رواية " لخبايا القلوب حكايا " بقلم/ رحمة سيد

استفتاء مهم♥

مساء الخير عليكم.♥
عاوزه أناقشكم في شيء، أنتوا عارفين إننا في الفصول الأخيرة من الرواية، بقفل الأحداث وبعمل نهاية سعيدة ومشاهد لا تخلو من المشاعر الجميلة
أنا بصراحة اثناء الكتابة مش عارفة أخد حريتي؛ بمعنى أنا متقيدة مش عارفة أكتب حرف واحد عن المشاعر والرومانسية احترامًا للشهر الفضيل، مع إن النقطة دي في الأحداث بتفرض عليا مشاهد كوميدية رومانسية لذيذة كلنا بنحبها في النهايات، طبعًا أنا في الطبيعي مابكتبش شيء خادش للحياء او جرئ لكن أنا في الشهر ده مش عايزه أأثر في مشاعر حد ولو ذرة... احنا بنتشعبط في رضا ربنا 😅😅
وكمان سمعت إن مينفعش أساهم في انشغال الناس، هو شهر وحيد للعبادة♥
غير إني أنا شخصيًا بكتب بسرعة وخايفة أكروتها، يعني هشرحلكم تفصيليًا يومي ماشي ازاي.. بنفطر وبعدين بقوم اتوضى والبس وانزل أصلي التراويح في المسجد عقبال ما بخلص وبروح بتكون الساعة 10، النوم ممكن يفرض سلطانه عليا وأنام ساعة او ساعتين بالتالي مابيكونش قدامي إلا ساعة او ساعتين فقط للسحور ودول غير كافيين للكتابة والتفكير ابدا وببقى اللي هو أقلب وأجري بسرعة 😂

بقولكم كل ده عشان تختاروا معايا القرار اللي تحبوه، أكمل زي ما أنا بدون مشاهد لها أي علاقة بالرومانسية، ونخلص الفصلين او التلاتة المتبقيين.
او أكتبهم براحتي وننزلهم في العيد بإذن الله..
القرار متروك لكم عشان مش عايزه أضايقكم، وعذرًا ع الرغي الكتير ده 😅❤😘
انا هقرأ كومنتاتكم فياريت تقولولي ارائكم ❤❤
وبالمناسبة دي أخر رواية هتنزل قيد الكتابة♥