استوطنتَ قلبي

Part 1

قبل ما نبدأ خلوني اعرفكم على ثلاث شخصيات مهمة في الرواية واللي هم..
(ساره والمياسة وجواهر)... هذول الثلاثة صديقات من زمان روح بالروح ومايفترقون عن بعض، يتشاركون كل شي يصير معاهم حتى اسرارهم مايخبونها عن بعض، اول شي نقولكم عن (ساره والمياسه) ساره والمياسه بنات عم بس علاقتهم كأنهم خوات قريبات حيل من بعض من الطفولة، تربوا مع بعض في بيت جدتهم (ام ابائهم) مع باقي اخوانهم بس هالثنتين غير كانت علاقتهم مثل التوأم...
وبعدها تجي الشخصية الثالثة اللي معاهم بالشلة واللي هي (جواهر) وتصيرصديقة ساره من ايام الدراسة تعرفوا على بعض من ايام المتوسط وصاروا بيست فريندز من يومها وبعدها قررت ساره تعرف جواهر على المياسة، وصاروا شله وحده وصديقات عمر...

يالله نبدا القصة..

المياسه من صغرها وهي تحلم انها تكون اميره وتلبس الفستان الابيض وتتزوج الشخص اللي تحبه وتعيش قصة خيالية معاه مثل اي بنت، وفعلاً لقت الشخص اللي راح تحقق هذا الحلم معاه واللي هو احمد ولد عمها، هو حبها الأول واللي تنفست باسم الحب منه وايضاً هو الشخص اللي قررت تبني كل احلامها ومستقبلها معاه...
احمد بالنسبه لها كان كل حياتها لانها ماحبت بحياتها شخص غيره، كل شي يسعدها كان مرتبط بأحمد حبيبها وكل حياتها واللي زاد من تعلقها وحبها له هو لما اعرفت قرار العايلة بان يزوجونها لاحمد..
احمد والمياسه كانوا محجوزين لبعض من مده طويله من قرار العايلتين، وهذا الشي اسعدها وخلاها طايرة لانها واخيراً بتجتمع مع حب طفولتها.. لكن في شي ناقص بقصة المياسة!! في شي مو مكتمل!!!
مع الاسف كان حبها من طرف واحد، عاشت على امل ١٪؜ انه ممكن يتحقق حلمها وهو ان احمد يبادلها المشاعر وتبني حياتها معاه، كانت كل يوم تتقطع وتنقهر انها تحبه اما هو ولا معبرها، والمياسه توقعت ان قرار العايلة على زواجهم ممكن يخلي احمد يحس فيها ويجرب يفتح لها قلبه ويتعرف عليها بعد الزواج وهي متأكدة انه راح يحبها لو تعرف عليها لان بنت بجمالها وشخصيتها الحبوبة شلون ماتنحب! اي رجال بيشوفها راح يذوب بسحرها...
بس المشكلة الكبيرة ان احمد اساساً مايعرف بحب هالملاك تجاهه كل اللي يعرفه من اهله ان عنده بنت عم يبون يزوجونها له وجابرينه عليها وهو ولا مره شافها ولا حتى تكلم معاها من يوم كانوا صغار...
وكان اجبار الاهل على هالزواج ينفر احمد زياده ويخليه يعارض اكثر ويتمسك بموقفه ورفضه لهذا الزواج التقليدي السخيف.. احمد دايماً يكلم اهله برفضه لزواج الاقارب ومايحب حد يجبره على شي مايبيه من سنين وهم يحاولون معاه انه يتزوج بنت عمه المياسه لكن هو رافض تماماً بعذر المشاكل اللي تصير داخل العائله والواحد كل مايبتعد من الاقارب كان افضل هذي كانت فكرة احمد عن زواجه من المياسه... حتى كان يرفض انه يقعد معاها ويكلمها قبل لايصير بينهم اي شي رسمي...

بعد مده وصل للمياسه خبر رفض احمد التام لزواجهم وحست انها ماتبي ترخص نفسها له اكثر من جي، فقررت تكلم عمها وابوها بنفسها وتقولهم انها عافت هالزواج وخلاص ماتبيه دامه بالاجبار...
العائلتين تقبلوا قرار الاثنين وهم متضايقين لانهم ماراح يحصلون احسن من عيال عم لبعض واثنينهم مناسبين لبعض لكن قسمة ونصيب... حاولت المياسه انها تتخطى الموضوع وتعيش حياتها طبيعي الا ان هالشي كان صعب عليها وايد... صارت ماتروح تبات في بيت عمها نفس اول، والجمعات العائلية صارت ماتحضرها في بعض المرات لما تعرف ان احمد موجود بالبيت... وعلى هذا الحال كانت حياتها...
وبيوم من الايام وبعد مرور كم شهر!! المياسه وصل لها خبر انه احمد خطب، وهذا الخبر سبب لها صدمه كبيره ضاع حب حياتها وحلمها الكبير.. كان خبر زواج حب حياتها من وحده غيرها محطمها... وكسرها.. كان مب سهل عليها، تعدته بصعوبه كبيره ومع مرور الايام والشهور اقدرت المياسه تتناسى هذا الالم وشوي شوي يلتأم جرحها لانها تقبلت اللي كاتبه رب العالمين... وبالنهاية نصيب...
المياسه ماكانت بروحها طول فترة ضيقتها كانت معاها ساره بنت عمها وما تركتها ولا ثانيه، كانت ساره واقفه مع المياسه طول فترة حزنها، وفي النهاية اقدرت المياسه تكمل حياتها وتعدي الصدمه بعد جهد كبير...