هالبارت حيل طويل كل واحد يمسكله سناك ويستمتع بالقراءة 🥰❤️
بعد مرور اسبوعين جا يوم العرس...
صباح يوم الخميس الكل كان يشتغل ويحوس في البيت ويجهز اغراضه عشان يروحون للفندق...
ام راكان: يالله ميري بسرعه بسرعه ودي الشنط والفساتين للسيارة واطلعي شوفي المياسة خلصت شنطها ووديها السيارة
ميري: حاضر مدام
ام راكان تتصل على ساره وتكلم نفسها: وساره وينها مالها حس بعد .. يرن يرن ومحد يرد
المياسة: يممممه يمممه
امها: ويعه ويعه خرعتيني شفيج يمه يمممه وصمه نععم!!!
المياسة: يمممه شفيييج اليوم عرسي وانتي تزفيني!!
امها: ايي انتي بعد صرعتيني يمه ويمممه بصوت عالي
المياسة: اسفه حبيبتي بس لاني مالقيت ساعتي الالماس شفتيها وينها؟
امها: اييي عندي عندي يمه بتحصلينها في التجوري
المياسه ترككض لغرفة امها...
اقعدت ام راكان بالصالة تشرب قهوتها وتنطر بنتها تخلص... بعبايتها تنطر بنتها تخلص وتشرب قهوتها: انا ناطرة تحت لاتتأخرين!!
فجأة يدخل راكان من باب الصالة وهو بلبسه العسكري كان شكله تعبان وعيونه مكسره فاتح اول ثلاث ازره من صدره ومرخي الكاب على ورا ومشمر يده> رافع كم اليد على فوق
امه لفت على دخلته واستغربت من شكله قالت: هلا امي صباح الخير
قرب راكان ورمى نفسه بحضن امه...
امه خافت عليه: يمه ولدي شفيك حبيبي؟
راكان: تعبااان يمه حاس بتكسير مو طبيعي ومصدع وبلاعيمي تعورني طلعت من الدوام وخذيت اذن
امه تمسك جبهته وخده: لحضه اشوف.. يمه حرارتك مرتفعه حيييل قوم قوم نروح المستشفى ليكون انت اللي سقت لين اهني؟
راكان: لا خالد وصلني ماقدرت اسوق
امه: اي زيين اشوه يالله قوم معاي بوديك المستشفى
راكان: لا يمه قعدي وراكم تجهيزات ماعليج بطلع اتسبح بماي بارد وبصحصح وتروح السخونه ان شاء الله
امه: لا قلت لك قوم معاي ماروح مكان الا ريلي على ريلك
قام وقعد عل الكرسي: ان شاء الله خلاص اللحين بتصل على عزيز ولا خالد ياخذني تمام جي؟
امه بتردد: وبتطمني عليك؟ تدري شلون لالا انا بجي معاكم ماراح ارتاح
راكان: يمه ياحبيبتي لاتكبرين الموضوع الله يخليج صدقيني بروح انا ابي اروح اصلاً وراح اطمنج صدقيني هاه شوفي بتصل على عزيز اللحين قدامج
رفع تلفونه ويطالعها عشان تصدقه وتروح...
امه تشوفه: يالله اتصل شناطر؟
راكان يضحك ويتصل..
عزيز: الوو
راكان: الو عزيز
عزيز: هلا راكان شحالك
راكان: بخير بقولك تقدر تستأذن من دوامك وتاخذني المركز؟
عزيز: لا والله سامحني راكان عندي قضية مهمة اليوم ولازم نسكرها ليش شفيك؟
راكان: خلاص بعدين بقولك يالله قواك الله
عزيز: الله يقويك حبيبي
سكر راكان واتصل على خالد
امه: مب جاي صح؟
راكان: ايه قال مايقدر بشوف خالد
خالد يرد: شفيك يالخوي مسرع اشتقتلي ههههه
راكان يضحك بتعب: هههه اقولك انت راجع المعسكر ولا رايح البيت؟
خالد: لالا خلصت مناوبتي راجع البيت ليش؟
راكان: تمام ارجع عندي ماعليك امر بروح المستشفى
خالد: ماقلنا لك بس انت عنيد، ولا شكلها الوالده استلمتك هههه
راكان: ايه ايه لاتطولها يالله تعال
خالد: ههههه ماشي يالله دقيقتين بس
راكان سكر الخط ولف على امه قال: هاه ارتحتي حبيبتي؟
امه: ايه ارتحت وراح تطمني بعد ماتخلص من الدكتور سمعت؟ ولا راح اتصل على خالد وبسأله بنفسي، ترا عندي رقمه سمعت؟
راكان: ان شاااء الله من عيوني يالغالية عطيني عطيني هاليدين ابوسهم اخخخخ فديت ريحتهم والله عساني مانحرم من هاليدين
امه تبتسم وتمسح على خده وتدعي له: الله يحفظك يا يمه ويبعد عنك كل شر وكل مكروه حبيبي انته
تدخل عليهم ريم وبنتها من باب الصالة
امه لفت وشافتهم: هلااااا والله هلا وغلا
وتركض لولو عند جدتها وتحضنها
ام راكان: يا هلا يا هلا بحبيبة جدتها شلونج ياقلبي
لولو: بخير يديده انا مشتاقتلج وااايدد وااايد واااااايد
جدتها: ويه ويه يابختي والله هاتي بوسه ياعمر يديده انتي... وتكمل: والله اكل هالخدودات الحلوه...
ريم تسلم على اخوها: هلااااا راكان شلونك؟
راكان: بخير حبيبتي انتي شلونج وشلون محسن؟
ريم: بخير الحمدلله يسلم عليك وي شفيه صوتك؟ ليكون مزكم؟
راكان: شكلي والله
ريم: ياربي مش وقته تتعب اللحين سمله عليك وشبتسوي بعدين؟ اكيد راح تجي العرس بتدخل مع ابوي وعزيز صح؟
راكان: ان شاء الله
امهم: حبيبي لو ماقدرت تدخل عادي يمه روح عرس الرجال شوي وبعدها ارجع البيت وارتاح
راكان: ان شاء الله يصير خير
تنزل لهم المياسه بعبايتها..
ريم تركض لاختها تحضنها: فديت العرووسه ياناس واااي مو مصدقه هاليوم جه وبشوفج عروس
ثنتينهم يصرخون ويحضنون بعض
راكان يسكر اذونه: يا الله
امه تضحك: ههههههه
المياسه تسلم على اختها: ههههه شفتي شلون؟ خلاص راح تفتكون مني ومن ازعاجي
أنت تقرأ
استوطنتَ قلبي
Romanceرواية شبابية مثيرة تجمع بين الحب، والدراما، والمغامرة تروي احداث الرواية عن تفاصيل حياة مجموعة من الفتيات والشبان، وكل شخص منهم لديه قصة وماضي مثير للإهتمام، بالإضافة لحدوث بعض المغامرات والمفاجآت الغير متوقعة لكل شخصية.. قراءة ممتعة❤️
