*الجامعة*
*النادي*
"كاعدة انتظر ردة فعل عمر وهو لازم اوراق التقرير مالتي اشوف نظراته وهو مركزهن على الكلمات وحاط ايده على حنجه"
عمر:حلوو
حنان:ها شلونه؟
عمر:شوفي حنان لو اني الدكتور مالتج بكل تأكيد الزك هذا التقرير بوجهج
حنان:ليييشش؟!
عمر:شنو ليش؟ شنو يعني هاي الليش؟ التقرير كله تخربط هيج مطشر ماكو ترابط
حنان:يا صدك؟!
عمر:قابل اجذب عليج؟ شوفي انتي بأم عينج وحكمي لو لان استاذ حيدر المغوار سوالج تقرير تاخذينه بدون ما تشوفين شبي مابي
حنان بخوف:عمر! شسوي هسة بعد ربع ساعة ولازم اسلم التقرير للدكتور وهذا الدكتور كلش حقنة وميرضة الغلط
عمر بضحكة:لعد لو يشوف تقريرج الي كله غلط بغلط
حنان:شو راويني شنو الغلط
عمر:تفضلي انسة حنان شوفي ابن عمج شكاتب
حنان:... شنو الغلط؟ وين التخريط؟ كلشي مهم طلبته منه كتبليا بعد شنو يسوي؟ يحط روحه بي يالة يعجبك؟
عمر:لا يابوية شنو يحط روحه لاااه
حنان:عمر ... عمرررر شكم مرة كتلك لا تسوي هاي الحركات كدامي اتخبل منهااا
عمر:مشكلتج واللهِ
حنان:من صدك هاي المرة يووه منك يعني اسلوبك المستفز متبطله
"احجي وياه وهو يسوي روحه ميسمعني ضرب رجله ومشيت للقسم مالتي شفت اوركيد جاية من بعيد وتاشرلنا بايدها من شافتني عفتهم ومشيت ظلت واكفة بمكانها... هو هم صحيح كلام عمر يعني اني صدك ثولة شلون اخلي واحد طول عمره عايش بغير دولة يسويلي تقرير هاي المرة رح اعتبرها كرصة إذن وبعد لو انحصر حصرة المطاية بالجوامع هم اسوي التقرير بايدي وهذا التقرير مارح انطي للأستاذ ماناقصني فشلات واني صايمة"
"وصلت للقسم مالتي ولكيت الدكتور منتظر كل الطلاب يطبون للقاعة شاف التقرير بايدي اجيت اطببه بجنطتي بس اشرلي بايده انو اروحله خليت التقرير بالجنطة ومشيت باتجهاهه"
حنان:صباح الخير دكتور
الدكتور:صباح النور وين التقرير؟
حنان:ليش؟
الدكتور:مجايبة تقرير؟ اسجل اسمج ناقص؟
حنان:يمة لاا دكتور جايبته
الدكتور:حطي على الميز مالتي واكعدي بمكانج وحظري ورقة بند بيضة
حنان:ليش دكتور؟
"لبسني ما جاوبني وكف يرزل واحد وراية مجايب تقرير طبيت بسرعة كبل سلمت التقرير على الميز مالته ورحت وكعدت بمكاني شفتهم كلهم مطلعين اوراق بند وكاعدين متوترين مثلي عرفت عدنا امتحان بس شنوو هاايي امتحان واحنا صيام ورواحتنا طلعت من الحر"
"جاوبت الي اكدر اجاوبه والي متذكرته من الايام الي فاتت وسلمت الورقة وظليت منتظرة يشوف الاوراق او التقارير بس ريح كلبي من رفع ايده شاف ساعته كال خلصت المحاظرة اخذ التقارير والاوراق وراح يمةةة ابوس الكاع على هيج رحمة ماكو رزالة كدام القسم كلهم"
