بعد مرور اسبوعين...
العيلتين اتفقوا يسوون عرس مصغر بسبب حمال ساره وكان هالقرار من ابو ساره وعمها.. كانوا منحرجين ومايبون العيله يدرون بالموضوع.... البعض من العائلة من بعيد ما اعجبه القرار والكل تسائل وتم ينبش على السبب! وطبعاً بعد ما اهل راكان شافوا فضول العائلة الكريمة صاروا لازم يبررون لهم... وكان راكان ضد الفكره... كان من رايه ان يقولون لهم مالكم خص هذي حياتهم وكيفهم... فا اقترحت ساره لمرت عمها تقول لهم ان راكان عنده سفره دوره عسكرية ومستعجل يبي يسوي العرس قبل السفره....
راكان اقتنع شوي ولو انه متنرفز على التبرير بس مشت السالفه وعدت على خير...
طبعاً محد يعرف بخبر حمل ساره غير ابوها وعمها ومرت عمها بس، الباقي خبوا عنهم لان ماحبوا يحرجون ساره....
كان يوم الجمعه... وكان الكل لاهي ومحتاس بالتجهيزات... ام راكان وبناتها كانوا مسؤولين عن كل الترتيبات... كانوا مجهزين الحفلة في حوش البيت وكان الترتيب من احلى مايكون... التنسيق والتنظيم كان يجنن.. ساره سلمت بنات عمها المسؤولية في اختيار كل شي لانها كانت مشغولة بامتحاناتها وتجهيز الفستان والكعب وغيره من امور العرس... كانت تتجهز بغرفة المياسة وتشوف ايبادها تنتظر نتيجة اخر اختبار تطلع لان مابقت لها الا هالماده... كانت متوتره على الاخير... كان اللي مأخر العرس امتحاناتها.. قدمتهم وارتاحت.. كانت نفسيتها شوي تعبانه بسبب ضغط الدراسه وتجهيز العرس حتى هرموناتها تقلب عليها وصارت تتحسس من اتفه الامور.. وطبعاً بالنسبة لموضوع امها فا تجاهلته ولا عطته اي اهتمام...
الميكب ارتست: حبيبتي بليز اثبتي ابي اسوي حواجبج!
ساره: سوري والله بس متوتره ابي اشوف النتيجة
الميكب ارتست: طيب موجوده النتيجة في الموقع ماراح تطير مردج بتشوفينها
ساره تفكر وبعدها استوعبت وقالت: امبيه صح شفيني غبيه جي
الميكب ارتست: هههه محشومه حبيبتي بس ريلاكس مايصير انتي عروس لازم تكونين مركلسه ومستانسه
ساره: تاخذ شهيق وزفير وغمضة عيونها...
الميكب ارتست: ايووه جذي ابيج لاتحاتين كل شي تمام ماشاءالله عليهم بنات عمج ماسكين الشغل برا ومبدعين وانا طالعه عندج شفت الشغل تحت
ساره: امانه صج! اااه تدرين اني ماشفت ولاشي؟ وما اخترت شي يعني ماعرف هم شنو سووا قلت لهم سووا كل شي انا ماراح اشوف شي
الميكب ارتست: صج! ليش ماشاركتي في الاختيار والتنسيق!
ساره: كنت مشغولة بالامتحانات تخيلي توني امس خلصت اخر امتحان...
الميكب ارتست: ياعمري والله يالله الحمدلله اهم شي افتكيتي وخلصتي اخر امتحان اللحين تقدرين تسافرين وانتي مرتاحه...
أنت تقرأ
استوطنتَ قلبي
Romanceرواية شبابية مثيرة تجمع بين الحب، والدراما، والمغامرة تروي احداث الرواية عن تفاصيل حياة مجموعة من الفتيات والشبان، وكل شخص منهم لديه قصة وماضي مثير للإهتمام، بالإضافة لحدوث بعض المغامرات والمفاجآت الغير متوقعة لكل شخصية.. قراءة ممتعة❤️
