استوطنتَ قلبي

Part 7

قلت لج مافي طلعه اليوم يعني مافي روحي فصخي عبايتج وسويلج شي ثاني، امشي انج تطلعين من البيت... وسكر الخط ورمى تلفونه عل الكرسي اللي جنبه واشتغلت الاشارة الخضرا وحرك بسرعه...
كان يفكر بينه وبين نفسه هل استعجل لما وافق على الزواج من شوق!!
من بعد ملكتهم بشهر احمد صار يتضايق من تصرفات شوق وطلعاتها وسهراتها لين اخر الليل وشلون البنت "FREE" وتفكيرها OPEN MINDED وكل شي عندها عادي وتشوف ان احمد دايماً يكبر المواضيع ومعقد لكن فوق الاختلاف اللي بينهم الا ان كان فيه حب يجمعهم كان فيه تلاطف واعجاب من الطرفين بس مشاكلهم وجدالاتهم ما تخلص...
احمد وهو ينافخ ومتضايق: هالبنت لازم ترفع ضغطي كل يوم على هالحال كل يوم...  لكن هين والله لا اكسر خشمها وراسها اذا هي متعوده على السهرات والطلعات الماصخه انا اعرف شلون اعودها تبطل هالعاده...
وفجأه يرن تلفونه اخذ التلفون من الكرسي والا ابوه يتصل له رد عليه
احمد: هلا يبه
ابوه: هلا احمد شحالك؟
احمد: يسرك الحال يبه انت شلونك؟
ابوه: بخير الحمدلله وينك فيه
احمد: قريب البيت ليش
ابوه: ايه تمام عيل تعال ابيك بموضوع
احمد: ان شاء الله اللحين جاي

خلونا نقول لكم قصة احمد وشوق
احمد قرر بيوم انه يتزوج وامه وخواته شافوا البنت وانعجبوا بجمالها وادبها لكن فيه شي ماعجبهم بهذي العايله وهي انهم متفتحين وغير تماماً عن اهل احمد المهم رجعوا البنات من بيت الناس وكلموا احمد بالموضوع وامه شاورته وأكدت عليه انه يفكر عدل قبل مايشوفها نظره شرعيه وطبعاً بدون تفكير قال يبي يشوفها وعلى موضوع الانفتاح قال انه يقدر يغيرها بما انها بتصير زوجته... خواته وامه انصحوه وايد لكن هو قرر وخلص وبعد ماشاف البنت نظره شرعيه انعجب فيها وايد وهي نفس الشي وصار العقد وحفلة الملكة واللحين صار التجهيز للعرس اللي راح يصير بعد ٣ شهور
احمد زادت مشاكله مع شوق وصار مايمر اسبوع لهم الا وهم متهاوشين مرتين وثلاثه لدرجه صاروا يتجنبون بعض ونادر مايتكلمون بس عشان محد يجرح الثاني احمد تعب من هذي المشاكل وقرر انه يتناقش معاها بهالموضوع عشان يوصلون لحل هو كان مفكر الموضوع سهل وانها راح تسمع كلامه وتقتنع منه لكن انصدم انه صار يتعب معاها وهي عنيده بشكل مو طبيعي وهو اعند منها ومايهداله بال الا وكلمته هي اللي تمشي...

وصل البيت ودخل عند ابوه في المجلس الخارجي للرجال
احمد: السلام عليكم
ابوه وعمه: وعليكم السلام
احمد يسلم على عمه ويحب راسه: هلااا عمي توو مانور البيت عاش من شافك
عمه بو راكان: عاشت ايامك يا احمد تسلم
وقعدوا مع بعض يسولفون وبعد مده من السوالف ابو احمد لف على ولده وقال: احمد بكلمك في شغله ضروريه ابيك تسأل عن رجال متقدم لأختك اسمه يوسف محمد الـ......... هو مهندس طيران عندكم اسأل واعرف عنه وخبرني...
احمد: لحضه اسمه مو غريب علي كأني سمعت فيه! ايييي تذكرت كان معاي في فترة التدريب ماشاءالله رجال ذكي ومتعلم وكفو بس انا خبري انه متزوج شلون يبي يعرس مره ثانيه؟
ابوه: تأكد تأكد عدل اسأل عنه واعرف كم عمره
احمد: اتوقع عمره ٢٩ يبه لان كان اكبر واحد في دفعتنا بس ان شاء الله بسأل
عمه: اسأل عنه عدل وتأكد ترا ساره غاليه مانعطيها لاي احد الا الكفوو
ابو احمد: هذا الشي اكيد ياخوك لاتحاتي بنتي اعرف اختار لها معرس مناسب
اخوه: والله ياخوك الله يهداك انت ماتختار الا اللي يعجبك وبنتك تقنعها بالرجال بعد ما تختاره حتى بدون ماتشاورها اذا هي عاجبها ولا لا
احمد: عمي شالكلام الله يههداك شنو يعجبها ومايعجبها من متى البنات نشاورهم بهالاشيا...
ابوه لف عليه: انت اسكت عمك يتكلم معاي
احمد تفشل ونزل راسه
ابو راكان: والله يا احمد يا متعلم يا فاهم البنت من حقها تقرر من تبي ومن ماتبي ومحد يقدر يغصبها على زوج ماتبيه هذا قرارها هي مش قراركم انتوا صح انتوا اولياء امرها وتختارون لها الزين والرجال الكفو وهذا الصح بس رايها وقرارها هو الاهم واعتقد ياخوي انت فاهمني عدل بكلامي...
ابو احمد: فاهمك ياخوي والله يكتب اللي فيه الخير...
الا ماقلت لي شخبار راكان ماقال متى راجع من سفرته؟
اخوه: والله بخير بخير ماشاءالله عليه شاد حيله وماباقي شي كلها كم اسبوع وراجع باذن الله
ابو احمد: الله يوفقه ان شاء الله انا سامع انه بيترقى بعد هذي الدوره صحيح ولا؟
ابو راكان: اي صحيح ان شاء الله
احمد: الله يوفقه يستاهل راكان مشاءالله عليه وعقبال ما نفرح فيه
ابوه وعمه بصوت واحد: امين ان شاء الله
ابو راكان: يالله على ايدك اقنع ولد عمك بالزواج
احمد: ابشر خله يرجع بالسلامة وانا استلمه لك صبح وليل...
عمه وابوه يضحكون...