*فَلَو أُسطيعُ طِرْتُ إِلَيْكِ شَوقاً
وَكَيفَ يَطِيرُ مَقصوصُ الجَناحِ*
خلصت قراءة الشعر والابتسامة معتلية وجهة
هاي المرة السابعة تقرأ نفس الشعر وكل مرة تحس نفسها كاعدة تقرأها للمرة الأولى
واكفة جوة النجوم والجو هدوء
اخذت طرف شالها وكعدت تهفي لنفسها الجو حار
حست بايد تنحط على راسها بكل حنية
عرفته بدون تفكير مطول
حنان ابتسمت :تاخرت ربع ساعة
حيدر :هو القمر يتأخر شوية يالة يطلع
حنان كرصته من ايده :مغروور هههه
حيدر :شلونج يحلوة
حنان :امم زوينة انت شلونك
حيدر :حاليا كلش زين
رفعت ايدها تراويه قصاصة الورق
حنان :من شوكت كمت تعرف تكتب شعر؟
حيدر ابتسم :ليش شنو شايفتني ماعرف اكتب؟
حنان :لا مو هيج قصدي بس الي اقصده انت يادوب تدبر العراقي ولسانك يصير ثكيل بمعظم الكلمات شلون كدرت تكتب هيج شعر حلو وبالعربي الفصيح!
حيدر عدل الشال على راسها :خلي نكون صريحين مو اني الي كتبها بس اني الي طلبت ينكتب هيج شعر
حنان :عرفتتت هههه
حيدر :ماتردين تعرفين منو كتبها؟
حنان :لا المهم انت حاولت علمودي
حيدر :يا ممرضة علكيفج وية كلبي
حنان :ليش شمسوية لكلبك؟
حيدر :تعب من كثر ما يحبج وهايم بيج
حنان :اوووي ترا استحيي هههههه
حيدر :تحبيني؟
حنان :شنو هذا السؤال اكيد احبك
حيدر :شكد؟
من كثر الحب ماعرفت شلون تعبرله عن كمية حبها إله
حنان :اممم..تشوف هذني النجوم شكد هواي؟
حيدر :اي بوية
حنان :اني احبك على كد نجوم الكون
حيدر :ياكوني ودنيتي انتي
حنان :خلينا نظل طول عمرنا هيج حبايب مانخلي الحياة تغيرنا عن بعض
حيدر :والله يا حبيبتي احنا نكدر نظل سوية بحالة وحدة
ختم كلامه وهو يلزم جفوف ايدها
حنان مستغربة:شنو هاي الحالة؟
حيدر :اذا ابوج وافق علية ومارفضني مثل ما سوة بية قبل سنين
حنان :يمة! انت من صدك ناوي ترجع تخطبني
حيدر :اكيد!...صراحة اني مو حاب فكرة ان نتلاكة بالختلات وبالسر وادينا على كلوبنا خاف احد يكشفنا اني تعبت
حنان :سلامتك من التعب ... من شنو تعبت؟
حيدر :تعبت واني احاول اتجنبج كدامهم تعبت واني احاول اخفي فرحتي من تمرين كدامي بحضور اهلج تعبت واني اسوي نفسي مو مهتملج
حنان :شوكت ناوي ترجع تخطبني؟
حيدر يعدل الشال من جديد :بهذا العيد الجاي ادعي بلكت هالمرة يوافق
حنان :بابا يوافق اذا بيتكم صار جاهز واستقريت هنا بالعراق
حيدر :سالفة البيت خليها على ابوية اما الخطوبة خليها علية
حنان :الله حيدر ونصير سوية؟
حيدر :اخيطج بكلبي يا نصير سوية
حنان :مشكلتي ماعرف ارد بغزل..هههههههه
