رجعت من المدرسة وما لكيت احد بالبيت
اكلت بسرعة ورحت سبحت صليت
وطلبت من الرب انو يثبت اصراري على الدراسة
وما يتركني وحدي بهاي المرحلة
نمت واني لابسة محرم الصلاة
كل الي اذكره سمعت صوت بابا وهو يغطيني
.....
كعدت المغرب ومن المغرب لحد ما صارت الساعة وحدة بليل اني اقرا بدون انقطاع
.
.
.
1:26 الصبح...
كاعدة اقرا واكتب الي احفظه
شفت تلفوني اجاه اشعار على برنامج اني نادرا ما استعمله
فتحت تلفوني وشفت الأشعار مكتوب بي ((ويننجج؟))
معقولة رندة؟ بس اني الي اعرفه عن رندة هاي مثل الدجاجة بالثمانية تنام مستحيل تظل كاعدة لهيج وقت
دخلت على الاشعار
هاي بنية ويانة بالصف
اي اعرفهةة هاي البنية الي عيونهة لونهم اصفر
.. اوركيد ..
شفتهة كاتبة هلاوو حنان اني اوركيد وياج بالصف من نفس السرة ثلاث رحلة
بعد كليلي شنو اسم عشيرتج ما بقى شي ههه..
حسيت بتوتر فضيع هاي اول مرة بحياتي اتواصل وية بنية غير بت عمتي رندة
شنو اكتبلهة؟ السلام عليكم؟ لاا ما ترهم هي كاتبتلي هلو حنان ركزي ترة شي جدا طبيعي تحجين وية بنية غير بت عمتج
اوووه والله السالفة اصعب من الرياضيات
شفتهة رجعت كتبت عدلت كعدتي بسرعة
اوركيد/اسفة اذا ازعجتج بهذا الوقت بس اريد اعرف شي منج اذا امكن ردي علية حبابة
....
شكتببب حناننن رديي
حركت اصابيعي وأخذت نفس طويل
كتبتلهة .... تفضلي ....
بسرعةةة رجعت كتبتلي
اوركيد/شنو عدنة واجب بالادب؟
حنان/ماعدنة شي باجر عدنة قواعد مو ادب
اوركيد/ربي يسعدج والله صار بية جلطة من الخوف
حنان/ليش؟
اوركيد/بنات الصف يكولن باجر عدنة الادب حياة الشاعر وقصيدته
حنان/لا ماكو هيج شي اني رحت ورا المدرسة وسالتهة وكالت باجر تعالوا محظرين قواعد مو ادب
اوركيد/لهذا السبب اني اجيت سالتج لان شفتج رحتي حجيتي وياها
حطيت الموبايل كدامي شنو ارد عليهة هسة؟
شفتهة رجعت دزت شكرا
كتبتلهة عفوا
وسديت الموبايل
شفت ادية باردات ويرجفن من التوتر
هاي اول مرة بحياتي احجي وية بنية غريبة
بس للصراحة حبيت اسلوبهة كلش حبابة ومرحة واجتماعية حتى هي عدهة ميانة وية الطالبات والمدرسات
من المتوسطة واني اشوفهة كل يوم وهي جاية مسوية تسريحات بشعرهة
رحت تمددت على فراشي واني مبتسمة
حنان/اوركيد...حلو اسمهة .... لو تيصر صديقتي رندة تذبحني ههههه
