استوطنتَ قلبي

Part 11

بعد مرور ساعه على التحقيق..
راكان يفكر بكلام المحقق المسؤول عن القضية ويفكر بأخوه اللي خايف عليه..
راكان: شبتسوي اللحين؟
عزيز وهو يسوق: ولاشي
راكان: شلون ولا شي؟ تستعبط انت؟
عزيز: راكان يعني شتبيني اسوي؟ امسك سلاحي ٢٤ ساعة وما انام الليل!؟
راكان: لا طبعاً بس لازم تكون حذر اكثر وماخذ احتياطك لان الكلام اللي قاله المحقق ماينمزح فيه
عزيز: ادري والله ادري انا مب خايف على نفسي انا خايف على البيت...
راكان: احنا ماعلينا شر ان شاء الله انت بس اهتم بنفسك ودير بالك على روحك وخل سلاحك معاك دايم..
عزيز: ان شاء الله وبعدين انت عارف ان هاي طبيعة شغلي يعني متعودين على هاي الأكشنات يومياً
راكان: والله انك خبل صج، انزين اللحين ليش مشوار المستشفى هذا! فيك شي انت؟
عزيز: ياخي حاس راسي يعورني من امس مو قادر انام قلت بتأكد وبسوي فحوصات...
راكان: طيب
بعد دقيقتين وصلوا للمستشفى وادخلوا اثنينهم غرفة الدكتور اللي هو صديق عبدالعزيز وتكلموا شوي... وسوو اشعه لعزيز وبعد ماخلص الدكتور من عزيز شاف راكان قال له: تعال شوي راكان خل نشوف يدك مره وحده...
راكان: مالا داعي امس سويت اشعه وجبسوها...
الدكتور: يا رجال ماراح نسويلها شي بس اجراءات عاديه ولا تبي عزيز اخوك يقول عني ما اعرف بالاصول ولا شيكت على اخوه المتكسر؟
راكان يبتسم: ههه طيب يالله
عزيز غمز لصاحبه وصاحبه ابتسم له < كانوا متفقين مع بعض قبل لايوصل عزيز...
راح راكان وقعد على السرير والدكتور فك من راكان الجبس وراكان كان يتألم شوي لين يفكه بعد ما فتح الدكتور الجبس انصدم من اللي شافه...
الدكتور: راكان!! نو هذااا!!
راكان توتر...
عزيز: شفيك دكتور؟
الدكتور: هذا مب كسر عادي انت عظامك رايحه فيها وتقولي مافيك شي بعد!! من متى ايدك جي؟
عزيز قام وراح يشوفه وانصددم من يد اخوه: بل شنووو ذي راكان معقوله ايدك جي من كسر امس؟
الدكتور: الكسر الحادث مايكون جي يكون طبيعي وحتى لما نركب الجبس اليوم الثاني شوي يخف الورم لكن يد اخوك رايحه فيها والله كأنه حد رامي طابوق عشر مرات على ايدك....
عزيز: اوووف
راكان ببرود ويتألم: ااه خلصتوا؟ ممكن تلبسني الجبس مره ثانيه يا سعود ؟
دكتور سعود: راكان لا تستعبط انت مأذي ايدك بشي بعد الحادث؟
راكان: لا
الدكتور وهو مو مصدق راح عند التلفون يتصل...
راكان: شتسوي؟
دكتور سعود: بطلب الممرضه وبنسويلك اشعه جديدة انا شاك عندك كسور جديده..
راكان: يادكتور.... ويقاطعه...
دكتور سعود: لا دكتور ولا شي اسكت
عزيز يرفع تلفونه ويصور يد اخوه
راكان: انت شتسوي!! وقتك تصور؟
عزيز: شاسوي ياخوي والله ايدك رايحه فيها مسكين والله ههههه
راكان يسوي نفسه بيرفس اخوه: قوم قوم من قدامي بلشتنا مع صاحبك لو ماجيت وياك كان احسن...
عزيز يضحك: ههههه انزين هدي شفيك انت بدال ماتشكرني!
دكتور سعود جاي: لا والله!! الا زين جبته معاك ولا كان الله العالم شنو بيصير بيده لو تمت بهالحاله...
راكان: ماراح يصير لها شي المسكنات عندي ويدي مجبسه ومافيها شي...
الدكتور: هههه يحليلك وايد تضحك على كيفك صاير دكتور بدالي، حبيبي ايدك اذا تركتها بهالوضع احتمال صعب تلتأم العظام لانك قضيت عليها من الاساس...
عزيز: من صجك؟
الدكتور: ايه من صجي براويك اللحين بالاشعه
ادخلت الممرضه وخذوا راكان لغرفة الاشعه وقعد عزيز والدكتور بالغرفه...
دكتور سعود: زين قلت لي وجبته هذا اخوك غبي متهور ومب هامه شي وبعدين واضح مسوي شي بيده وخلاها تصير بهالحاله...
عزيز: شلون يعني مسوي شي
الدكتور: يعني اخوك مأذي نفسه عمداً يعني ضارب يده بشي قاسي...
