FDA 4: THE GIRL THAT GOT AWAY - COMPLETE

Kabanata 32

"SO, HANGGANG KAILAN n'yo ako gagawing tanga?"

"Kuya Si –"

Bumuga ng hangin si Simon at biglang lumamlam ang ekpresyon ng mukha nito. "Kung hindi ko pa kayo nahuli ay hindi pa kayo aamin sa'kin." Napakamot ito sa noo. "Hindi ako tanga. Matagal ko nang napapansin ang mga galaw ninyo."

Nagpalitan sila ng tingin ni Thad.

"Alam mo na?" hindi makapaniwalang tanong ni Thad kay Simon.

Naglapat ang mga labi ni Simon at tipid na ngumiti saka tumango. "Matagal na. Kaya lang hirap n'yo hulihin sa akto."

"H-Hindi ka galit?" tanong niya, ramdam niya ang bahagyang relief sa kanyang puso.

"Galit? Tampo siguro." Lumapit ito sa kanila ni Thad. "Anong tingin n'yo sa'kin kontrabida? Aba'y kung nagmamahalan naman kayo ay bakit ako kokontra?" Pero pinaningkitan nito ng mga mata si Thad. "At ikaw, Thaddeus Bernardo Apostol, mag-uusap pa tayo mamaya."

Pareho silang dalawa ni Thad na sobrang na relieved. Nagawa na rin niyang ngumiti at ganoon din si Thad nang pareho nilang ibaling ang tingin sa isa't isa. Inabot niya ang kamay ni Thad at marahan 'yong pinisil. Hinawakan din nito ang kamay niya.

"So, kayo na nga?" tanong ulit ni Simon sa kanila.

"Oo, Kuya Si," nakangiti niyang sagot. "Kami na ni Thad."

Umasim ang mukha ni Simon. "Ako na lang pala natitirang single rito. 'Langya 'yan."

Natawa silang dalawa ni Thad.

"Hindi ka naman yata naghahanap," singit ni Thad.

"Pera hinahanap ko ngayon at lisensiya," ngising sagot ni Simon. Bumaba naman ang tingin nito sa magkahawak na kamay nila ni Thad. Naging striktong kuya ulit ang ekspresyon ng mukha nito. "Talagang mag-ho-holding-hands kayo sa harapan ko?"

Siya ang humiwalay kay Thad pero hindi siya hinayaang makalayo dahil ang blouse niya naman ang hinawakan nito na parang bata.

Naningkit lalo ang mga mata ni Simon sa kanila.

"Ayaw n'yo talaga maghiwalay, ha?"

Nakangising umiling si Thad. "Ayaw."

Natawa lang siya.

"HERE." INABOT NI Thad kay Simon ang isang pale pilsen beer. "Libre ko na." Tumawa ito sa kanya at tinanggap ang bote. "I'm really relieved," aniya pagkaupo niya sa sofa katabi ni Simon.

"Huwag ka munang magsaya nang sobra Apostol," sagot ni Simon pagkatapos bawasan ang laman ang bote na hawak. "Hindi porke't matagal na tayong magkaibigan ay hahayaan na lang kita sa kung anong gusto mo riyan. Pinapaalalahanan kitang, ako ang tumatayong kuya ni Sanna kaya nasa watchlist kita."

Natawa si Thad. "Alam ko. Pero huwag kang mag-alala. Seryoso ako kay Sanna." Napangiti siya. Bigla na lamang pumasok sa isipin niya ang mukha ni Sanna. Ang laking relief sa kanya na hindi na nila itinatago sa mga kaibigan nila ang relasyon nilang dalawa. "Mahal na mahal ko 'yon."

Simon raised an eyebrow. "Talaga lang, ha?" anito sabay inom. "Parang narinig ko na rin 'yan noon."

"Matagal na kaming wala ni Mel at hindi ko na rin siya naiisip. Na kay Sanna na ang atensyon ko ngayon. Siya na lang ang iniisip ko." Napangiti siya habang nakatingin sa bote na hawak. "I know you think that I'm not worthy of her, but I'm doing my best to deserve her."

"Aminado ako na iniisip ko rin 'yan minsan pero kaibigan mo ako at kilala kita. Kaya pagkakatiwalaan kita sa puso ni Sanna. Pero binabalaan kita, Thad. Kapag sinaktan mo si Sanna ay baka hindi mo magustuhan ang gagawin ko sa'yo."