#هيجان بحر الزمن
#البارت الثالث
الكاتبه camellia
بسم الله ♥️
صلو علئ النبي ♥️
~~~~~~~~~~~~~
نمت ماادري بروحي ومحد كعدني للعشه ولا اني كعدت لوحدي .جربته نومه مثل نومه أهل الكهف
حسيت علئ شي يدفر بيه فتحت عيوني
واشوف امي تغلط وتحجي
_يالله ولج يلفكر اكعدي وعافتني وراحت
.ظهري احسه شلون الواحد شاده بحزام
مديت ايدي لكيت اكو اثر مال ضربه وبيه خدوش ودم. ايدي جانت مبلله وعركانه فحسيت بألم وحركه مااهتميت
كمت رحت للحمام غسلت وجهي
وكمت ترست الطشت
ورحت جبت دشداشه من الكنتور.
ورجعت للحمام. كعدت على محجره ولأول مره بحياتي صرت اعرف اسبح واستخدم الصابون والشامبو
جنت اعرف شلون استخدمهن من كد مااراقب امي واخوتي
خلصت سبح وغسلت دشداشتي لكيت شلون اللزكه مال دم على الظهر .كعدت وغسلتها. وكمت اتعلم شلون اعصرها بيدي
خلصت وطلعت ونسيت انشف شعري
هو يحظي منين اكو شعر
حتى نوال وجنان مرات يعيبن عليي ويصحلني ام شعرتين ويضحكن عليي
كعدت بالمطبخ وفتحت الثلاجه طلعت تفاح وموز وبرتقال وكعدت اكل وعيوني للسكف احسب عدد الشلمانات واباوع للشباك واحسب عدد الجامات. اباوع لكل حاجه بالمطبخ شكلها وهندستها ولونها
خلصت طلعت الصاله
شفت الملابس الي كالت عنها امي والجنط المستعمله والاحذيه القديمه تكرمون
شلتهن وسحلتهن للغرفه
فطنت ماكو جواريب وحسبالي مانلبس جواريب بالمدرسه
كعدت أسطر بالملابس واشوفهن زينات مابيهن شي بس كم قطعه متهراه. وباوعت الاحذية جربتهن. طلعن كبار بالقياس. واذا اركض يمكن يطيرن من رجليه ههههه
كمت لممت الملابس وشلتهن للكنتور والاحذيه حطيتهن جوه الجربايه
سمعت اقدام تتحرك ركضت للجربايه وسويت نفسي نايمه
عرفت ابوي كعد وراح للحمام توضى واجه للصاله فرش سجادته وكبر وكام يصلي.
ومن خلص كعد يجود قران صوته حلو وشجي مثل هذا الي قره العصر قبل لاتطلع افلام كرتون
سمعت امي نزلت
اليوم الحجي صار مؤذن تهي بهي
اكلي نعل لج بنت النجس
والله ماكو نجس الا انته وأهلك
جلبه بنت الجلب. انعل سلف سلفاج كومي عني قندره
ههههه.شنة قابل جايه الك جنك ثور متهينه اهله
ماحس اله بس صوت صفكات الراشديات
اني من يمي انهزيت وطحت من الجربايه من الخوف
واسمع صوت امي تلعلع
أنت تقرأ
هيجان بحر الزمن
ChickLitقصه حقيقيه زمن ذلك الشي الذي يترقب منه الكل النهايه الا انا اترقب فيه تلك البدايه النهايه بعد طول عناء وقله صبر الياس فاجلس اترقب تلك الاله وهي تدق وتدق حتى يدق قلبي معها