عزيز بصدمه: مستحيل انت شتقول!! راكان مايسوي هالحركات
الدكتور: مادري يسويها ولا لا انا اللي اشوفه قدامي هذا وانا متأكد منه
عزيز: شوف هو يلعب ملاكمه يمكن منه؟
الدكتور: لا مو منه اقولك ضارب جسم قاسي مثل طوفه او سياره او باب قوي
عزيز: لا حول ولا قوة الا بالله انزين واللحين شلون؟ فيه حل ان شاء الله صح؟
الدكتور: ان شاء الله باذن الله بس بالاول خل نشوف الاشعه ان شاء الله مايحتاج اخدره وارجع الاجزاء المكسوره لمكانها لان احتمال يكون عنده فجوات بين قطع العظم...
عزيز: والله خوفتني شكلها السالفه كبيره
الدكتور: هي ماكانت بتكون كبيره لو ما اذى نفسه هالكثر
عزيز: انزين لو طلع فيه اللي قلته! بتسويله عملية؟
الدكتور: اول شي الله لايقول وان شاء الله ما نوصل لهالحل بس اذا صار راح تكون عملية بسيطة بتخدير موضعي او تخدير كامل على حسب قوة تحمله للالم وواضح اخوك يحب الالم وايد...
عزيز يفكر بينه وبين نفسه: شنو بيكون صاير مع هالرجال معقوله اذى نفسه عمداً؟ طيب ليش وعشان شنو؟
دخل راكان وكان يتألم ومو حاس بجسمه كامل وراسه مصدع
الدكتور: هاه تتألم صح؟
راكان: ايه ااااه
الدكتور: لان فكينا الجبس طبيعي هالشي متى اخر مره خذت المسكن؟
راكان: الصبح حبتين
الدكتور: توه باقي على مايخلص مفعولهم مب مشكله بشوف نتايج الاشعه وبشوف شبعطيك...
عزيز راح عند اخوه يشوف يده ويهديه: لاحول ولاقوة الا بالله تحمل ياخوي ماعليه اللحين سعود يعالجك الله يعينك ان شاء الله...
دكتور سعود: تعال معاي يا راكان، عزيز خلك احنا مو مطولين
اطلعوا من الغرفه وتم عزيز قاعد.. فتح تلفونه وشاف الصوره وتضايق وفجأه شاف مسج من ساره..
ساره: عزيز شصار معاكم! رحتوا المستشفى؟
عزيز يكتب لها: اذا فاضيه بتصل عليج
ساره: اي فاضيه
بعد دقيقه اتصل عليها..
عزيز: الو
ساره: الو
عزيز: هلا ساره شلونج
ساره: طيبه طمني شصار؟
عزيز: ماكو جينا المستشفى بعذر اني تعبان بسوي اشعه لراسي وخليت رفيجي يسوي لراكان اشعه ليده..
ساره: ايي!
عزيز: والله مادري شاقولج بس زين قلتيلي اوديه المستشفى والحمدلله انتبهتي على يده اليوم ولا والله كانت يده بتروح فيها..
ساره بخوف توقف وتمشي بغرفتها: عزيز بديت اخاف تكلم شصار
عزيز: بعد ما فتح منه الجبس يده كانت اعوذ بالله كانه حد ضاربها بطابوق مفتفتها يعني مو ايد طبيعيه نهائياً كانت متشوهه..
ساره وهي تدمع عيونها: عندك صوره؟
عزيز: اي بس ما انصحج تشوفينها
ساره: طرشها
عزيز: ساره والله بتلوع جبدج الصوره مقززه ماراح تتحملين
ساره بصوت مخنوق: عزيز بليز
عزيز وكانه حاس انها تصيح: طيب اكو بطرشها واتساب
ارسل لها الصوره وهي ادخلت المحادثه وشافت الصوره واشهقت بهدوء...
طاحوا دموعها شلال بعد ماشافت يده المنتهيه وكانت تحاول تمسك شهقاتها عشان لايسمعها عزيز...
عزيز طبعاً سمعها بس الي صار ان عزيز متعجب ومستغرب من خوف ساره على راكان المبالغ فيه وتأثرها هالكثر على صحته!
عزيز قال: ساره!
ساره مسكره على فمها وتصيح..
عزيز: ساره ترا قاعد اسمعج تصيحين، ممكن تقولين لي شصار بينج وبين راكان امس؟
ساره كانت بعالمها تصيح وماقدرت ترد عليه...
عزيز: طيب مابي اضغط عليج بس راح اعرف بعدين
ساره: وينه هو اللحين!
عزيز وكأنه فهم بس كان يبي يسمع منها: راح ويا الدكتور الغرفه الثانيه..
ساره: عزيز امانه طمن...
عزيز يقاطعها: ادري لاتحاتين بطمنج بعد مانخلص..
ساره: شكراً عزيز
عزيز: لاتشكريني ماسويت شي بس اسمعيني، ابيج تقومين تغسلين وجهج وتصلين ركعتين تهدين شوي وبكلمج بعدين عشان اتطمن سمعتي؟
ساره: ان شاء الله
عزيز: يالله مع السلامه
سكرت منه وهي تنفجر صياح، كانت متضايقه على حالهم هي وراكان وشلون صاروا بهالوضع...
اما عند عزيز فقام من الكرسي وهو يفكر: هالبنت مو عاجبني وضعها ليش احسها تحس بشي تجاه راكان! اليوم لازم اعرف منها هالشي بس اذا طلع صج الله يستر..