيات اني ضعيفة بالرياضيات ولازم انجح بهذا الشهر امتحانات نص السنة قربت وما بقالهة شي
وبسبب دراستي بقيت حابسة نفسي بالغرفة اسمعهم يحجون ويضحكون جوة واني كاعدة اقرا
ومن التعب الي بية غفيت واني كاعدة اكتب
.
.
.
كعدت وية صلاة الفجر
حطيت ايدي على راسي واني ماعرف راسي من رجلية ودايخة والكتب مبعديهن عني اكيد لو امي لو أبوية هم الي اجو عدلوا نومتي
طلعت من الغرفة ميتة عطش
وصلت لنص الدرج
وكفت بمكاني من شفت حيدر بالكلدور يصلي؟!
ليش يصلي هنا وما يصلي بغرفته
شكله لطيف وهو واكف يصلي ومنزل راسه
هسة شنو اسوي؟ اني عطشانة وهو بالكلدور واستحي انزل كدامه بهيج وقت عيب
حنان ارجعي خلي يكمل صلاته وعود بعدين انزلي شربي مي مارح تموتين اذا ما شربتي مي هسة
رجعت بهدوء بدون اي صوت حتى ما يلتفت ويشوفني
رجعت لغرفتي كاعدة على الكرسي مالتي انتظر يرجع لغرفته حتة اني انزل ...... ربع ساعة وسمعت باب الشارع نفتحت
رحت للشباج وشفته طلع من البيت وراح يتمشى لجهة الشارع العام وين رايح بهذا الوقت؟
معقولة رايح يشوف حبيبته؟!
بس ليش يروح يشوفهة من الفجر؟
نزلت من الغرفة واني ضايجة
شربت المي واني اريد ابجي
ما ابجي علموده بس ابجي من خوفي من الامتحان
زائدا وين اكو واحد يروح يشوف حبيبته بهيج ساعة؟
والله علية غباء مو طبيعي
حنان/شنو اسم حبيبة الكلب؟.... يوه عليج حنان تفكرين بأشياء تافهة وما تفيدج بيوم
رجعت لغرفتي واني كل هموم الدنية بكلبي
بديت اقرا شوية قبل ما اتحضر للمدرسة
.....
كلش ضوجة الصبحية بدونه كل يوم نتريك سوية اليوم اني وحدي
اكيد كاعد يتريك وية حبيبته الماخذة عقله
واني كاعدة اتريك وية الرياضيات
.....
حتى عمو ابو احمد استغرب من ما شاف حيدر اليوم وسالني عليه كتله ماهو طالع
وصلت للمدرسة ومتاخرة بسبب الازدحامات من الصبح
اول ما وصلت للصف لكيتهم بادين الامتحان تساهلت وياية المدرسة وكالت بسرعة طلعي ورقتج واطتني الاسئلة
الحمد لله صار شي بي خير من الصبح وهو اجت الاسئلة سهلة بس مغيرة من الارقام بس مو مشكلة هو نفس صيغة الاسئلة الي قريتهة بالبيت
شفت اوركيد مخلصة قبلي الامتحان ومنتظرتني يم الباب تاكدت من اجاباتي وسلمت الورقة وطلعت من الصف
