خلصت العزيمة والبنات واهلهن راحوا والبيت رجع لحالة الطبيعية
نازلة من الدرج وبايدي الكتب والحاسبة مالتي
البيت أظلم وهدوء وقتي المفضل
رحت كعدت بالمطبخ سحبت الكرسي وكعدت فتحت الحاسبة
حنان/تقرير وامتحانين حلو حلوو ...لا والله مو حلو محصورة حصرة الجلاب السود حشاية ههه
فركت وجهي بادية ليش ما درست النهار كله؟!
اني ليش عايشة؟
شنو فائدتي من الحياة؟
ختمت افكاري على صوت الحاسبة مالتي...مابيهة شحن صفر الشحن
حنان/كملت وزيادة هماتين
كمت من مكاني ركض صعدت لغرفتي اجيب الشاحنة
طبيت للغرفة على أطراف اصابيعي خاف البنات يكعدن
سحبت الشاحنة مال الحاسبة ومشيت اطلع من الغرفة بهدوء مثل ماطبيت بهدوء
هستوني فتحت الباب نضربت الشاحنة بالباب
مو صوت طكة عادية بوية انفجار نووي قاتل بنص البيت
ظليت اباوع يمنة ويسرى خاف اكو احد نهبط من الصوت طلعت من الغرفة صاروخ لان نجمة اذا احد كعدهة من النوم يبتلي على حياته
حنان/خوش هسة الحاسبة دتشحن براحتهة وعدي امتحانين واحد قريت نصه البارحة والثاني بس اراجعه
بيمن ابلش اول شي؟
حيدر/اني اكول ابدي باللي انتي مخلصه نصه
حنان/يمة خرعتني
حيدر/احسن
حنان بحقد/وليش؟
حيدر/حتى بعد متكعدين تقرين بهذا المكان بهيج ساعة
حنان/ترا هذا مطبخنة وبكيفي!
حيدر/لعد اني ماادري هذا مطبخكم؟
حنان/المطلوب؟
حيدر/ميصير تكعدين هنا كل يوم بهيج ساعة وهاي الظلمة
حنان/مو ظلمة
حيدر/ظلمة
حنان/لا مو ظلمة الضوة مال الطارمة جاي لداخل المطبخ بعد وين الظلمة؟
حيدر/بالنسبة الية اني اعتبر هاي ظلمة
تجاهلته وفتحت الكتب مالتي على اساس يحس ويتركني وحدي اريد اركز
سمعته سحب الكرسي وكعد بصفي باوعتله بصدمة
حيدر/شنو تقرين
حنان/ها؟
حيدر/شنو.. تقرين؟
حنان/شنو اني اقرة؟
حيدر/ايي
حنان/هه...ههه
حيدر/اني كتلج لا تكعدين بمكان اظلم
ضحكت ومادري ليش ضحكت بس من باوعت بعيونه ما تحملت
حنان/احم الي اقراه كل اشياء اني ذاتيا ماعرفهن شنو
حيدر/ماشاء الله بوية منينلج هذا الذكاء
حنان/اتوقع وراثة
حيدر/لا تتوقعين الله يخليج
حنان/ان شالله
رجعت اشوف أوراقي هواي يربي والوقت ديمشي
حنان/حيدر
حيدر/نعم
حنان/انت تعرف تكتب شي انكليزي وكذا؟
حيدر/بوية احد كلج اني أُمي ما اعرف اقرة واكتب؟
حنان/لا والله مو قصدي هيج شي بس قصدي يعني انت تعرف بس تركي مو؟
حيدر/اعرف عربي وتركي وانكليزي حالي من حالكم
حنان/يعني ممتاز بالانكليزي؟
حيدر/اجيبلج هذا الكلاص احلفلج عليه؟
حنان/لا لا والله ههه صدكتك بس شوف اني عدي تقرير ولازم اسلمه باجر للدكتور ولازم هذا التقرير ما يقل عن ثمانين كلمة وكله عن المايكرو والمدري شنو المهم كله عن المواد الي اني اخذهن ف ممكن تساعدني؟
حيدر/اساعدج بس شلون اسوي تقرير واني ماعرف شي عن المواد الي انتي تدرسوهن
حنان/بسيطة.... هذا الكتاب طلع منه كلشي يعجبك وحطه بالتقرير وجزاك الله الف خير
حيدر/وبس؟
حنان/بكل بساطة اكلك...بس
حيدر/ماكو اي مشكلة
حنان/بس تذكر بالانكليزي
حيدر/ماشي بوية فهمت رجعي كملي دراستج
